Sonia Gandhi Book Launch: રાહુલ ગાંધીએ પહેલીવાર કર્યો ‘ગર્લફ્રેન્ડ’નો ઉલ્લેખ, સંભળાવ્યો કેમ્બ્રિજની રેસ્ટોરન્ટનો રસપ્રદ કિસ્સો
કોંગ્રેસના સાંસદ અને લોકસભામાં વિપક્ષના નેતા રાહુલ ગાંધી સામાન્ય રીતે પોતાના અંગત જીવન વિશે જાહેરમાં વાત કરવાનું ટાળે છે. જોકે, સોમવારે તેમની માતા અને કોંગ્રેસ સંસદીય પક્ષનાં અધ્યક્ષ સોનિયા ગાંધીના પુસ્તકના વિમોચન કાર્યક્રમમાં તેમણે એક એવો કિસ્સો સંભળાવ્યો, જેણે સૌનું ધ્યાન ખેંચ્યું છે. રાહુલ ગાંધીએ પોતાના સંબોધન દરમિયાન પહેલીવાર પોતાની ‘ગર્લફ્રેન્ડ’નો ઉલ્લેખ કર્યો હતો. તેમણે કેમ્બ્રિજમાં અભ્યાસ દરમિયાન પોતાની ગર્લફ્રેન્ડ સાથે એક રેસ્ટોરન્ટમાં ગયાની યાદ તાજી કરી હતી. આ રેસ્ટોરન્ટ સાથે તેમના માતા-પિતાની એક ખાસ યાદ જોડાયેલી હતી. રાહુલ ગાંધીના આ હળવા અંદાજના કિસ્સાએ કાર્યક્રમમાં હાજર લોકોનું ધ્યાન ખેંચ્યું હતું.
સોમવારે દિલ્હીમાં સોનિયા ગાંધીના પુસ્તક ‘બિલોન્ગિંગ: અ જર્ની ઓફ લવ’ (Belonging: A Journey of Love)નું વિમોચન કરવામાં આવ્યું હતું. આ પ્રસંગે કોંગ્રેસ સહિત INDIA ગઠબંધનના અનેક નેતાઓ ઉપસ્થિત રહ્યા હતા. કાર્યક્રમ દરમિયાન રાહુલ ગાંધીએ પોતાની માતાના જીવન, માતા-પિતાના સંબંધો અને પરિવાર સાથે જોડાયેલી કેટલીક યાદો વિશે વાત કરી હતી.

રાહુલ ગાંધીએ ગર્લફ્રેન્ડ સાથે જોડાયેલો કયો કિસ્સો સંભળાવ્યો?
પોતાના સંબોધન દરમિયાન રાહુલ ગાંધીએ જણાવ્યું કે તેમના માતા-પિતા પહેલીવાર ‘વર્સિટી રેસ્ટોરન્ટ’ (Varsity Restaurant)માં મળ્યાં હતાં. આ વાત તેમના પરિવારમાં જાણીતી હતી. વર્ષો પછી જ્યારે તેઓ કેમ્બ્રિજમાં અભ્યાસ કરતા હતા, ત્યારે તેમણે પોતાની ગર્લફ્રેન્ડને આ રેસ્ટોરન્ટમાં જવાની વાત કરી હતી.રાહુલ ગાંધીએ કિસ્સો સંભળાવતા કહ્યું કે તેમણે પોતાની ગર્લફ્રેન્ડને કહ્યું હતું કે ચાલો, આપણે વર્સિટી રેસ્ટોરન્ટમાં જઈએ. તેઓ એ જગ્યા જોવા માંગતા હતા જ્યાં તેમના માતા-પિતાની પહેલી મુલાકાત થઈ હતી. ત્યારબાદ બંને રેસ્ટોરન્ટમાં ગયા અને ત્યાં બેસીને ભોજનનો ઓર્ડર આપવાની તૈયારી કરી.
રાહુલ ગાંધીએ આગળ જણાવ્યું કે જ્યારે વેઈટર મેનુ લઈને આવ્યો, ત્યારે તેમણે તેને કહ્યું કે તેમના માતા-પિતા આ જ રેસ્ટોરન્ટમાં મળ્યાં હતાં. આ વાત સાંભળીને વેઈટરે આશ્ચર્યજનક પ્રતિક્રિયા આપી. તેણે કહ્યું કે તે રાહુલના માતા-પિતાને ઓળખે છે અને જાણે છે કે તેઓ કોની વાત કરી રહ્યા છે.
