MS Dhoni Net Worth: IPLમાંથી નિવૃત્તિ બાદ પણ કરોડોની કમાણી કરશે ધોની, જાણો કેટલી છે કુલ સંપત્તિ અને ક્યાં-ક્યાં કર્યું છે રોકાણ
ભારતીય ક્રિકેટના સૌથી સફળ કેપ્ટનોમાં સામેલ મહેન્દ્ર સિંહ ધોની ભલે હવે IPLમાં ખેલાડી તરીકે જોવા નહીં મળે, પરંતુ તેમની કમાણીનો સિલસિલો અટકવાનો નથી. ક્રિકેટના મેદાન પર પોતાની શાનદાર રમતથી ઓળખ બનાવનાર ધોનીએ મેદાનની બહાર પણ મોટું બિઝનેસ સામ્રાજ્ય ઊભું કર્યું છે. IPLની કમાણી, મોટી બ્રાન્ડ્સની જાહેરાતો, સ્ટાર્ટઅપ્સમાં રોકાણ, હોટેલ બિઝનેસ અને સ્પોર્ટ્સ ક્ષેત્ર સાથે જોડાયેલા વ્યવસાયોમાં તેમની ભાગીદારી તેમની આવકના મુખ્ય સ્ત્રોત છે. મીડિયા રિપોર્ટ્સ અનુસાર, મહેન્દ્ર સિંહ ધોનીની કુલ સંપત્તિ અંદાજે 1,000 કરોડ રૂપિયાથી વધુ હોવાનું કહેવાય છે. ખાસ વાત એ છે કે આંતરરાષ્ટ્રીય ક્રિકેટમાંથી નિવૃત્તિ લીધા પછી પણ તેમની બ્રાન્ડ વેલ્યુમાં ઘટાડો થયો નથી. હવે IPLમાંથી પણ ખેલાડી તરીકે વિદાય લીધા બાદ ચાહકોમાં તેમની સંપત્તિ, રોકાણ અને બિઝનેસને લઈને ચર્ચા વધી છે.
ધોની લગભગ બે દાયકા સુધી ચેન્નાઈ સુપર કિંગ્સ સાથે જોડાયેલા રહ્યા છે. તેમની કેપ્ટનશિપમાં CSKએ પાંચ વખત IPL ટ્રોફી જીતી છે. હવે તેઓ ટીમ સાથે મેન્ટર તરીકે જોડાયેલા રહેશે. એટલે કે મેદાન પર બેટિંગ કરતા નહીં દેખાય, પરંતુ ક્રિકેટ સાથેનો તેમનો સંબંધ યથાવત્ રહેશે.

IPLમાંથી ધોનીએ કરી 200 કરોડ રૂપિયાથી વધુની કમાણી
મહેન્દ્ર સિંહ ધોનીએ વર્ષ 2008માં IPLની શરૂઆત સાથે જ ચેન્નાઈ સુપર કિંગ્સ માટે રમવાનું શરૂ કર્યું હતું. પ્રથમ સિઝનમાં CSKએ તેમને આશરે 6.03 કરોડ રૂપિયામાં પોતાની ટીમમાં સામેલ કર્યા હતા. તે સમયે તેઓ IPLના સૌથી મોંઘા ખેલાડીઓમાંના એક હતા.સમયની સાથે ધોનીની લોકપ્રિયતા અને પ્રદર્શન વધતાં તેમની IPL ફીમાં પણ વધારો થયો હતો. તેમને અલગ-અલગ સિઝનમાં 12થી 15 કરોડ રૂપિયા સુધીની રકમમાં રિટેન કરવામાં આવ્યા હતા. 2026ની સિઝન માટે ચેન્નાઈ સુપર કિંગ્સે તેમને 4 કરોડ રૂપિયામાં રિટેન કર્યા હતા.
આજતકના અહેવાલ અનુસાર, ધોનીએ 2008થી 2026 દરમિયાન IPLમાંથી કુલ 200 કરોડ રૂપિયાથી વધુની કમાણી કરી છે. આ કમાણી તેમની કુલ સંપત્તિનો મોટો હિસ્સો છે. જોકે, IPLની આવક ઉપરાંત તેમની પાસે કમાણીના અન્ય અનેક સ્ત્રોત પણ છે.ધોનીની ખાસિયત એ રહી છે કે તેમણે ક્રિકેટમાંથી મળેલી લોકપ્રિયતાનો ઉપયોગ લાંબા ગાળાના બિઝનેસ અને રોકાણ માટે કર્યો છે. આ જ કારણ છે કે આંતરરાષ્ટ્રીય ક્રિકેટમાંથી નિવૃત્તિ લીધા પછી પણ તેમની આર્થિક સ્થિતિ મજબૂત રહી છે.
