બેનક્રોફ્ટ-કમિન્સ ફરી આમને-સામને! સૅન્ડપેપર વિવાદે ઓસ્ટ્રેલિયન ક્રિકેટમાં ફરી જગાવી જૂની યાદો

5 Min Read

બેનક્રોફ્ટ અને કમિન્સ વચ્ચે સેન્ડપેપર કાંડને લઈને વિવાદ વકર્યો: એક તરફ આખી ટીમ સામેલ હોવાનો દાવો, તો બીજી તરફ બોલરો અજાણ હોવાની સ્પષ્ટતા

ઓસ્ટ્રેલિયન ક્રિકેટમાં વર્ષ 2018નો ચર્ચિત ‘સેન્ડપેપરગેટ’ વિવાદ ફરી એકવાર ચર્ચાના કેન્દ્રમાં આવ્યો છે. દક્ષિણ આફ્રિકા સામેની ટેસ્ટ શ્રેણી દરમિયાન બોલ સાથે ચેડાં કરવાની ઘટનાને લઈને હવે ઓસ્ટ્રેલિયાના વર્તમાન ટેસ્ટ કેપ્ટન પેટ કમિન્સ અને પૂર્વ ખેલાડી કેમેરોન બેનક્રોફ્ટ વચ્ચે વિરોધાભાસી નિવેદનો સામે આવ્યાં છે. બેનક્રોફ્ટે દાવો કર્યો છે કે બોલ પર સેન્ડપેપરનો ઉપયોગ કરવાની સમગ્ર ટીમને જાણકારી હતી, જ્યારે કમિન્સનું કહેવું છે કે બોલરોને આ બાબતની કોઈ જાણ નહોતી. બંને ખેલાડીઓનાં નિવેદનોને કારણે છ વર્ષથી વધુ સમય જૂનો વિવાદ ફરી ચર્ચામાં આવ્યો છે.

આ વિવાદને ફરી હવા આપવાનું કામ ઓસ્ટ્રેલિયાના પૂર્વ બેટ્સમેન ઉસ્માન ખ્વાજાની આત્મકથા ‘સબ્ર’ (Sabr)માં કરવામાં આવેલા ખુલાસાએ કર્યું છે. ખ્વાજાએ પોતાની આત્મકથામાં જણાવ્યું છે કે સેન્ડપેપરના ઉપયોગ અંગે ટીમના તમામ ખેલાડીઓ જાણતા હતા. પૂર્વ ઓપનર ડેવિડ વોર્નરે પણ ખ્વાજાના નિવેદનનું સમર્થન કર્યું છે. જોકે, પેટ કમિન્સે આ દાવાને નકારી કાઢતાં સ્પષ્ટ કર્યું છે કે બોલરોને આ સમગ્ર ઘટનાની જાણકારી નહોતી. હવે બેનક્રોફ્ટે પણ જાહેરમાં કમિન્સના નિવેદન સામે સવાલ ઉઠાવ્યા છે.

- Advertisement -

aus.jpg

બેનક્રોફ્ટનો દાવો: સેન્ડપેપર કાંડમાં આખી ટીમ સામેલ હતી

કેમેરોન બેનક્રોફ્ટે ‘ધ વેસ્ટ ઓસ્ટ્રેલિયન’ અખબારમાં લખેલી પોતાની કોલમમાં આ વિવાદ અંગે મહત્ત્વપૂર્ણ દાવો કર્યો છે. તેમના જણાવ્યા અનુસાર, દક્ષિણ આફ્રિકામાં બોલ સાથે ચેડાં કરવાની ઘટનાની જાણકારી માત્ર સ્ટીવ સ્મિથ, ડેવિડ વોર્નર અને તેમને જ હતી એવું માનવું યોગ્ય નથી. તેમણે દાવો કર્યો છે કે ટીમના દરેક ખેલાડી આ ઘટનામાં સામેલ હતા.

- Advertisement -

બેનક્રોફ્ટે પોતાની કોલમમાં સ્વીકાર્યું છે કે અગાઉ તેમણે આ ઘટનાને લગતી કેટલીક મહત્ત્વપૂર્ણ વિગતો જાહેર કરી નહોતી. તેમાં બોલ પર સેન્ડપેપરનો ઉપયોગ ક્યારથી શરૂ થયો હતો, આ પ્રવૃત્તિ કેટલા સમય સુધી ચાલી હતી અને ટીમના અન્ય સભ્યોની તેમાં કેટલી સંડોવણી હતી અથવા તેમને આ અંગે કેટલી જાણકારી હતી જેવી બાબતોનો સમાવેશ થાય છે.

