ફિલ્મ અને કન્ટેન્ટ ક્રિએશનમાં બનાવવું છે કરિયર? દિલ્હી યુનિવર્સિટી લાવ્યું નવો કોર્સ
આજના સમયમાં આર્ટિફિશિયલ ઇન્ટેલિજન્સ (AI) અને કન્ટેન્ટ ક્રિએશનનો ક્રેઝ ખૂબ જ ઝડપથી વધી રહ્યો છે. જો તમે પણ 10 પાસ છો અને ક્રિએટિવ ફિલ્ડમાં પોતાની કારકિર્દી બનાવવા માંગો છો, તો દિલ્હી યુનિવર્સિટી (DU) તમારા માટે એક શાનદાર તક લઈને આવી છે. દિલ્હી યુનિવર્સિટીના ‘કેમ્પસ ઓફ ઓપન લર્નિંગ’ (COL) દ્વારા AI ફિલ્મ મેકિંગમાં 3 મહિનાનો સર્ટિફિકેટ કોર્સ શરૂ કરવામાં આવ્યો છે.
આ કોર્સની સૌથી મોટી ખાસિયત એ છે કે તેમાં પ્રવેશ માટે 12મું પાસ કે ગ્રેજ્યુએશન હોવું જરૂરી નથી. કોઈપણ માન્યતા પ્રાપ્ત બોર્ડમાંથી 10મું પાસ ઉમેદવાર આ કોર્સ માટે અરજી કરી શકે છે. ચાલો જાણીએ આ કોર્સ સાથે જોડાયેલી ફી, બેઠકો, ક્લાસ અને અન્ય જરૂરી વિગતો…
કોર્સમાં શું-શું શીખવવામાં આવશે?
આ કોર્સમાં વિદ્યાર્થીઓને માત્ર AI ટૂલ્સનો ઉપયોગ કરતા જ નહીં, પરંતુ પ્રોજેક્ટના માધ્યમથી ફિલ્મ નિર્માણની આખી પ્રક્રિયાની વ્યવહારિક તાલીમ આપવામાં આવશે. જેમાં વિદ્યાર્થીઓને નીચેના વિષયોની જાણકારી મળશે:
આઈડિયા અને બ્રેઈનસ્ટોર્મિંગ (વિચાર અને વિચાર-મંથન)
વાર્તાનો વિકાસ (Story Development)
સ્ટોરીબોર્ડ અને વિઝ્યુઅલ બોર્ડ તૈયાર કરવું
પ્રોમ્પ્ટ રાઈટિંગ (Prompt Writing)
ટેક્સ્ટ-ટુ-ઈમેજ અને ટેક્સ્ટ-ટુ-વિડિયો જનરેશન
વિડિયો એડિટિંગ અને ઓડિયો પ્રોડક્શન
બેકગ્રાઉન્ડ સ્કોરિંગ અને AI આધારિત પ્રોજેક્ટ-બેઝ્ડ ફિલ્મ પ્રોડક્શન
યોગ્યતા, બેઠકો અને પસંદગી પ્રક્રિયા
શૈક્ષણિક લાયકાત: કોઈપણ માન્યતા પ્રાપ્ત બોર્ડમાંથી ન્યૂનતમ 10મું પાસ ઉમેદવાર આ કોર્સ માટે અરજી કરી શકે છે. ડીયુના વિદ્યાર્થીઓ ઉપરાંત અન્ય ઉમેદવારો પણ તેમાં પ્રવેશ મેળવી શકે છે.
કુલ બેઠકો: આ કોર્સ માટે માત્ર 30 બેઠકો જ નક્કી કરવામાં આવી છે.
પસંદગીનો આધાર: ઉમેદવારોની પસંદગી ‘પહેલા આવો, પહેલા મેળવો’ (First Come, First Served) ના આધારે કરવામાં આવશે. તેથી ઈચ્છુક વિદ્યાર્થીઓને સલાહ આપવામાં આવે છે કે તેઓ સમયસર અરજી કરે.
ક્લાસ અને સમય
ક્લાસ અને સમયઆ કોર્સ ઓફલાઈન મોડમાં ચલાવવામાં આવશે. તેના વર્ગો મુખ્યત્વે શનિવાર અને રવિવારે યોજાશે, જેથી અભ્યાસ કે અન્ય કામ કરી રહેલા વિદ્યાર્થીઓ પણ સરળતાથી ભાગ લઈ શકે.
સંભવિત શરૂઆત: નવેમ્બર 2026ના પ્રથમ સપ્તાહથી.
ક્લાસનું સ્થળ: CISBC, OLDC, કેમ્પસ ઓફ ઓપન લર્નિંગ, દિલ્હી યુનિવર્સિટી, કેશવપુરમ, ત્રી નગર, નવી દિલ્હી.
કોર્સની ફી
આ 3 મહિનાના સર્ટિફિકેટ કોર્સની કુલ ફી ₹15,000 છે. યુનિવર્સિટીના નિયમો મુજબ એકવાર ચૂકવવામાં આવેલી ફી નોન-રિફંડેબલ (પાછી ન મળવાપાત્ર) રહેશે.
અરજી કેવી રીતે કરવી?
અરજી કરવાની અંતિમ તારીખ: ઈચ્છુક ઉમેદવારો 31 ઓક્ટોબર 2026 સુધી રજીસ્ટ્રેશન કરી શકે છે.
અરજી પ્રક્રિયા: કોર્સ સાથે જોડાયેલી વધુ માહિતી અને ઓનલાઈન અરજી માટે વિદ્યાર્થીઓ દિલ્હી યુનિવર્સિટીના ‘કેમ્પસ ઓફ ઓપન લર્નિંગ’ના સત્તાવાર પોર્ટલ પર વિઝિટ કરી શકે છે. મર્યાદિત બેઠકો હોવાને કારણે અંતિમ તારીખની રાહ જોયા વગર વહેલી તકે અરજી કરવી વધુ હિતાવહ રહેશે.