જાહેરાતો અને સ્ટાર્ટઅપ્સમાં રોકાણથી થાય છે કરોડોની કમાણી
મહેન્દ્ર સિંહ ધોની ભારતના સૌથી લોકપ્રિય બ્રાન્ડ એમ્બેસેડર્સમાં સામેલ છે. ઓટોમોબાઇલ, ફાઇનાન્સ, ટેક્નોલોજી, સ્પોર્ટ્સ અને કન્ઝ્યુમર ગુડ્સ જેવા અનેક ક્ષેત્રોની કંપનીઓ તેમની સાથે જાહેરાતો માટે જોડાયેલી છે.
તેમની બ્રાન્ડ એન્ડોર્સમેન્ટ યાદીમાં સ્ટેટ બેંક ઓફ ઇન્ડિયા, જિયો માર્ટ, ફાયર બોલ્ટ, સ્વરાજ ટ્રેક્ટર્સ, ગલ્ફ ઓઇલ, માસ્ટરકાર્ડ, પેનાસોનિક અને ઓરિએન્ટ ઇલેક્ટ્રિક જેવી કંપનીઓનાં નામ સામેલ છે. અહેવાલો અનુસાર, ધોની એક જાહેરાતના શૂટિંગ માટે આશરે 4થી 6 કરોડ રૂપિયા સુધીની ફી લે છે. જોકે, આ રકમ જાહેરાત અને કરાર પ્રમાણે બદલાઈ શકે છે.
જાહેરાતો ઉપરાંત ધોનીએ વિવિધ ક્ષેત્રોના સ્ટાર્ટઅપ્સમાં પણ રોકાણ કર્યું છે. તેમના રોકાણની યાદીમાં બ્લુસ્માર્ટ, ખાતાબુક, CARS24, ગરુડા એરોસ્પેસ, કૂકુ, લાઇટફ્યુરી ગેમ્સ અને સુપરહેલ્થ જેવી કંપનીઓનો સમાવેશ થાય છે.આ કંપનીઓ અલગ-અલગ ક્ષેત્રોમાં કામ કરે છે. ઉદાહરણ તરીકે, બ્લુસ્માર્ટ ઇલેક્ટ્રિક મોબિલિટી સાથે જોડાયેલું છે, ખાતાબુક ફિનટેક ક્ષેત્રમાં કામ કરે છે, જ્યારે ગરુડા એરોસ્પેસ ડ્રોન ટેક્નોલોજી ક્ષેત્રની કંપની છે.
આ ઉપરાંત ધોનીનું પોતાનું પ્રોડક્શન હાઉસ ‘ધોની એન્ટરટેઇનમેન્ટ’ પણ છે. તેમણે વર્ષ 2016માં ‘SEVEN’ નામની સ્પોર્ટ્સ અને લાઇફસ્ટાઇલ બ્રાન્ડ પણ શરૂ કરી હતી. આ વ્યવસાયો દ્વારા તેઓ ક્રિકેટથી અલગ પોતાની વ્યાવસાયિક ઓળખ મજબૂત બનાવી રહ્યા છે.

રાંચીમાં આલીશાન ફાર્મહાઉસથી લઈને લક્ઝરી કાર અને બાઇકનો શોખ
ધોનીને ક્રિકેટ ઉપરાંત મોંઘી કાર અને બાઇકનો પણ ખૂબ શોખ છે. રાંચીમાં તેમનું જાણીતું ‘કૈલાશપતિ’ ફાર્મહાઉસ આવેલું છે. આ ફાર્મહાઉસ અનેક એકરમાં ફેલાયેલું છે અને તેમાં સુંદર ગાર્ડન, આધુનિક જિમ, સ્વિમિંગ પૂલ તથા ટ્રેનિંગ માટેની ખાસ જગ્યાઓ છે.તેમના ગેરેજમાં 100થી વધુ મોટરસાઇકલ હોવાનો અહેવાલોમાં દાવો કરવામાં આવ્યો છે. તેમના બાઇક કલેક્શનમાં યામાહા RD 350, ડુકાટી 1098, કાવાસાકી નિન્જા H2 અને હાર્લી ડેવિડસન ફેટબોય જેવી બાઇક્સનો સમાવેશ થાય છે.
કારના કલેક્શનમાં ઓડી Q7, લેન્ડ રોવર, ફેરારી 599 GTO અને મર્સિડીઝ બેન્ઝ GLE જેવી લક્ઝરી કારનો ઉલ્લેખ કરવામાં આવે છે. આ ઉપરાંત રાંચીમાં તેમનું ‘માહી રેસિડેન્સી’ નામનું હોટેલ પણ છે.