આ કિસ્સો સંભળાવતી વખતે રાહુલ ગાંધીએ હળવા અંદાજમાં વાતાવરણને રસપ્રદ બનાવી દીધું હતું. તેમણે રેસ્ટોરન્ટની ખાસ વાનગી ‘ચિકન ચોસર’ (Chicken Chaucer)નો પણ ઉલ્લેખ કર્યો હતો. મજાકિયા અંદાજમાં તેમણે કહ્યું કે જો કોઈ પ્રેમમાં પડવા માંગતું હોય તો તેણે વર્સિટી રેસ્ટોરન્ટમાં જવું જોઈએ, પરંતુ ત્યાં ચિકન ચોસર મંગાવવાનું ટાળવું જોઈએ.
કાર્યક્રમ બાદ જ્યારે રાહુલ ગાંધીને તેમના ભાષણમાં કરેલા ‘ગર્લફ્રેન્ડ’ના ઉલ્લેખ વિશે પૂછવામાં આવ્યું, ત્યારે તેમણે સ્પષ્ટતા કરી હતી કે, “તે મારી એક મિત્ર છે.” આમ, તેમના આ નિવેદન બાદ પણ તેમણે સંબંધ વિશે કોઈ વધારાની વિગતો આપી નહોતી.
સોનિયા ગાંધીના પુસ્તકમાં પરિવાર અને પ્રેમની સફરની વાત
સોનિયા ગાંધીનું પુસ્તક ‘બિલોન્ગિંગ: અ જર્ની ઓફ લવ’ પણ આ કાર્યક્રમને કારણે ચર્ચામાં આવ્યું છે. પુસ્તકના વિમોચન પ્રસંગે રાહુલ ગાંધીએ જણાવ્યું હતું કે આ પુસ્તક તેમના માતા-પિતા વચ્ચેના પ્રેમ અને તેમની માતાના જીવનની મહત્વપૂર્ણ સફરને સમજવામાં મદદરૂપ બને છે.
પોતાનું પુસ્તક લખવા પાછળનું કારણ સમજાવતા સોનિયા ગાંધીએ કહ્યું હતું કે તેમના પરિવાર વિશે લાંબા સમયથી અનેક પ્રકારના દાવા અને વાતો કરવામાં આવી રહી હતી. તેમાં કેટલીક પાયાવિહોણી બાબતો પણ સામેલ હતી. આથી પોતાના જીવન અને પરિવાર સાથે જોડાયેલી હકીકતો સ્પષ્ટ કરવા માટે તેમણે પુસ્તક લખવાનો નિર્ણય લીધો હતો.
#WATCH | Delhi | When asked about the mention of his ‘girlfriend’ in his speech at the launch of his mother and CPP Chairperson Sonia Gandhi’s memoir, ‘Belonging: A Journey of Love’, Lok Sabha LoP Rahul Gandhi said, “She is a friend of mine” https://t.co/NJlxizWXvy
— ANI (@ANI) November 16, 2026
આ પુસ્તકમાં તેમના જીવનના અનુભવો, પરિવાર સાથે જોડાયેલી યાદો અને જીવનની વિવિધ પરિસ્થિતિઓને રજૂ કરવામાં આવી છે. વિમોચન કાર્યક્રમમાં અનેક રાજકીય નેતાઓ અને જાણીતા મહેમાનોની હાજરીએ પણ આ પ્રસંગને ખાસ બનાવ્યો હતો.
પુસ્તક વિમોચનમાં અમરિંદર સિંહની હાજરી પણ ચર્ચામાં
સોનિયા ગાંધીના પુસ્તક વિમોચન કાર્યક્રમમાં પંજાબના ભૂતપૂર્વ મુખ્યમંત્રી અને ભાજપના નેતા કેપ્ટન અમરિંદર સિંહ પણ ઉપસ્થિત રહ્યા હતા. તેઓ કાર્યક્રમમાં પ્રથમ હરોળમાં બેઠેલા જોવા મળ્યા હતા. તેમણે સોનિયા ગાંધીના પુસ્તકની પ્રશંસા પણ કરી હતી.જોકે, તેમની હાજરીને લઈને રાજકીય અટકળો શરૂ થાય તે પહેલાં અમરિંદર સિંહે કોંગ્રેસમાં પાછા ફરવાની કોઈપણ શક્યતાને નકારી કાઢી હતી. તેમણે સ્પષ્ટ કર્યું હતું કે કાર્યક્રમમાં તેમની હાજરી રાજકીય કારણોસર નહીં, પરંતુ અંગત અને પારિવારિક સંબંધોના કારણે હતી.
