અરવિંદ કેજરીવાલના નિવેદન પર રાજકીય ધમાસાણ: ભાજપે કહ્યું – ‘આ નૈતિક અને ભાષાકીય નાદારી છે’
આમ આદમી પાર્ટીના રાષ્ટ્રીય સંયોજક અરવિંદ કેજરીવાલ દ્વારા વડાપ્રધાન નરેન્દ્ર મોદી અંગે કરવામાં આવેલા એક કથિત વિવાદાસ્પદ નિવેદનને કારણે દિલ્હી સહિત દેશના રાજકારણમાં નવો વિવાદ ઊભો થયો છે. ભારતીય જનતા પાર્ટીએ અરવિંદ કેજરીવાલનો એક વીડિયો સોશિયલ મીડિયા પર જાહેર કરીને તેમના પર આકરા પ્રહારો કર્યા છે. ભાજપનો આરોપ છે કે સીજેપી (CJP) ના વિરોધ પ્રદર્શન અંગે વાત કરતી વખતે કેજરીવાલે અત્યંત નીચલી કક્ષાની વિચારસરણીનું પ્રદર્શન કર્યું છે.
દિલ્હી ભાજપના નેતા અને મંત્રી કપિલ મિશ્રાએ અરવિંદ કેજરીવાલના આ નિવેદન સામે સખત વાંધો ઉઠાવતા જણાવ્યું હતું કે, દેશના ત્રણ વખત લોકશાહી ઢબે ચૂંટાયેલા વડાપ્રધાન નરેન્દ્ર મોદી વિશે અરવિંદ કેજરીવાલ જે માઓવાદી ભાષાનો ઉપયોગ કરી રહ્યા છે, તે કોઈ બળવાખોર ક્રાંતિનું પ્રતીક નથી પરંતુ તેમની નૈતિક અને ભાષાકીય નાદારી દર્શાવે છે.
કપિલ મિશ્રાએ વધુમાં ઉમેર્યું હતું કે, જે માણસને દિલ્હીની જનતાએ સત્તામાંથી બહાર ફેંકી દીધો અને પંજાબમાંથી પણ જેમને નકારવામાં આવી રહ્યા છે, તેઓ હવે ભારે હતાશા અને નિરાશામાં આવીને દેશના વડાપ્રધાન વિરુદ્ધ આવી હિંસક અને મર્યાદાહીન ભાષાનો પ્રયોગ કરી રહ્યા છે.
દેશની જનતા પીએમ મોદી સાથે છે: ભાજપ
આ મુદ્દા પર વધુ વાત કરતા કપિલ મિશ્રાએ સ્પષ્ટ કર્યું કે દેશની જનતા વડાપ્રધાન નરેન્દ્ર મોદીની વિકાસલક્ષી રાષ્ટ્રીય નીતિઓ અને દેશહિતના કાર્યો સાથે મજબૂતીથી ઊભી છે. તેમણે કહ્યું કે જનતા કોઈ ઘમંડ કે હિંસક મનોવૃત્તિ સાથે નહીં પરંતુ દેશના વિકાસ માટે ભાજપ અને વડાપ્રધાનની સાથે જોડાયેલી છે. આ રાષ્ટ્રીય ગઠબંધન અને જનતાનો વિશ્વાસ ભવિષ્યમાં પહેલાં કરતાં પણ વધુ મજબૂતાઈ સાથે આગળ વધશે.
દિલ્હી ભાજપનો સીજેપી મુદ્દે દાવો
આ વિવાદ વચ્ચે દિલ્હી ભાજપે પોતાના અધિકૃત સોશિયલ મીડિયા એકાઉન્ટ પરથી પોસ્ટ કરીને દાવો કર્યો છે કે, આ નિવેદનથી એ સાબિત થઈ ગયું છે કે સીજેપીના વાસ્તવિક માલિક પોતે અરવિંદ કેજરીવાલ જ છે. ભાજપે આક્ષેપ કર્યો કે કેજરીવાલે પોતે જ આ વાતનો સ્વીકાર કર્યો છે કે સીજેપીના વિરોધ પ્રદર્શનમાં રસ્તા પર ઉતરેલા લોકો હિંસક માનસિકતા ધરાવતા હતા.
રાજકીય વિશ્લેષકોના મતે, આગામી દિવસોમાં આ વિવાદાસ્પદ નિવેદન અને સોશિયલ મીડિયા પર વાયરલ થઈ રહેલા વીડિયોને કારણે આમ આદમી પાર્ટી અને ભાજપ વચ્ચેની રાજકીય ખેંચતાણ વધુ તીવ્ર બનવાની પૂરેપૂરી શક્યતા છે.
