વર્લ્ડ એથ્લેટિક્સ U20 ચેમ્પિયનશિપમાં ભારતનો ડંકો: હાઈ જમ્પમાં બસંત મેઘવાલે સિલ્વર જીતી રચ્યો ઇતિહાસ, શાહનવાઝને મળ્યો બ્રોન્ઝ
વર્લ્ડ એથ્લેટિક્સ U20 ચેમ્પિયનશિપમાં ભારતના યુવા ખેલાડીઓએ અદ્ભુત પ્રદર્શન કરીને વૈશ્વિક મંચ પર દેશનું નામ રોશન કર્યું છે. એક જ દિવસમાં ભારતીય એથ્લેટ્સ દ્વારા બે-બે મેડલ જીતીને ઇતિહાસના પાના પર એક નવો માઇલસ્ટોન અંકિત કરી દેવાયો છે. રાજસ્થાનના ૧૯ વર્ષીય બસંત કુમાર મેઘવાલે પુરુષોની હાઈ જમ્પ (ઊંચી કૂદ) સ્પર્ધામાં સિલ્વર મેડલ મેળવીને ઐતિહાસિક સિદ્ધિ હાંસલ કરી છે. આ સાથે જ પુરુષોની લાંબી કૂદ (લોંગ જમ્પ) માં શાહનવાઝ ખાને પોતાના શાનદાર કૂદકાથી બ્રોન્ઝ મેડલ પોતાના નામે કર્યો છે.
હાઈ જમ્પમાં ભારતને મળ્યો પ્રથમ વર્લ્ડ U20 મેડલ
રાજસ્થાનના શ્રી ગંગાનગર જિલ્લાના સીમાવર્તી શહેર અનુપગઢના રહેવાસી બસંત કુમાર મેઘવાલ હાલમાં ભારતીય નૌકાદળ (Indian Navy) નું પ્રતિનિધિત્વ કરે છે. બસંતે આંતરરાષ્ટ્રીય સ્તરની સ્પર્ધામાં ૨.૨૧ મીટરની ઊંચાઈ પાર કરીને પોતાનું વ્યક્તિગત શ્રેષ્ઠ (Personal Best) પ્રદર્શન કર્યું. આ સિલ્વર મેડલ સાથે જ તે વર્લ્ડ U20 ચેમ્પિયનશિપના ઇતિહાસમાં હાઈ જમ્પ સ્પર્ધામાં મેડલ જીતનાર પ્રથમ ભારતીય એથ્લેટ બની ગયો છે.
આ ફાઇનલ મુકાબલો અત્યંત રોમાંચક રહ્યો હતો. ગોલ્ડ મેડલ જીતનાર અલ્જેરિયાના યુનેસ અયાચી, સિલ્વર જીતનાર ભારતના બસંત મેઘવાલ અને બ્રોન્ઝ જીતનાર ગ્રેટ બ્રિટનના ઓટિસ પૂલે આ ત્રણેય ખેલાડીઓએ ૨.૨૧ મીટરનો કૂદકો સફળતાપૂર્વક પાર કરી લીધો હતો. પરંતુ જ્યારે બાર ૨.૨૪ મીટર પર મુકવામાં આવ્યો, ત્યારે ત્રણેય ખેલાડીઓ પોતાના ત્રણેય પ્રયાસોમાં અસફળ રહ્યા હતા.
આ પરિસ્થિતિમાં મેડલનો નિર્ણય “કાઉન્ટબેક” (Countback) ના નિયમ આધારે લેવામાં આવ્યો હતો. આ નિયમ મુજબ, અગાઉની ઊંચાઈ પાર કરવા માટે કયા ખેલાડીએ કેટલા પ્રયાસો લીધા તે જોવામાં આવે છે. અલ્જેરિયાના અયાચીએ પોતાના પ્રથમ પ્રયાસમાં જ ૨.૨૧ મીટરની ઊંચાઈ પાર કરી લીધી હોવાથી તેને ગોલ્ડ મેડલ મળ્યો. ભારતના બસંતે પોતાના બીજા પ્રયાસમાં આ સિદ્ધિ મેળવી હોવાથી તેના ફાળે સિલ્વર મેડલ આવ્યો, જ્યારે બ્રિટનના ઓટિસ પૂલે ત્રીજા પ્રયાસમાં સફળ થતાં તેને બ્રોન્ઝ મેડલથી સંતોષ માનવો પડ્યો.
