મોબાઈલ યુઝર્સને 2026નો મોટો ઝટકો: Vi અને Airtelએ છૂપી રીતે ભાવ વધાર્યા, હવે 5G અને ઇન્ટરનેશનલ રોમિંગ મોંઘા પડશે
ભારતીય ટેલિકોમ સેક્ટરમાં વર્ષ 2026ની શરૂઆત મોબાઈલ યુઝર્સ માટે મોંઘવારીના સમાચાર લઈને આવી છે. દેશની બે મોટી ટેલિકોમ કંપનીઓ, ભારતી એરટેલ (Airtel) અને વોડાફોન-આઈડિયા (Vi) એ પસંદગીના પ્લાન્સની કિંમતોમાં વધારો કરીને ટેરિફ હાઈકના સંકેત આપી દીધા છે. ખાસ વાત એ છે કે આ વખતે કંપનીઓએ સામાન્ય પ્રીપેડ પ્લાન્સના બદલે 5G એક્સેસ અને ઇન્ટરનેશનલ રોમિંગ (IR) જેવા પ્રીમિયમ સેગમેન્ટને નિશાન બનાવ્યા છે.
Vi યુઝર્સ માટે ‘સસ્તું’ 5G ખતમ
વોડાફોન-આઈડિયાએ અનેક સર્કલોમાં પોતાના સૌથી સસ્તા અનલિમિટેડ 5G એન્ટ્રી-લેવલ પ્લાનની કિંમત વધારી દીધી છે. પહેલા જ્યાં યુઝર્સને ₹299ના પ્લાનમાં અનલિમિટેડ 5Gનો લાભ મળતો હતો, હવે તેના માટે ₹349 ખર્ચવા પડશે.
- પ્રભાવિત ક્ષેત્રો: મુંબઈ, દિલ્હી, ગુજરાત, હરિયાણા, કર્ણાટક, બિહાર, પંજાબ અને રાજસ્થાન જેવા સર્કલોમાં હવે ₹349નો પ્લાન જ અનલિમિટેડ 5G માટે સૌથી સસ્તો વિકલ્પ છે.
- પ્લાનના લાભ: ₹349વાળા આ નવા પ્લાનમાં યુઝર્સને 28 દિવસ માટે દરરોજ 1.5GB ડેટા, અનલિમિટેડ વોઈસ કોલિંગ અને 100 SMS મળે છે.
- રાહતના સમાચાર: કંપની હજુ પણ પોતાની એપ (Vi App) દ્વારા કેટલાક પસંદગીના યુઝર્સને ₹299માં વિશેષ ઓફર આપી રહી છે.
Airtelએ ઇન્ટરનેશનલ રોમિંગ કર્યું મોંઘું
એરટેલે પણ પોતાના પ્રીમિયમ ગ્રાહકોને ઝટકો આપતા ઇન્ટરનેશનલ રોમિંગ પેકની કિંમતોમાં મોટો વધારો કર્યો છે.
- ગ્લોબલ પેક: એરટેલનો એક વર્ષ (365 દિવસ)ની વેલિડિટી વાળો ગ્લોબલ ઇન્ટરનેશનલ રોમિંગ પેક હવે ₹4,000ના બદલે ₹4,999નો થઈ ગયો છે, જે સીધો જ 25%નો વધારો છે.
- અન્ય પેક: આ ઉપરાંત 1 દિવસ, 5 દિવસ અને 10 દિવસવાળા રોમિંગ પેકની કિંમતોમાં પણ ₹20થી ₹100 સુધીનો વધારો કરવામાં આવ્યો છે. જોકે, તેના ફાયદાઓ (Benefits)માં કોઈ ફેરફાર થયો નથી.
રણનીતિમાં ફેરફાર: દેકારાને બદલે ‘સાઈલન્ટ’ હાઈક
નિષ્ણાતોનું માનવું છે કે આ વખતે ટેલિકોમ કંપનીઓની રણનીતિ અલગ છે. 2026માં કંપનીઓ ‘પ્રાઈસ ઈલાસ્ટિસિટી’ (કિંમત સહન કરવાની ક્ષમતા)નું પરીક્ષણ કરી રહી છે.
- કંપનીઓએ એવા સેગમેન્ટ પસંદ કર્યા છે જ્યાં ગ્રાહકો કિંમતો પ્રત્યે ઓછા સંવેદનશીલ હોય, જેમ કે 5Gના શરૂઆતી યુઝર્સ અને વિદેશ પ્રવાસ કરતા બિઝનેસ પ્રોફેશનલ્સ.
- આ એ વાતનો સંકેત છે કે આગામી સમયમાં મુખ્ય પ્રીપેડ પ્લાન્સની કિંમતોમાં પણ ધીમે-ધીમે વધારો જોવા મળી શકે છે.
BSNLએ પણ વેલિડિટી ઘટાડી
માત્ર ખાનગી કંપનીઓ જ નહીં, પરંતુ સરકારી ટેલિકોમ કંપની BSNLએ પણ પોતાના લોકપ્રિય ₹107વાળા પ્રીપેડ પ્લાનની વેલિડિટી ઘટાડીને ટેરિફ વધારાના સંકેત આપ્યા છે.
5G નેટવર્ક વિસ્તાર અને AI ટેકનોલોજીમાં કરવામાં આવી રહેલા ભારે રોકાણને કારણે આવક સુધારવાની (Revenue Realisation) જરૂરિયાત વધી ગઈ છે. એવામાં ગ્રાહકોએ આગામી મહિનાઓમાં મોબાઈલ બિલમાં વધુ વધારા માટે તૈયાર રહેવું જોઈએ.
