સંસદ બહારના નિવેદન સાથે ચેડાં કરી બનાવાયો ડીપફેક વીડિયો: પિયુષ ગોયલે ચાણક્યપુરી પોલીસ સ્ટેશનમાં નોંધાવી ફરિયાદ
ડિજિટલ યુગમાં આર્ટિફિશિયલ ઇન્ટેલિજન્સ (AI) ના વધતા વ્યાપ વચ્ચે ડીપફેક અને સાયબર ક્રાઇમની ઘટનાઓ ચિંતાજનક રીતે વધી રહી છે. તાજેતરમાં કેન્દ્રીય મંત્રી પિયુષ ગોયલનો એક ફેબ્રિકેટેડ અને AI દ્વારા તૈયાર કરાયેલો ડીપફેક વિડીયો સોશિયલ મીડિયા પર વાયરલ થતાં રાજકીય અને સાયબર જગતમાં ખળભળાટ મચી ગયો છે.
સોશિયલ મીડિયા પર આર્ટિફિશિયલ ઇન્ટેલિજન્સ (AI) નો દુરુપયોગ કરીને જનતાને ગેરમાર્ગે દોરવાના પ્રયાસો સામે કેન્દ્ર સરકારે આકરું વલણ અપનાવ્યું છે. કેન્દ્રીય મંત્રી પિયુષ ગોયલે સોશિયલ મીડિયા પ્લેટફોર્મ્સ પર વાયરલ થઈ રહેલા તેમના એક કથિત નિવેદનના વિડીયોને સંપૂર્ણપણે નકલી અને AI દ્વારા જનરેટ કરાયેલ ‘ડીપફેક’ ગણાવ્યો છે.
આ મામલાને અત્યંત ગંભીરતાથી લેતા મંત્રીશ્રીએ સ્પષ્ટ કર્યું છે કે આવી પ્રવૃત્તિઓ માત્ર ભ્રામક નથી, પરંતુ દેશની લોકશાહી પ્રક્રિયા અને પ્રજાતંત્રની ગરિમાને નુકસાન પહોંચાડનારી છે.
સંસદ બહારના નિવેદન સાથે ડિજિટલ ચેડાં
કેન્દ્રીય મંત્રી પિયુષ ગોયલે સોશિયલ મીડિયા પર જારી કરેલા એક અધિકૃત નિવેદનમાં જણાવ્યું હતું કે, સંસદ ભવનની બહાર મીડિયા સમક્ષ તેમણે આપેલા મૂળ નિવેદન સાથે જાણીજોઈને ડિજિટલ મોર્ફિંગ અને વોઈસ ક્લોનિંગ દ્વારા ચેડાં કરવામાં આવ્યા છે.
AI ટેકનોલોજીની મદદથી તેમના ચહેરાના હાવભાવ અને અવાજનો દુરુપયોગ કરીને એક એવો ડીપફેક વીડિયો તૈયાર કરવામાં આવ્યો, જેનો હેતુ માત્ર ને માત્ર લોકોમાં ગેરસમજ ઉભી કરવાનો અને ખોટી માહિતી ફેલાવવાનો હતો. તેમણે ઉમેર્યું હતું કે આવા કૃત્યો રાજકીય અને સામાજિક વાતાવરણને ડહોળવાનો પૂર્વયોજિત કાવતરાનો ભાગ છે.
⚠️ IMPORTANT
My remarks to the media outside Parliament have been maliciously doctored using AI to create and circulate a deepfake video in an attempt to spread misinformation.
I have filed a police complaint, and an FIR (No. 123/26) has been registered at Chanakyapuri Police…
— Piyush Goyal (@PiyushGoyal) July 25, 2026
ચાણક્યપુરી પોલીસ સ્ટેશનમાં એફઆઈઆર (FIR) નોંધાઈ
આ ફેબ્રિકેટેડ વિડીયો સામે તાત્કાલિક કાનૂની કદમ ઉઠાવતા કેન્દ્રીય મંત્રીએ દિલ્હી પોલીસમાં સત્તાવાર ફરિયાદ નોંધાવી છે. ૨૫ જુલાઈ, ૨૦૨૬ ના રોજ વહેલી સવારે ૪:૩૫ વાગ્યે નવી દિલ્હીના ચાણક્યપુરી પોલીસ સ્ટેશનમાં આ સંદર્ભે એફઆઈઆર (FIR નંબર ૧૨૩/૨૬) દાખલ કરવામાં આવી છે.
ગોયલે કડક શબ્દોમાં ચેતવણી આપી છે કે, “સોશિયલ મીડિયા પર આ નકલી અને ભ્રામક વિડીયો બનાવનાર, તેને ફોરવર્ડ કરનાર, પ્રસારિત કરનાર કે પ્રોમોટ કરનાર તમામ વ્યક્તિઓ સામે કાયદાના દાયરામાં રહીને સખતમાં સખત પગલાં ભરવામાં આવશે.”
શું છે વાયરલ વિડીયોનું વિવાદસ્પદ સત્ય?
સોશિયલ મીડિયા પર વાયરલ થઈ રહેલા ફેક વીડિયોમાં પિયુષ ગોયલને વિવાદસ્પદ ટિપ્પણી કરતા દર્શાવવામાં આવ્યા છે. વીડિયોમાં તેઓ કથિત રીતે એવું બોલતા સંભળાય છે કે, “મારું દ્રઢપણે માનવું છે કે આપણે બે કે ત્રણ લોકોને જાહેરમાં લટકાવી દેવા જોઈએ જેથી વિરોધીઓને આપણી તાકાતનો અહેસાસ થાય…”
જોકે, ફેક્ટ-ચેકિંગ અને પ્રારંભિક તપાસમાં સ્પષ્ટ થઈ ગયું છે કે આ અવાજ અને વિડીયો ક્લિપ પૂરેપૂરી એડિટેડ અને AI થી જનરેટ કરેલી છે. મંત્રીશ્રીએ આવું કોઈ જ નિવેદન આપ્યું નથી.
“AI નો બેજવાબદાર ઉપયોગ સહન નહીં થાય”
કેન્દ્રીય મંત્રીએ દેશના નાગરિકોને સંબોધતા જણાવ્યું હતું કે, ટેકનોલોજી માનવજીવનને સરળ બનાવવા માટે છે, લોકોમાં ભ્રમ અને દ્વેષ ફેલાવવા માટે નહીં. AI નો આવો બેજવાબદાર દુરુપયોગ કોઈપણ સંજોગોમાં સહન કરી શકાય નહીં.
તેમણે દેશની જનતાને અપીલ કરી હતી કે સોશિયલ મીડિયા પર આવતા કોઈપણ સનસનાટીભર્યા વીડિયો કે ઓડિયો પર આંધળો વિશ્વાસ કરવાના બદલે માત્ર અધિકૃત અને ચકાસાયેલા (Verified) સ્ત્રોતો પર જ આધાર રાખવો. તેમણે વિશ્વાસ વ્યક્ત કર્યો હતો કે ભારતનો યુવાવર્ગ અને ટેક-સેવી નાગરિકો આવી સાયબર અફવાઓનો શિકાર નહીં બને.
