શું ક્રિકેટ ઓસ્ટ્રેલિયા ફરી ખોલશે 2018નું બોલ-ટેમ્પરિંગ કૌભાંડ? ઉસ્માન ખ્વાજાના દાવાઓ બાદ મોટો ખુલાસો
ઓસ્ટ્રેલિયન ક્રિકેટના ઇતિહાસમાં સૌથી વિવાદાસ્પદ ઘટનાઓમાંની એક ગણાતું 2018નું બોલ-ટેમ્પરિંગ કૌભાંડ ફરી એકવાર ચર્ચામાં આવ્યું છે. પૂર્વ ઓસ્ટ્રેલિયન ક્રિકેટર ઉસ્માન ખ્વાજાએ આ મામલે ચોંકાવનારા દાવા કર્યા છે. તેમના મતે, 2018માં દડા સાથે ચેડાં કરવાની ઘટનાની જાણ માત્ર ત્રણ ખેલાડીઓને જ નહોતી, પરંતુ સમગ્ર ટીમ અને સપોર્ટ સ્ટાફને પણ આ બાબતની જાણ હતી. ખ્વાજાના આ નિવેદન બાદ ક્રિકેટ જગતમાં સવાલ ઊભો થયો હતો કે શું ક્રિકેટ ઓસ્ટ્રેલિયા (CA) આ જૂના કેસની ફરી તપાસ કરશે? જોકે, ક્રિકેટ ઓસ્ટ્રેલિયાએ આ અંગે પોતાનું વલણ સ્પષ્ટ કરી દીધું છે. સંસ્થાના CEO ટોડ ગ્રીનબર્ગે જણાવ્યું છે કે આ મામલે ફરી તપાસ કરવામાં આવશે નહીં.
આ ઘટનાને ‘સેન્ડપેપરગેટ’ તરીકે ઓળખવામાં આવે છે. વર્ષ 2018માં દક્ષિણ આફ્રિકા સામેની ટેસ્ટ શ્રેણી દરમિયાન બનેલી આ ઘટનાએ ઓસ્ટ્રેલિયન ક્રિકેટની પ્રતિષ્ઠાને મોટો ફટકો પહોંચાડ્યો હતો. તે સમયે સ્ટીવ સ્મિથ, ડેવિડ વોર્નર અને કેમેરોન બેનક્રોફ્ટ સામે કાર્યવાહી કરવામાં આવી હતી. હવે ખ્વાજાના નવા દાવાઓને કારણે આ જૂનો વિવાદ ફરી ચર્ચાના કેન્દ્રમાં આવ્યો છે.
ક્રિકેટ ઓસ્ટ્રેલિયાએ ફરી તપાસ કરવાનો ઇનકાર કર્યો
ઉસ્માન ખ્વાજાના નિવેદન બાદ ક્રિકેટ ઓસ્ટ્રેલિયાના CEO ટોડ ગ્રીનબર્ગે સ્પષ્ટ કર્યું છે કે 2018ના બોલ-ટેમ્પરિંગ કૌભાંડની ફરી તપાસ કરવાનો સંસ્થાનો કોઈ ઇરાદો નથી. તેમના આ વલણથી સ્પષ્ટ થઈ ગયું છે કે ખ્વાજાના નવા દાવાઓ છતાં ક્રિકેટ ઓસ્ટ્રેલિયા જૂના કેસને ફરી ખોલવા તૈયાર નથી.
ઉલ્લેખનીય છે કે 2018માં આ ઘટના સામે આવ્યા બાદ ક્રિકેટ ઓસ્ટ્રેલિયાએ આંતરિક તપાસ હાથ ધરી હતી. તપાસના આધારે ત્રણ ખેલાડીઓ સામે શિસ્તભંગની કાર્યવાહી કરવામાં આવી હતી. સ્ટીવ સ્મિથ અને ડેવિડ વોર્નર પર એક વર્ષનો પ્રતિબંધ મૂકવામાં આવ્યો હતો, જ્યારે કેમેરોન બેનક્રોફ્ટ પર નવ મહિનાનો પ્રતિબંધ લાદવામાં આવ્યો હતો.
