મોંઘવારીનો ડબલ ડોઝ: અમૂલ બાદ હવે મધર ડેરીએ પણ ઝીંક્યો ભાવવધારો, આજથી દૂધ મોંઘું.
દેશભરમાં સામાન્ય જનતા પર મોંઘવારીનો વધુ એક પ્રહાર થયો છે. અમૂલ (GCMMF) દ્વારા દૂધના ભાવમાં વધારો જાહેર કર્યાના ગણતરીના કલાકોમાં જ મધર ડેરીએ પણ પોતાના દૂધના ભાવમાં વધારો કરવાની જાહેરાત કરી છે. બંને અગ્રણી કંપનીઓએ દૂધની વિવિધ શ્રેણીઓ પર પ્રતિ લિટર ૨ રૂપિયા સુધીનો વધારો ઝીંક્યો છે. આ નવા ભાવ આજથી એટલે કે ૧૪ મે થી દેશભરમાં અમલી બની ગયા છે, જેની સીધી અસર સામાન્ય માણસના માસિક બજેટ અને રસોડા પર જોવા મળશે.
દિલ્હી-એનસીઆરમાં હવે શું રહેશે ભાવ?
દેશની રાજધાની દિલ્હી અને આસપાસના વિસ્તારોમાં (નોઈડા, ગાઝિયાબાદ) દૂધ ખરીદવું હવે મોંઘું પડશે. દિલ્હીમાં અમૂલ અને મધર ડેરી બંનેનું ફુલ ક્રીમ દૂધ હવે ૭૦ રૂપિયાને બદલે ૭૨ રૂપિયા પ્રતિ લિટરના ભાવે મળશે. જ્યારે ટોન્ડ મિલ્ક (Toned Milk) નો ભાવ વધીને ૬૦ રૂપિયા પ્રતિ લિટર થયો છે. ગાયના દૂધની વાત કરીએ તો ગ્રાહકોએ હવે ૬૨ રૂપિયા ખર્ચવા પડશે. આ ઉપરાંત, ડબલ ટોન્ડ દૂધ જે અત્યાર સુધી સસ્તું ગણાતું હતું, તેના ભાવ પણ વધીને ૫૪ રૂપિયા પ્રતિ લિટર થઈ ગયા છે.
મુંબઈ અને કોલકાતામાં સ્થિતિ:
આર્થિક રાજધાની મુંબઈમાં અમૂલ ગોલ્ડના ભાવમાં ૨ રૂપિયાનો વધારો થતા તે ૭૨ રૂપિયા પર પહોંચી ગયું છે, જ્યારે અમૂલ તાઝા હવે ૬૦ રૂપિયા પ્રતિ લિટરના ભાવે ઉપલબ્ધ થશે. પૂર્વ ભારતના મુખ્ય શહેર કોલકાતામાં પણ સ્થિતિ સમાન છે. ત્યાં મધર ડેરીનું ટોન્ડ દૂધ ૫૮ રૂપિયાથી વધીને ૬૦ રૂપિયા પ્રતિ લિટર થયું છે. અમૂલ ગોલ્ડ ત્યાં ૭૨ રૂપિયામાં વેચાઈ રહ્યું છે.
દક્ષિણ ભારતમાં પણ અસર:
દક્ષિણ ભારતના ચેન્નાઈ શહેરમાં પણ દૂધના ભાવમાં ફેરફાર જોવા મળ્યો છે. ચેન્નાઈમાં અમૂલ ગોલ્ડ ૭૨ રૂપિયા જ્યારે ગાયનું દૂધ અને તાઝા દૂધ ૬૨ રૂપિયા પ્રતિ લિટરના ભાવે વેચાઈ રહ્યું છે.
શા માટે વધ્યા ભાવ?
કંપનીઓના જણાવ્યા અનુસાર, દૂધના ઉત્પાદન ખર્ચમાં સતત થઈ રહેલો વધારો, પશુ આહારના વધતા ભાવ અને ટ્રાન્સપોર્ટેશન ખર્ચને કારણે આ નિર્ણય લેવો પડ્યો છે. જોકે, મધર ડેરીએ સ્પષ્ટ કર્યું છે કે તેઓ ખેડૂતોને પણ દૂધના વધુ ભાવ ચૂકવી રહ્યા છે, જેના કારણે ગ્રાહકો પર આ ભાર ટ્રાન્સફર કરવો અનિવાર્ય બન્યો છે.
સતત વધી રહેલી મોંઘવારી વચ્ચે દૂધ જેવી પાયાની જરૂરિયાત મોંઘી થવાથી મધ્યમ અને ગરીબ વર્ગના પરિવારોમાં ચિંતાનું મોજું ફરી વળ્યું છે.
