સેન્ડપેપરગેટ 8 વર્ષ જૂના બોલ ટેમ્પરિંગ વિવાદે ફરી પકડ્યો જોર, ઉસ્માન ખ્વાજાના દાવા પર મિચેલ સ્ટાર્કનો વળતો જવાબ
ઓસ્ટ્રેલિયન ક્રિકેટમાં 2018ના કુખ્યાત ‘સેન્ડપેપરગેટ’ વિવાદે ફરી એકવાર ચર્ચા જગાવી છે. લગભગ આઠ વર્ષ જૂના બોલ ટેમ્પરિંગ કાંડને લઈને પૂર્વ ઓસ્ટ્રેલિયન ક્રિકેટર ઉસ્માન ખ્વાજાએ પોતાના નવા પુસ્તકમાં ચોંકાવનારા ખુલાસા કર્યા છે. ખ્વાજાના દાવા મુજબ, દક્ષિણ આફ્રિકા પ્રવાસ દરમિયાન બોલ સાથે ચેડાં કરવાની યોજના અંગે ઓસ્ટ્રેલિયાની આખી ટીમને જાણ હતી. જોકે, હવે ઓસ્ટ્રેલિયાના ફાસ્ટ બોલર મિચેલ સ્ટાર્કે આ દાવાને નકારી કાઢ્યો છે. સ્ટાર્કે સ્પષ્ટ કહ્યું છે કે બોલ સાથે ચેડાં કરવા માટે મેદાન પર કોઈ બહારની વસ્તુ લઈ જવામાં આવી હોવાની તેને જાણ નહોતી. તેણે એમ પણ જણાવ્યું કે 2021માં આ મામલે તેણે જે નિવેદન આપ્યું હતું, તેના પર આજે પણ તે અડગ છે.
આ વિવાદ ફરી ચર્ચામાં આવવાનું કારણ માત્ર ખ્વાજાના ખુલાસા નથી. પૂર્વ ઓપનર ડેવિડ વોર્નરે પણ ખ્વાજાના દાવાને સંપૂર્ણ સાચો ગણાવ્યો છે. બીજી તરફ, ક્રિકેટ ઓસ્ટ્રેલિયાએ આ મામલે ફરી તપાસ કરવાની શક્યતા નકારી દીધી છે. પરિણામે, ઓસ્ટ્રેલિયન ક્રિકેટના જૂના વિવાદમાં ફરી એકવાર અલગ-અલગ દાવાઓ સામે આવી રહ્યા છે.
ઉસ્માન ખ્વાજાના પુસ્તકમાં શું થયો ખુલાસો?
ઓસ્ટ્રેલિયાના પૂર્વ બેટ્સમેન ઉસ્માન ખ્વાજાએ પોતાના નવા આત્મકથાત્મક પુસ્તક ‘Sabr’માં 2018ના બોલ ટેમ્પરિંગ કાંડ અંગે નવી વિગતો રજૂ કરી છે. તેમના જણાવ્યા પ્રમાણે, દક્ષિણ આફ્રિકા પ્રવાસ દરમિયાન બોલની સ્થિતિ સાથે ચેડાં કરવાની ચર્ચા માત્ર થોડા ખેલાડીઓ સુધી મર્યાદિત નહોતી, પરંતુ આખી ટીમને આ યોજનાની જાણ હતી.
ખ્વાજાએ એવો પણ દાવો કર્યો છે કે બોલ ટેમ્પરિંગની શરૂઆત કેપટાઉનમાં રમાયેલી ત્રીજી ટેસ્ટથી નહીં, પરંતુ પોર્ટ એલિઝાબેથ (હાલનું ગ્કેબેરહા) ખાતે રમાયેલી બીજી ટેસ્ટથી થઈ હતી. તેમના મતે, ટીમમાં બોલને ખરબચડો બનાવવાની બાબતે ખુલ્લેઆમ અને હળવાશથી ચર્ચાઓ થતી હતી.આ ખુલાસા બાદ ઓસ્ટ્રેલિયાના પૂર્વ ઓપનર ડેવિડ વોર્નરે પણ ખ્વાજાને સમર્થન આપ્યું હતું. વોર્નરે સોશિયલ મીડિયા પર ખ્વાજાના દાવાને ‘100 ટકા સાચો’ ગણાવ્યો હતો. તેણે ક્રિકેટ ઓસ્ટ્રેલિયાની અગાઉની તપાસને પણ ઉતાવળમાં કરવામાં આવેલી અને ખામીઓવાળી ગણાવી હતી.