બેનક્રોફ્ટે આ મુદ્દે હવે ખુલ્લેઆમ વાત કરવાનો નિર્ણય કેમ લીધો, તેની પાછળનું એક મહત્ત્વનું કારણ પેટ કમિન્સની તાજેતરની પ્રેસ કોન્ફરન્સ હોવાનું તેમણે જણાવ્યું છે. કમિન્સે બોલરોને આ ઘટનાની જાણકારી નહોતી તેવું નિવેદન આપ્યું હતું. બેનક્રોફ્ટના મતે, આ નિવેદનથી ઘટનામાં અન્ય ખેલાડીઓની જાણકારી અને ભૂમિકા અંગે ફરી સવાલો ઊભા થયા છે.

કમિન્સે જૂનું વલણ જાળવ્યું, મેનેજરે આપી સ્પષ્ટતા

બેનક્રોફ્ટના આરોપો સામે પેટ કમિન્સે પોતાના જૂના વલણમાં કોઈ ફેરફાર કર્યો નથી. કમિન્સના મેનેજર નીલ મેક્સવેલે તેમના વતી નિવેદન આપતાં જણાવ્યું હતું કે પેટ શરૂઆતથી જ આ મુદ્દે એક જ વાત કહેતા આવ્યા છે અને તેમનું વલણ વર્ષોથી બદલાયું નથી. તેમના જણાવ્યા અનુસાર, કમિન્સનું માનવું છે કે બોલરોને બોલ પર સેન્ડપેપરનો ઉપયોગ થઈ રહ્યો હોવાની કોઈ જાણકારી નહોતી.

- Advertisement -

‘એબીસી ન્યૂઝ’ (ABC News)ના અહેવાલ મુજબ, નીલ મેક્સવેલે બેનક્રોફ્ટ પ્રત્યે સહાનુભૂતિ પણ વ્યક્ત કરી હતી. તેમણે કહ્યું હતું કે પેટને કેમેરોન માટે ચોક્કસપણે સહાનુભૂતિ છે, કારણ કે તેણે આ ઘટનાને કારણે ઘણું સહન કર્યું છે.મેક્સવેલે વધુમાં લોકોને કમિન્સના અગાઉના ઇન્ટરવ્યુની ટ્રાન્સક્રિપ્ટ ફરી વાંચવાની વિનંતી કરી હતી. તેમના કહેવા પ્રમાણે, તે ઇન્ટરવ્યુમાં કમિન્સે એવું કંઈ કહ્યું નહોતું, જે અંગે તેમણે અગાઉ ક્યારેય વાત ન કરી હોય. એટલે કે, તાજેતરમાં આપવામાં આવેલા નિવેદનને કમિન્સના જૂના વલણથી અલગ રીતે જોવાની જરૂર નથી.

તેમણે એ પણ યાદ અપાવ્યું હતું કે ઓસ્ટ્રેલિયન ક્રિકેટ ટીમને ફરી મજબૂત બનાવવામાં પેટ કમિન્સની મહત્ત્વપૂર્ણ ભૂમિકા રહી છે. આથી, બેનક્રોફ્ટના નિવેદન છતાં કમિન્સ પોતાના અગાઉના પક્ષ પર મક્કમ છે.

aus0.jpg

2018ના વિવાદે ફરી ઊભા કર્યા જૂના સવાલો

વર્ષ 2018માં દક્ષિણ આફ્રિકા સામેની ટેસ્ટ શ્રેણી દરમિયાન ઓસ્ટ્રેલિયન ટીમના ખેલાડીઓ બોલ સાથે ચેડાં કરતા ઝડપાયા હતા. આ ઘટનામાં કેમેરોન બેનક્રોફ્ટને સેન્ડપેપરનો ઉપયોગ કરતા કેમેરામાં કેદ કરવામાં આવ્યા હતા. ત્યારબાદ આ સમગ્ર મામલો ‘સેન્ડપેપરગેટ’ તરીકે જાણીતો બન્યો હતો. આ વિવાદમાં સ્ટીવ સ્મિથ, ડેવિડ વોર્નર અને બેનક્રોફ્ટ સામે કાર્યવાહી થઈ હતી અને ઓસ્ટ્રેલિયન ક્રિકેટની છબી પર ગંભીર અસર પડી હતી.

ઘટનાના આટલા વર્ષો બાદ પણ આ મામલે કોણ કેટલું જાણતું હતું તે અંગે સંપૂર્ણ સહમતિ જોવા મળતી નથી. ઉસ્માન ખ્વાજાની આત્મકથામાં કરવામાં આવેલા દાવા, ડેવિડ વોર્નરનું સમર્થન અને હવે બેનક્રોફ્ટની ટિપ્પણીઓએ ચર્ચાને વધુ તીવ્ર બનાવી છે. બીજી તરફ, કમિન્સનું નિવેદન દર્શાવે છે કે આ મુદ્દે તેમનો પક્ષ હજુ પણ બદલાયો નથી.

Share This Article