આણંદમાં ૭૦ ફીલ્ડ ટ્રેનર્સને આપવામાં આવી વિશેષ તાલીમ
ભારત સરકાર દ્વારા આગામી સમયમાં હાથ ધરવામાં આવનાર ‘વસ્તી ગણતરી-૨૦૨૭’ ની પૂર્વતૈયારીઓ આણંદ જિલ્લામાં વેગવંતી બની છે. આ પ્રક્રિયાના પ્રથમ તબક્કાના ભાગરૂપે આણંદ કૃષિ યુનિવર્સિટી ખાતે ત્રણ દિવસીય વિશેષ તાલીમ કાર્યક્રમનું આયોજન કરવામાં આવ્યું હતું. જિલ્લા કલેક્ટર પ્રવીણ ચૌધરીએ આ તાલીમ કેન્દ્રની રૂબરૂ મુલાકાત લઈને તાલીમાર્થીઓને જરૂરી માર્ગદર્શન પૂરું પાડ્યું હતું. આ તાલીમમાં જિલ્લાના વિવિધ વિસ્તારો અને મહાનગરપાલિકાના કુલ ૭૦ ફીલ્ડ ટ્રેનર્સને માસ્ટર ટ્રેનર્સ દ્વારા વસ્તી ગણતરીની ઝીણવટભરી વિગતો શીખવવામાં આવી રહી છે.
વસ્તી ગણતરીમાં ડિજિટલ ટેકનોલોજીનો વિશિષ્ટ ઉપયોગ
વર્ષ ૨૦૨૭ ની વસ્તી ગણતરીની સૌથી મોટી વિશેષતા એ છે કે તે સંપૂર્ણપણે ડિજિટલ માધ્યમથી હાથ ધરવામાં આવશે. આ માટે ભારત સરકાર દ્વારા ખાસ ‘સેન્સસ મોનિટરિંગ એન્ડ મેનેજમેન્ટ સિસ્ટમ’ (CMMS) મોબાઈલ એપ્લિકેશન તૈયાર કરવામાં આવી છે. આ આધુનિક એપના ઉપયોગથી ડેટા એન્ટ્રીમાં ચોકસાઈ વધશે અને પરિણામો ઝડપથી મેળવી શકાશે. વહીવટી તંત્ર દ્વારા મામલતદારો અને ચીફ ઓફિસરશ્રીઓને ‘ચાર્જ ઓફિસર’ તરીકેની મહત્વની જવાબદારી સોંપવામાં આવી છે, જેઓ ગણતરીદારો અને સુપરવાઈઝરની કામગીરી પર સીધી દેખરેખ રાખશે.
સેલ્ફ એન્યુમેરેશન અને મકાનોની ગણતરીનો પ્રથમ તબક્કો
આગામી વસ્તી ગણતરીમાં નાગરિકોની સુવિધા માટે ‘સેલ્ફ એન્યુમેરેશન’ પોર્ટલ પણ શરૂ કરવામાં આવશે. તા. ૫ એપ્રિલ થી ૧૯ મે ૨૦૨૬ દરમિયાન નાગરિકો પોતે જ ઓનલાઇન પોર્ટલ પર જઈને પોતાની વિગતો ભરી શકશે. ત્યારબાદ ૨૦ એપ્રિલથી ૧૯ મે ૨૦૨૬ દરમિયાન ગણતરીદારો દ્વારા ‘હાઉસ ટુ હાઉસ’ મુલાકાત લઈને મકાનોની ગણતરી (House Listing Operations) કરવામાં આવશે. આ કામગીરી માટે ગણતરીદારો દ્વારા મોબાઈલ એપ્લિકેશનનો જ ઉપયોગ કરવામાં આવશે, જેથી કાગળકામમાં ઘટાડો થશે અને માહિતી સુરક્ષિત રહેશે.
પારદર્શક વહીવટ અને નાગરિકોના સહકારની અપેક્ષા
વસ્તી ગણતરીની સમગ્ર પ્રક્રિયાને પારદર્શક બનાવવા માટે જિલ્લા સ્તરે કલેક્ટરશ્રી અને મહાનગરપાલિકા સ્તરે મ્યુનિસિપલ કમિશનરશ્રી મુખ્ય જવાબદારી સંભાળી રહ્યા છે. વસ્તી ગણતરી એ રાષ્ટ્રના વિકાસનું આયોજન કરવા માટેનો પાયાનો સ્ત્રોત છે, તેથી વહીવટી તંત્ર દ્વારા તમામ નાગરિકોને સાચી અને સચોટ માહિતી આપીને ગણતરીદારોને સહકાર આપવા અપીલ કરવામાં આવી છે. આધુનિક ટેકનોલોજીના સમન્વયથી આ વખતે વસ્તી ગણતરી વધુ સુવ્યવસ્થિત અને ભૂલરહિત બનશે તેવી આશા રાખવામાં આવી રહી છે.