શાહનવાઝ ખાને લોંગ જમ્પમાં મેળવ્યો બ્રોન્ઝ મેડલ
બસંત મેઘવાલની આ ઐતિહાસિક સફળતાની ક્ષણો ચાલી જ રહી હતી ત્યાં ૧૮ વર્ષીય શાહનવાઝ ખાને પણ દેશને વધુ એક ખુશીનો મોકો આપ્યો. શાહનવાઝે પુરુષોની લોંગ જમ્પ સ્પર્ધામાં બ્રોન્ઝ મેડલ જીતીને ભારતની મેડલ ટેલીમાં વધુ એક મેડલ ઉમેર્યો હતો.
શાહનવાઝે ફાઇનલમાં પોતાની શાનદાર છલાંગ લગાવતા ત્રીજા પ્રયાસમાં ૭.૮૪ મીટરનો કૂદકો માર્યો હતો. તેની છ પ્રયાસોની શ્રેણી અનુક્રમે ૭.૬૭ મીટર, ૭.૭૨ મીટર, ૭.૮૪ મીટર, ૭.૫૨ મીટર, ૭.૮૩ મીટર અને ૫.૩૭ મીટર રહી હતી.
Shahnavaz Khan has made history at the World Athletics U20 Championships 2026 in Oregon, USA, winning Bronze in Men’s Long Jump with a superb 7.84m leap! 🏟️👏
This marks India’s first-ever medal in Men’s Long Jump at a World-level event! 🇮🇳🥉
A historic jump. A landmark moment.… pic.twitter.com/PpEPq9PnWI
— SAI Media (@Media_SAI) August 9, 2026
આ જ સ્પર્ધામાં ભારતનો અન્ય એક યુવા ખેલાડી, આરસી જીતિન અર્જુનન પણ ફાઇનલમાં રમતો જોવા મળ્યો હતો. જીતિને પોતાના પહેલા અને ચોથા પ્રયાસમાં ૭.૫૯ મીટરનો શ્રેષ્ઠ કૂદકો લગાવીને આઠમું સ્થાન પ્રાપ્ત કર્યું હતું. લોંગ જમ્પમાં ઇટાલીના ડેનિયલ ઇન્ઝોલીએ ૭.૯૭ મીટરની છલાંગ સાથે ગોલ્ડ અને ઓસ્ટ્રેલિયાના મેસન મેકગ્રુડરે ૭.૯૬ મીટર સાથે સિલ્વર મેડલ મેળવ્યો હતો.
મેડલ વિજેતા ઓવરવ્યુ:
બસંત મેઘવાલ (હાઈ જમ્પ): ૨.૨૧ મીટર – સિલ્વર મેડલ
શાહનવાઝ ખાન (લોંગ જમ્પ): ૭.૮૪ મીટર – બ્રોન્ઝ મેડલ
ચેમ્પિયનશિપમાં ભારતનો દબદબો
આ ચેમ્પિયનશિપમાં ભારતે તેના મેડલનું ખાતું ૭ ઓગસ્ટના રોજ જ ખોલી દીધું હતું. ભારતના આશાસ્પદ ભાલા ફેંકનાર (Javelin Thrower) આશિષ યાદવે પુરુષોની જેવલિન થ્રો સ્પર્ધામાં સિલ્વર મેડલ જીતીને શાનદાર શરૂઆત કરાવી હતી. આશિષ યાદવ પહેલા માત્ર નીરજ ચોપરા જ વર્લ્ડ U20 માં જેવલિન થ્રોમાં મેડલ જીતી શક્યા હતા, અને આશિષ આ સિદ્ધિ મેળવનારો બીજો ભારતીય બન્યો હતો.
