WinZO એપના પ્રમોટર્સ પર EDનો સકંજો: મની લોન્ડરિંગ કેસમાં બે લોકોની ધરપકડ, ₹ 505 કરોડ ફ્રીઝ
સરકારે 22 ઓગસ્ટ 2025 થી દેશમાં રિયલ મની ગેમ્સ પર પ્રતિબંધ મૂક્યો હોવા છતાં, WinZO પાસે હજુ પણ ₹ 43 કરોડની એવી રકમ પડી છે જે કંપનીએ ગેમર્સને પાછી આપી નથી.
ઓનલાઈન રિયલ મની ગેમિંગ એપ WinZO વિરુદ્ધ મની લોન્ડરિંગ કેસમાં એન્ફોર્સમેન્ટ ડિરેક્ટોરેટ (ED) એ મોટી કાર્યવાહી કરી છે. એજન્સીએ એપના પ્રમોટર્સ પવન સિંહ નંદા અને સૌમ્યા રાઠૌરને પૂછપરછ બાદ ધરપકડ કરી લીધી છે. EDની આ કાર્યવાહી છેલ્લા કેટલાક દિવસોથી ચાલી રહેલી તપાસનો ભાગ છે, જેમાં એજન્સીએ WinZO એપ પર ગંભીર આરોપો લગાવ્યા છે.
ચાર ઠેકાણાં પર દરોડા, ₹ 505 કરોડ ફ્રીઝ
ગયા અઠવાડિયે, 18 થી 22 નવેમ્બર 2025 ની વચ્ચે, EDની બેંગલુરુ ઝોનલ ઑફિસે દિલ્હી અને ગુરુગ્રામમાં ચાર સ્થળોએ દરોડા પાડ્યા હતા. આ દરોડા દરમિયાન, લગભગ ₹ 505 કરોડ ની ગુનામાંથી કમાયેલી રકમને ફ્રીઝ કરી દેવામાં આવી છે. આ ફ્રીઝ કરવામાં આવેલી રકમમાં બેંક બેલેન્સ, બોન્ડ્સ, એફડીઆર (FDR) અને મ્યુચ્યુઅલ ફંડનો સમાવેશ થાય છે. WinZO Games Pvt. Ltd. ભારતમાંથી સંચાલિત થતું એક ઓનલાઈન રિયલ મની ગેમિંગ પ્લેટફોર્મ છે.
ગ્રાહકો સાથે છેતરપિંડી અને KYC નો દુરુપયોગ
ફરિયાદીઓનો આરોપ છે કે તેમના KYC નો ખોટો ઉપયોગ કરીને મોટી છેતરપિંડી કરવામાં આવી હતી, જેના કારણે તેમને મોટું આર્થિક નુકસાન થયું હતું.
તપાસમાં ED ને જાણવા મળ્યું કે WinZO કંપની ભારતમાં બેસીને બ્રાઝિલ, અમેરિકા અને જર્મની જેવા દેશોમાં પણ રિયલ મની ગેમ્સ ચલાવી રહી હતી, અને તે પણ એ જ એપ/પ્લેટફોર્મ દ્વારા જેનો ઉપયોગ ભારતીય યુઝર્સ કરે છે.
-
સરકારે 22 ઓગસ્ટ 2025 થી દેશમાં રિયલ મની ગેમ્સ પર પ્રતિબંધ મૂક્યો હોવા છતાં, WinZO પાસે હજુ પણ ₹ 43 કરોડની એવી રકમ પડી છે જે કંપનીએ ગેમર્સને પરત કરી નથી.
-
ED ને એ પણ જાણવા મળ્યું કે કંપની ગ્રાહકોને જણાવ્યા વિના એલ્ગોરિધમ/સૉફ્ટવેર વિરુદ્ધ ગેમ રમવા માટે મજબૂર કરતી હતી, જ્યારે ખેલાડીઓ સમજતા હતા કે તેઓ અસલી લોકો સાથે રમી રહ્યા છે.
-
આ ઉપરાંત, WinZO એ ગ્રાહકોના વૉલેટમાંથી પૈસા કાઢવા પર પ્રતિબંધ મૂક્યો અથવા તેને સીમિત કર્યા. આ રીતે કંપનીએ લાખો યુઝર્સ પાસેથી ‘બેટ અમાઉન્ટ‘ તરીકે ગેરકાયદેસર કમાણી કરી, જે સીધી તેના બેંક ખાતાઓમાં જતી હતી.
વિદેશમાં ભંડોળનું ગેરકાયદેસર ડાયવર્ઝન
તપાસમાં એક વધુ મોટો ખુલાસો થયો છે કે WinZO એ ભારતમાં કમાયેલા ફંડને વિદેશોમાં (ખાસ કરીને અમેરિકા અને સિંગાપોરમાં) ઓવરસીઝ ઇન્વેસ્ટમેન્ટ ના નામે મોકલ્યું. ED અનુસાર, લગભગ 55 મિલિયન USD (અંદાજે ₹ 489.90 કરોડ) અમેરિકામાં WinZO US Inc. નામની કંપનીના બેંક ખાતામાં જમા કરવામાં આવ્યા હતા.
EDનો દાવો છે કે આ એક શેલ કંપની છે, કારણ કે તમામ ઓપરેશન્સ અને બેંકિંગ કામકાજ ભારતમાંથી જ થાય છે.
WinZO એપ પર EDની કાર્યવાહી બાદ રિયલ મની ગેમિંગ ઇન્ડસ્ટ્રીમાં હલચલ મચી ગઈ છે. કંપનીના પ્રમોટર્સની ધરપકડ, ₹ 505 કરોડ ફ્રીઝ થવા અને આંતરરાષ્ટ્રીય ભંડોળ ડાયવર્ઝન જેવા આરોપોએ આ સમગ્ર મામલાને અત્યંત ગંભીર બનાવી દીધો છે. ED હવે આ કેસમાં આગળ વધુ ધરપકડ અને ઊંડી તપાસની શક્યતા વ્યક્ત કરી રહી છે.