તે સમયે આ કાર્યવાહી ઓસ્ટ્રેલિયન ક્રિકેટ માટે એક મોટો આંચકો હતી. ખાસ કરીને સ્મિથ અને વોર્નર જેવા મહત્વના ખેલાડીઓ પર પ્રતિબંધ લાગવાથી ટીમની શક્તિ અને પ્રતિષ્ઠા બંનેને અસર થઈ હતી. ક્રિકેટ ઓસ્ટ્રેલિયાએ તે સમયે આ ઘટનાને ગંભીર શિસ્તભંગ તરીકે લીધી હતી અને જવાબદાર ખેલાડીઓ સામે કડક પગલાં ભર્યાં હતાં.
શું હતી 2018ની સેન્ડપેપરગેટ ઘટના?
માર્ચ 2018માં દક્ષિણ આફ્રિકા અને ઓસ્ટ્રેલિયા વચ્ચે કેપટાઉનના ન્યૂલેન્ડ્સ મેદાન પર ત્રીજી ટેસ્ટ મેચ રમાઈ રહી હતી. આ મેચ દરમિયાન ટેલિવિઝન કેમેરામાં ઓસ્ટ્રેલિયન ખેલાડી કેમેરોન બેનક્રોફ્ટ દડા પર સેન્ડપેપર ઘસતા જોવા મળ્યા હતા. આ ઘટનાનો વીડિયો સામે આવતાં સમગ્ર ક્રિકેટ જગતમાં ખળભળાટ મચી ગયો હતો.
દડા સાથે ચેડાં કરવાનો હેતુ તેની સપાટીને અસર પહોંચાડીને બોલરોને રિવર્સ સ્વિંગ મેળવવામાં મદદ કરવાનો હતો. ત્યારબાદ ક્રિકેટ ઓસ્ટ્રેલિયાએ તપાસ કરી હતી. તપાસમાં ડેવિડ વોર્નરની ભૂમિકા યોજનાના આયોજન સાથે જોડાઈ હતી, જ્યારે બેનક્રોફ્ટે મેદાન પર તેનો અમલ કર્યો હતો. તે સમયના કેપ્ટન સ્ટીવ સ્મિથને આ યોજના વિશે જાણ હોવા છતાં તેમણે તેને રોકવા માટે પગલાં લીધાં નહોતાં.આ સમગ્ર ઘટનાને કારણે ત્રણેય ખેલાડીઓએ પ્રતિબંધનો સામનો કરવો પડ્યો હતો. તે સમયના મુખ્ય કોચ ડેરેન લેહમેન સામે પણ ચર્ચા થઈ હતી, જોકે તેમણે આક્ષેપોને નકારી કાઢ્યા હતા.
ખ્વાજાના દાવાને ડેવિડ વોર્નરનું સમર્થન
ઉસ્માન ખ્વાજાએ તાજેતરમાં દાવો કર્યો હતો કે બોલ-ટેમ્પરિંગની આ ઘટના અંગે ઓસ્ટ્રેલિયન ટીમમાં સામેલ દરેક વ્યક્તિને જાણ હતી. તેમના જણાવ્યા અનુસાર, આ જાણકારી માત્ર મેદાન પર રમતા ખેલાડીઓ સુધી મર્યાદિત નહોતી, પરંતુ સપોર્ટ સ્ટાફને પણ આ બાબતની જાણ હતી.ખ્વાજાના દાવા મુજબ, બોલ-ટેમ્પરિંગની પ્રક્રિયા માર્ચ 2018માં કેપટાઉનમાં રમાયેલી ત્રીજી ટેસ્ટ પહેલાં પોર્ટ એલિઝાબેથમાં રમાયેલી બીજી ટેસ્ટથી જ શરૂ થઈ ગઈ હતી. આ નિવેદનથી જૂના કૌભાંડ અંગે નવા સવાલો ઊભા થયા છે.
ખાસ વાત એ છે કે ડેવિડ વોર્નરે પણ ખ્વાજાના દાવાઓને સમર્થન આપ્યું છે. આ ઘટનામાં પોતાની ભૂમિકાને કારણે પ્રતિબંધ ભોગવી ચૂકેલા વોર્નરે ખ્વાજાની વાતને સંપૂર્ણપણે સાચી ગણાવી હોવાનું જણાવાયું છે. બીજી તરફ, તે સમયના મુખ્ય કોચ ડેરેન લેહમેને આ આરોપોને નકારી કાઢ્યા છે.
