બંગાળમાં જાહેર સ્થળો પર નમાજ પ્રતિબંધ અંગે CM શુભેન્દુ અધિકારી આકરા પાણીએ: કહ્યું- ‘હું AC રૂમમાં બેસીને તમાશો નહીં જોઉં’
પશ્ચિમ બંગાળની રાજનીતિ અને કાયદો-વ્યવસ્થાની સ્થિતિમાં અત્યારે એક બહુ મોટો વળાંક આવ્યો છે. રાજ્યના મુખ્યમંત્રી શુભેન્દુ અધિકારીએ સ્પષ્ટ શબ્દોમાં ચેતવણી આપી છે કે, પોલીસકર્મીઓ અને સુરક્ષા દળો પર હુમલા તેમજ જાહેર મિલકતોની તોડફોડની ઘટનાઓ કોઈપણ સંજોગોમાં ચલાવી લેવામાં આવશે નહીં. તેમણે તોફાની તત્વોને આકરા શબ્દોમાં લલકારતા કહ્યું છે કે, આવા મામલાઓમાં કડક કાનૂની કાર્યવાહી કરવામાં આવશે અને જો ભવિષ્યમાં આવી ઘટનાઓનું પુનરાવર્તન થશે, તો મારાથી ખરાબ કોઈ નહીં હોય.
વાસ્તવમાં, પશ્ચિમ બંગાળ સરકાર દ્વારા સાર્વજનિક અને જાહેર સ્થળો પર નમાજ પઢવા પર પ્રતિબંધ લાદવામાં આવ્યો હતો. આ આદેશ બાદ જ્યારે કોલકાતાના સર્કસ પાર્ક વિસ્તારમાં ગેરકાયદેસર અતિક્રમણ (દબાણ) હટાવવાની ઝુંબેશ શરૂ કરવામાં આવી, ત્યારે સ્થાનિક વસ્તીના એક વર્ગે પોલીસ અને પ્રશાસન પર અચાનક પથ્થરમારો શરૂ કરી દીધો હતો. આ હિંસક ઘટનામાં કેટલાક ઉચ્ચ અધિકારીઓ અને જવાનો ઘાયલ થયા હતા તેમજ સરકારી વાહનોને ભારે નુકસાન પહોંચ્યું હતું. આ ઘટના પર રોષ વ્યક્ત કરતા સીએમ શુભેન્દુ અધિકારીએ કહ્યું કે, એક જમાનામાં જમ્મુ-કાશ્મીરમાં જેવી પથ્થરબાજીની સંસ્કૃતિ ચાલતી હતી, તેવી સંસ્કૃતિ પશ્ચિમ બંગાળમાં હવે ક્યારેય ચાલવા દેવામાં આવશે નહીં.
લઘુમતી વિસ્તારોમાં થયેલા પથ્થરમારામાં CRPF અને પોલીસના ૮ જવાનો ઘાયલ
મુખ્યમંત્રી શુભેન્દુ અધિકારીએ હિંસાની વિગતો આપતા જણાવ્યું કે, ભીડ દ્વારા કરવામાં આવેલા પથ્થરમારામાં ફરજ પર તૈનાત છ પોલીસકર્મીઓ અને કેન્દ્રીય અર્ધલશ્કરી દળ (CRPF) ના બે જવાનો ગંભીર રીતે ઘાયલ થયા છે. તેમણે કડક લહેજામાં કહ્યું કે, કાયદો હાથમાં લેનારા તત્વો સામે તાત્કાલિક એક્શન લેવામાં આવ્યા છે અને અત્યાર સુધીમાં ૪૦ થી વધુ તોફાનીઓની ધરપકડ કરી લેવામાં આવી છે. આ સમગ્ર હિંસા અને તોડફોડના કેસની તપાસની દેખરેખ સીધી પોલીસ કમિશનર દ્વારા કરવામાં આવી રહી છે.
સીએમ શુભેન્દુએ કહ્યું, ‘હું રાજ્યના દરેક નાગરિકને અને ખાસ કરીને અસામાજિક તત્વોને એક સ્પષ્ટ અને આકરો સંદેશ આપવા માંગુ છું કે બંગાળની ધરતી પર હવે અશાંતિ, ગુંડાગર્દી, રાષ્ટ્રવિરોધી કે સમાજવિરોધી પ્રવૃત્તિઓ માટે કોઈ સ્થાન નથી. અમે આવી બાબતોને બિલકુલ સહન નહીં કરીએ અને આવી માનસિકતાને જડમૂળથી ઉખાડી ફેંકીશું.’
‘હું AC માં બેસી રહેનારો નેતા નથી’: અગાઉની તૃણમૂલ સરકાર પર પ્રહારો
હિંસાની પરિસ્થિતિ વચ્ચે પણ ભારે સંયમ અને ધીરજ દાખવવા બદલ મુખ્યમંત્રીએ પશ્ચિમ બંગાળ પોલીસ અને કેન્દ્રીય દળોની મુક્તકંઠે પ્રશંસા કરી હતી. તેમણે કહ્યું કે, ઉશ્કેરણીજનક ભીડ સામે પણ આપણા જવાનોએ કાયદાની મર્યાદામાં રહીને કામ કર્યું છે. આ સાથે જ અગાઉની તૃણમૂલ કોંગ્રેસ (TMC) ની સરકાર પર આડકતરો નિશાનો સાધતા શુભેન્દુ અધિકારીએ કહ્યું કે, ‘તે દિવસો હવે વીતી ગયા છે જ્યારે ઓન-ડ્યુટી પોલીસકર્મીઓ રસ્તા પર લોહીલુહાણ થતા હતા અને સત્તામાં બેઠેલા મંત્રીઓ એર-કંડિશન્ડ (AC) રૂમમાં બેસીને તમાશો જોતા હતા. હું એસી ઓફિસમાં ભરાઈ રહેનારો મુખ્યમંત્રી નથી, હું પોતે ગ્રાઉન્ડ પર નજર રાખું છું.’
