આર્યવીર સેહવાગે 160 રનની ધમાકેદાર ઇનિંગ પાછળનું રહસ્ય ખોલ્યું, પિતાને આપેલું વચન કર્યું પૂરું
ભારતીય ક્રિકેટના દિગ્ગજ બેટ્સમેન વીરેન્દ્ર સેહવાગની જેમ તેમના પુત્ર આર્યવીર સેહવાગ પણ પોતાની આક્રમક બેટિંગથી ક્રિકેટપ્રેમીઓનું ધ્યાન ખેંચી રહ્યા છે. ACC અંડર-19 એશિયા કપમાં UAE સામે રમાયેલી મેચમાં આર્યવીરે 160 રનની શાનદાર ઇનિંગ રમીને ભારતની જીતમાં મહત્વનું યોગદાન આપ્યું હતું. તેમની આ ઇનિંગમાં 17 ચોગ્ગા અને 7 છગ્ગાનો સમાવેશ થયો હતો. જોકે, આ શાનદાર પ્રદર્શન બાદ આર્યવીરે એક એવો ખુલાસો કર્યો, જેણે સૌનું ધ્યાન ખેંચ્યું છે. તેણે જણાવ્યું કે UAE સામે મેદાનમાં ઉતરતા પહેલાં તેણે પોતાના પિતાને મોટી સદી ફટકારવાનું વચન આપ્યું હતું. ખાસ વાત એ છે કે આર્યવીરે પોતાની શાનદાર બેટિંગથી આ વચન પૂરું પણ કર્યું.
પિતાને આપેલું વચન પૂરું કરવા મેદાનમાં ઉતર્યો આર્યવીર
UAE સામેની મેચમાં શાનદાર પ્રદર્શન કર્યા બાદ આર્યવીર સેહવાગને પ્લેયર ઓફ ધ મેચનો એવોર્ડ આપવામાં આવ્યો હતો. આ દરમિયાન તેણે પોતાની ઇનિંગ અને બેટિંગની રણનીતિ વિશે વાત કરી હતી. આર્યવીરે જણાવ્યું કે મેચ પહેલાં તેણે એક વ્યક્તિને મોટો સ્કોર બનાવવાનું વચન આપ્યું હતું. આ વ્યક્તિ બીજું કોઈ નહીં, પરંતુ તેના પિતા અને પૂર્વ ભારતીય ઓપનર વીરેન્દ્ર સેહવાગ હતા.
આર્યવીરે પોતાના પિતાને વચન આપ્યું હતું કે તે UAE સામે મોટી સદી ફટકારશે. પોતાના વચનને પૂરું કરવામાં સફળ રહેતાં તે ખૂબ જ ખુશ હતો. વીરેન્દ્ર સેહવાગ પોતાની આક્રમક બેટિંગ અને મોટી ઇનિંગ્સ માટે જાણીતા રહ્યા છે. હવે તેમના પુત્ર આર્યવીરે પણ પોતાની પ્રતિભા બતાવીને ક્રિકેટ જગતમાં ચર્ચા જગાવી છે.
મેચ બાદ આર્યવીરે જણાવ્યું કે પિચ પર બોલ થોડો ટર્ન થઈ રહ્યો હતો. તેથી તેણે શરૂઆતથી જ લાંબા સમય સુધી ક્રિઝ પર ટકી રહેવાનું નક્કી કર્યું હતું. તેનું લક્ષ્ય લગભગ 40 ઓવર સુધી બેટિંગ કરવાનું હતું. શરૂઆતમાં તેણે સાવચેતીપૂર્વક બેટિંગ કરી અને વિકેટ બચાવવા પર ધ્યાન આપ્યું. આ દરમિયાન તેને ડોટ બોલની ચિંતા નહોતી, કારણ કે તેને વિશ્વાસ હતો કે તે પછીથી ઝડપી રન બનાવીને તેની ભરપાઈ કરી શકશે.
160 રનની ઇનિંગથી UAEના બોલરોને કર્યા પરેશાન
UAEએ આ મહત્વપૂર્ણ મેચમાં ટોસ જીતીને પ્રથમ બોલિંગ કરવાનો નિર્ણય લીધો હતો. પિચ પર ભેજ અને ઘાસ હોવાથી શરૂઆતમાં ઝડપી બોલરોને મદદ મળી રહી હતી. ભારતીય ટીમના કેપ્ટન લક્ષ્ય રાજેશ રાયચંદાની માત્ર 17 રન બનાવીને આઉટ થયા હતા. જોકે, બીજા છેડે આર્યવીર સેહવાગે મક્કમ બેટિંગ કરીને ભારતીય ઇનિંગ્સને સંભાળી હતી.
આર્યવીરને વી.કે. વિનીતનો સારો સાથ મળ્યો હતો. બંને બેટ્સમેન વચ્ચે બીજી વિકેટ માટે 193 રનની મહત્વપૂર્ણ ભાગીદારી થઈ હતી. આ ભાગીદારીએ ભારતીય ટીમને મજબૂત સ્થિતિમાં પહોંચાડી હતી. વિનીતે પણ શાનદાર બેટિંગ કરતાં 65 રન બનાવ્યા હતા.બીજી તરફ, આર્યવીરે શરૂઆતમાં પિચના મિજાજને સમજીને બેટિંગ કરી હતી. ત્યારબાદ તેણે પોતાની બેટિંગની ગતિ વધારી અને UAEના બોલરો સામે આક્રમક વલણ અપનાવ્યું હતું. ખાસ કરીને સદી પૂરી કર્યા બાદ તેણે મોટા શોટ્સ રમવાનું શરૂ કર્યું હતું.
આર્યવીરે 168 બોલમાં 160 રન બનાવ્યા હતા. તેની આ ઇનિંગમાં 17 ચોગ્ગા અને 7 છગ્ગા સામેલ હતા. લાંબા સમય સુધી ક્રિઝ પર રહીને તેણે ભારતીય ટીમને મોટો સ્કોર બનાવવામાં મદદ કરી હતી. આર્યવીરના આઉટ થયા બાદ અન્ય બેટ્સમેનોએ પણ ઉપયોગી યોગદાન આપ્યું હતું.ભારતીય ટીમે નિર્ધારિત 50 ઓવરમાં 7 વિકેટ ગુમાવીને 309 રન બનાવ્યા હતા. આમ, UAE સામે જીતવા માટે 310 રનનો લક્ષ્યાંક રાખ્યો હતો.
ભારતની શાનદાર જીત, સેમીફાઇનલમાં અફઘાનિસ્તાન સામે ટક્કર
310 રનના લક્ષ્યાંકનો પીછો કરવા ઉતરેલી UAEની ટીમ ભારતીય બોલરો સામે ટકી શકી નહોતી. ભારતીય બોલિંગ આક્રમણે શાનદાર પ્રદર્શન કરતાં UAEની આખી ટીમને 239 રનમાં ઓલઆઉટ કરી દીધી હતી. પરિણામે ભારતે આ મેચમાં શાનદાર જીત નોંધાવી હતી.આ જીત સાથે ભારતીય અંડર-19 ટીમે ACC અંડર-19 એશિયા કપની સેમીફાઇનલમાં પોતાનું સ્થાન નિશ્ચિત કર્યું છે. હવે ભારતીય ટીમ 12 નવેમ્બરે સેમીફાઇનલમાં અફઘાનિસ્તાન સામે ટકરાશે.
