સરકાર દ્વારા ટુ-વ્હીલરમાં હેન્ડલબાર સેન્સર ફરજિયાત કરવાની તૈયારી
દેશમાં બેદરકારીપૂર્વક અને સ્ટંટ કરીને વાહન હંકારવાની ટેવને કારણે દર વર્ષે હજારો લોકો જીવ ગુમાવે છે. ખાસ કરીને ટુ-વ્હીલર ચાલકો દ્વારા મોબાઇલ ફોનનો ઉપયોગ અને એક હાથે બાઇક ચલાવવાની પ્રવૃત્તિ અકસ્માતોનું મુખ્ય કારણરૂપ બની રહી છે. દંડ વધારવા અને કડક ટ્રાફિક અમલીકરણ છતાં પરિસ્થિતિમાં ખાસ સુધારો જોવા મળ્યો નથી. આ પરિસ્થિતિમાં સરકાર હવે ટેકનોલોજીનો સહારો લઈને સુરક્ષા વધારવાનો પ્રયાસ કરી રહી છે.
ટુ-વ્હીલરમાં હેન્ડલબાર સેન્સર લગાવવાનો પ્રસ્તાવ
અહેવાલ મુજબ, કેન્દ્ર સરકાર ઇચ્છે છે કે નવા ટુ-વ્હીલર મોડલોમાં બંને હેન્ડલબાર પર ટચ અથવા પ્રેશર સેન્સર લગાવવામાં આવે. આ સેન્સર સવારના બંને હાથ હેન્ડલબાર પર છે કે નહીં તે સતત ચકાસશે. જો સવાર 7 થી 8 સેકન્ડ સુધી હેન્ડલબાર છોડે તો બાઇક આપમેળે ધીમું થવા લાગે. આથી સવારને ફરીથી સ્ટીયરિંગ પર પકડ મજબૂત કરવાની ફરજ પડે અને જોખમ ઘટે. સરકારે આ બાબતે અનેક કંપનીઓ સાથે બેઠક પણ યોજી છે.
આંકડા ચોંકાવનારા: ટુ-વ્હીલર અકસ્માતોમાં મોટો વધારો
સરકારી રિપોર્ટ દર્શાવે છે કે છેલ્લા કેટલાક વર્ષોમાં ટુ-વ્હીલર સાથે જોડાયેલા અકસ્માતો સતત વધી રહ્યા છે. 2021માં 69,385 મોત નોંધાયા હતા, જ્યારે 2023માં આ આંકડો વધી 77,539 થયો. દેશના કુલ રોડ અકસ્માત મૃત્યુમાં ટુ-વ્હીલર અકસ્માતોનું પ્રમાણ લગભગ 45 ટકા છે. માત્ર 2023માં જ બેદરકારીપૂર્વક ચલાવેલી બાઇક અને સ્કૂટરોએ 48,000થી વધુ લોકોના જીવ લઈ લીધા. આ પરિસ્થિતિએ સરકારને ગંભીર પગલાં લેવાની જરૂરિયાત ઉભી કરી છે.
મોબાઇલ ઉપયોગ અને એક હાથે ડ્રાઇવિંગ સૌથી મોટો પડકાર
વાહન વ્યવહાર મંત્રાલયના અધિકારીઓ માને છે કે યુવાનોમાં ખાસ કરીને મોબાઇલ ઉપયોગ કરતી વખતે ડ્રાઇવિંગ કરવાની પ્રવૃત્તિ ઝડપથી વધી રહી છે. એક હાથે બાઇક ચલાવવાથી નિયંત્રણ ગુમાવવાની શક્યતા વધુ રહે છે અને અકસ્માતો થતાં રહે છે. અધિકારીઓનો મત છે કે જો વાહનમાં જ એવી વ્યવસ્થા બનાવાઈ જાય કે બેદરકારીનો સંકેત મળતા જ તે ગતિ ઓછી કરી દે, તો આવી ખતરનાક પ્રવૃત્તિઓમાં મોટો ઘટાડો થઈ શકે છે.