તેમણે પોલીસ દળનો આત્મવિશ્વાસ વધારતા કહ્યું કે, ‘કોઈપણ ગુનેગાર કે તોફાની તત્વ એવું ન વિચારે કે બંગાળમાં હજુ પણ જૂના નિયમો જ લાગુ પડે છે. જો કોઈ ભ્રમમાં જીવતું હોય કે પોલીસના હાથ-પગ કાયદાકીય રીતે બાંધેલા રહેશે અને તેઓ મૂકપ્રેક્ષક બની રહેશે, તો તેઓ બહુ મોટી ભૂલ કરી રહ્યા છે.’
કાશ્મીરની જેમ કોલકાતામાં પણ પથ્થરમારો કાયમ માટે બંધ થશે
મુખ્યમંત્રીએ લોકશાહી અને ધાર્મિક સ્વતંત્રતાની મર્યાદાઓ સ્પષ્ટ કરતા કહ્યું કે, દેશમાં કોઈપણ રાજકીય કે ધાર્મિક સંગઠનને પોતાના કાર્યક્રમો યોજવાનો ચોક્કસ અધિકાર છે, પરંતુ તેના માટે તેમણે સૌપ્રથમ સ્થાનિક પોલીસ પ્રશાસનને લેખિતમાં જાણ કરવી પડશે અને મંજૂરી લેવી પડશે. કાયદાકીય મંજૂરી વિના અચાનક હજારોની ભીડ ભેગી કરવી, ઉશ્કેરણીજનક ધાર્મિક સૂત્રોચ્ચારો કરવા અને કાયદો જાળવતા જવાનો પર પથ્થર ફેંકવા—આ બધું હવે બંગાળમાં સદંતર બંધ થશે.
તેમણે જમ્મુ-કાશ્મીરનું ઉદાહરણ આપતા ઉમેર્યું કે, ‘એક સમયે શ્રીનગર અને કાશ્મીર ખીણમાં સુરક્ષા દળો પર પથ્થરમારો કરવો એક ફેશન બની ગઈ હતી, પરંતુ આજે ત્યાં પથ્થરમારો સંપૂર્ણપણે બંધ થઈ ગયો છે. મને પૂરો ભરોસો છે કે પશ્ચિમ બંગાળ અને કોલકાતાની શેરીઓમાં પણ આ પથ્થરબાજીની સંસ્કૃતિનો કાયમ માટે અંત આવી જશે.’
પથ્થરબાજો સામે એક્શન લેતા પહેલા પોલીસે પાંચ વાર વિચારવાની જરૂર નથી
બંગાળના મુખ્યમંત્રીએ પોલીસ તંત્રને ફ્રી-હેન્ડ (સંપૂર્ણ સત્તા) આપતા સ્પષ્ટ આદેશ કર્યો છે કે, આવી અચાનક ઉભી થતી હિંસક પરિસ્થિતિઓ સામે કડક હાથે કામ લેવામાં આવે. જ્યારે લોકો ધાર્મિક નારા લગાવીને અચાનક પથ્થરમારો કરવા લાગે, ત્યારે તે ધર્મ કે સંપ્રદાયનો વિષય નથી રહેતો પરંતુ કાયદો અને વ્યવસ્થાનો ભંગ બને છે, જે કોઈપણ સભ્ય સમાજમાં ચલાવી શકાય નહીં. જમ્મુ-કાશ્મીરમાંથી કલમ ૩૭૦ હટાવ્યા બાદ જેમ ત્યાં શાંતિ સ્થપાઈ છે, તેમ હવે કોલકાતા અને સમગ્ર પશ્ચિમ બંગાળમાં પથ્થરમારાની ઘટનાઓને જડબાતોડ જવાબ આપવાનો અને તેને કાયમ માટે રોકવાનો સમય આવી ગયો છે.
અધિકારીએ પોલીસ અધિકારીઓને સંબોધતા કહ્યું, ‘કોઈપણ હિંસક ભીડ કે તોફાનીઓ સામે કાયદેસરની કાર્યવાહી કરતા પહેલા પોલીસે પાંચ વખત વિચારવાની કે કોઈના આદેશની રાહ જોવાની બિલકુલ જરૂર નથી. કાયદો લાગુ કરતી વખતે એ ન જુઓ કે સામેવાળી વ્યક્તિ કઈ રાજકીય પાર્ટીની છે, કયા ધર્મની છે કે કયા સમુદાય સાથે સંબંધ ધરાવે છે. ગુનો કરનાર માત્ર ગુનેગાર છે, અને તેની સામે દેશના સંવિધાન અને કાયદા અનુસાર સૌથી કડક પગલાં ભરો.’ મુખ્યમંત્રીના આ આકરા તેવરથી સ્પષ્ટ થાય છે કે આગામી દિવસોમાં બંગાળમાં તુષ્ટિકરણની રાજનીતિને બદલે કાયદાનું શાસન સ્થાપવા માટે સરકાર કોઈ બાંધછોડ કરવાના મૂડમાં નથી.