મિચેલ સ્ટાર્કે ખ્વાજાના દાવાને નકાર્યો, 2021ના નિવેદન પર અડગ
ઉસ્માન ખ્વાજાના ખુલાસા બાદ ઓસ્ટ્રેલિયાના ફાસ્ટ બોલર મિચેલ સ્ટાર્કે પોતાનું વલણ સ્પષ્ટ કર્યું છે. સ્ટાર્કે કહ્યું કે 2018ની ઘટનાને લઈને તેની યાદશક્તિ અને અભિપ્રાયમાં કોઈ ફેરફાર થયો નથી. તેના જણાવ્યા અનુસાર, મેદાન પર બોલ સાથે ચેડાં કરવા માટે કોઈ બહારની વસ્તુ લાવવામાં આવી હોવાની તેને જાણ નહોતી. કેપટાઉન ટેસ્ટ દરમિયાન સ્ટેડિયમની મોટી સ્ક્રીન પર સૅન્ડપેપરની તસવીરો જોયા બાદ જ તેને આ બાબતની જાણ થઈ હતી.સ્ટાર્કે 2021માં પોતાના સાથી બોલરો પેટ કમિન્સ, જોશ હેઝલવુડ અને નાથન લાયન સાથે જાહેર કરેલા નિવેદનનો પણ ઉલ્લેખ કર્યો હતો. આ નિવેદનમાં ચારેય બોલરોએ સ્પષ્ટ કર્યું હતું કે બોલની સ્થિતિ બદલવા માટે મેદાન પર કોઈ બહારની વસ્તુ લાવવામાં આવી હોવાની તેમને જાણ નહોતી.
સ્ટાર્કે એમ પણ કહ્યું કે તેણે ખ્વાજાનું નવું પુસ્તક વાંચ્યું નથી અને કદાચ તે વાંચશે પણ નહીં. ખ્વાજાએ પુસ્તકમાં જે દાવા કર્યા છે, તેની સ્પષ્ટતા કરવાની જવાબદારી લેખક તરીકે તેમની જ છે. તેણે આઠ વર્ષ જૂની ઘટનાને લઈને અલગ-અલગ લોકોના અલગ અભિપ્રાય હોવાની વાત પણ સ્વીકારી હતી.સ્ટાર્કના આ નિવેદનથી સ્પષ્ટ થાય છે કે ઓસ્ટ્રેલિયાની ટીમના કેટલાક પૂર્વ ખેલાડીઓ વચ્ચે આ ઘટનાને લઈને હજુ પણ મતભેદ છે. એક તરફ ખ્વાજા આખી ટીમને જાણ હોવાનો દાવો કરી રહ્યા છે, તો બીજી તરફ સ્ટાર્ક સહિતના બોલરો પોતાના જૂના વલણ પર અડગ છે.
ક્રિકેટ ઓસ્ટ્રેલિયા ફરી તપાસ કરવા તૈયાર નથી, ત્રણ ખેલાડીઓ પર થઈ હતી કાર્યવાહી
ખ્વાજાના નવા ખુલાસા અને વોર્નરના સમર્થન બાદ ક્રિકેટ ઓસ્ટ્રેલિયા પર આ મામલે ફરી તપાસ કરવાની માંગ ઊઠી છે. જોકે, બોર્ડના મુખ્ય કાર્યકારી અધિકારી ટોડ ગ્રીનબર્ગે સ્પષ્ટ કર્યું છે કે હાલ આ તપાસ ફરી શરૂ કરવાનો કોઈ નક્કર કારણ નથી.ગ્રીનબર્ગના જણાવ્યા અનુસાર, બોર્ડ અગાઉની તપાસના પરિણામથી સંતુષ્ટ છે. ખ્વાજાએ રજૂ કરેલી વિગતોને પણ ધ્યાનમાં લેવામાં આવી છે, પરંતુ તેમના દાવા તે સમયના અન્ય ખેલાડીઓનાં નિવેદનો સાથે મેળ ખાતા નથી. આઠ વર્ષ બાદ ફરી તપાસ શરૂ કરવાથી કોઈ ખાસ ફાયદો થશે નહીં, તેવું પણ તેમણે જણાવ્યું હતું.
આ સમગ્ર વિવાદ માર્ચ 2018માં દક્ષિણ આફ્રિકા સામે કેપટાઉનમાં રમાયેલી ટેસ્ટ મેચ દરમિયાન સામે આવ્યો હતો. મેચ દરમિયાન ઓસ્ટ્રેલિયાના બેટ્સમેન કેમેરોન બેનક્રોફ્ટને સૅન્ડપેપર વડે બોલની સપાટી સાથે ચેડાં કરતા કેમેરામાં પકડવામાં આવ્યો હતો. આ ઘટનાએ ક્રિકેટ જગતમાં ભારે હોબાળો મચાવ્યો હતો અને તેને ‘સેન્ડપેપરગેટ’ નામ આપવામાં આવ્યું હતું.ત્યારબાદ ક્રિકેટ ઓસ્ટ્રેલિયાએ તપાસ હાથ ધરી હતી. તપાસના પરિણામે તત્કાલીન કેપ્ટન સ્ટીવ સ્મિથ અને ડેવિડ વોર્નર પર એક-એક વર્ષનો પ્રતિબંધ મૂકવામાં આવ્યો હતો, જ્યારે કેમેરોન બેનક્રોફ્ટને નવ મહિના માટે સસ્પેન્ડ કરવામાં આવ્યો હતો. સ્મિથ અને વોર્નર પર કેપ્ટનશિપ સંબંધિત પ્રતિબંધો પણ મૂકવામાં આવ્યા હતા.
