ChatGPT ની પ્રાઇવેટ ચેટ્સ હવે રહેશે સુરક્ષિત: OpenAI એ લૉન્ચ કર્યું શાનદાર ‘ચેટ લૉક’ ફીચર, જાણો ઉપયોગ કરવાની રીત
આર્ટિફિશિયલ ઈન્ટેલિજન્સ (AI) ની દુનિયામાં દરરોજ નવા બદલાવો અને ફીચર્સ આવી રહ્યા છે. આ જ ક્રમમાં, લોકપ્રિય AI પ્લેટફોર્મ OpenAI એ તેના યૂઝર્સની પ્રાઈવસીને વધુ મજબૂત બનાવવા માટે એક અત્યંત ઉપયોગી ફીચર રજૂ કર્યું છે. હવે યૂઝર્સ ChatGPT પર પોતાની અંગત અને ખાનગી ચેટ્સને સુરક્ષિત રાખવા માટે તેને લૉક કરી શકશે. “Locked Chats” તરીકે ઓળખાતું આ નવું ફીચર ખાસ કરીને એવા લોકો માટે વરદાન સાબિત થશે જેઓ પોતાનો સ્માર્ટફોન કે લેપટોપ અન્ય લોકો સાથે શેર કરે છે અથવા ઓફિસ-મીટિંગ્સ દરમિયાન વારંવાર પોતાની સ્ક્રીન શેર કરતા હોય છે.
શું છે આ ‘ચેટ લૉક’ ફીચર અને તેના ફાયદા?
જ્યારે તમે ChatGPT પર કોઈ ચેટને લૉક કરી દો છો, ત્યારે તે તમારી સામાન્ય ચેટ હિસ્ટ્રી, પિન કરેલી ચેટ્સ (Pinned Chats) કે સામાન્ય સર્ચ પરિણામોમાં બિલકુલ દેખાતી નથી. આ લૉક કરેલી ચેટ્સને જોવા અથવા વાંચવા માટે યૂઝર્સે ખાસ “Locked Chats” સેક્શનમાં જવું પડે છે અને પોતાનો એકાઉન્ટ પિન (PIN) દાખલ કરવો પડે છે.
આ ફીચર ChatGPT ના તમામ પ્રકારના પ્લાન્સનો ઉપયોગ કરતા યૂઝર્સ માટે ઉપલબ્ધ છે, જેમાં ફ્રી (Free), પ્લસ (Plus), પ્રો (Pro), બિઝનેસ અને એજ્યુકેશન પ્લાનનો પણ સમાવેશ થાય છે. આ ઉપરાંત, કેટલાક સપોર્ટેડ સ્માર્ટફોન પર આ ચેટ્સને ખોલવા માટે બાયોમેટ્રિક ઓથેન્ટિકેશન (જેમ કે ફેસ આઈડી – Face ID અથવા ટચ આઈડી – Touch ID) નો ઉપયોગ પણ કરી શકાય છે.
ChatGPT માં ચેટ કેવી રીતે લૉક કરવી? (સ્ટેપ-બાય-સ્ટેપ પ્રક્રિયા)
જો તમે પણ તમારી કોઈ ખાનગી વાતચીતને સુરક્ષિત કરવા માંગતા હોવ, તો નીચેના સરળ પગલાં અનુસરો:
૧. સૌપ્રથમ તમારા ઉપકરણ પર ChatGPT એપ્લિકેશન અથવા વેબ પ્લેટફોર્મ ખોલો. ૨. તમારી ચેટ હિસ્ટ્રીમાં જાઓ અને જે વાતચીતને તમે લૉક કરવા માંગો છો તેને શોધો. ૩. તે ચેટની બાજુમાં આપેલા ત્રણ ટપકાં (Three-dot menu icon) પર ક્લિક કરો. ૪. ત્યાં આપેલા વિકલ્પોમાંથી “Lock chat” નો વિકલ્પ પસંદ કરો. ૫. જો તમે આ ફીચરનો પહેલીવાર ઉપયોગ કરી રહ્યા હોવ, તો તમારી સુરક્ષા માટે ચાર અંકનો (4-digit) એકાઉન્ટ પિન સેટ કરો અને પુષ્ટિ કરવા માટે તેને ફરીથી દાખલ કરો.
આ સ્ટેપ પૂરા થતાની સાથે જ તમારી પસંદગીની ચેટ મુખ્ય સ્ક્રીન પરથી હટીને સુરક્ષિત રીતે “Locked Chats” વિભાગમાં જતી રહેશે.
લૉક કરેલી ચેટ્સ કેવી રીતે જોવી અને ધ્યાનમાં રાખવા જેવા મુદ્દા
જ્યારે પણ તમારે તમારી લૉક કરેલી ચેટ્સ જોવી હોય, ત્યારે ChatGPT ખોલીને ‘Projects’ અથવા સંબંધિત મેનૂમાં જઈને ‘Locked chats’ પર ક્લિક કરો. ત્યારબાદ તમારો પિન અથવા બાયોમેટ્રિક વેરિફિકેશન પૂરું કરીને તમે તેને ખોલી શકો છો.
