સ્ત્રી સશક્તિકરણનું અનોખું મોડેલ: ગાંધીનગરના ઘોડિયાઘરથી નોકરિયાત માતાઓને મળ્યો મોટો સહારો
આજના આધુનિક યુગમાં સ્ત્રી ‘અબળા’ મટી ‘સબળા’ બની છે. આકાશમાં વિમાન ઉડાડતી પાયલોટ હોય કે સરહદ પર તૈનાત સુરક્ષાકર્મી, મહિલાઓએ દરેક ક્ષેત્રમાં પોતાની મજબૂત હાજરી નોંધાવી છે. જોકે, આ સફળતા પાછળ ઘર, પરિવાર અને ખાસ કરીને નાના બાળકોની જવાબદારીનો એક મોટો સંઘર્ષ છુપાયેલો હોય છે. ગાંધીનગર જેવા સરકારી નગરમાં, જ્યાં અનેક મહિલાઓ પોતાના સંયુક્ત પરિવારથી દૂર નોકરી કરે છે, ત્યાં માતૃત્વ અને વ્યવસાય વચ્ચે સંતુલન જાળવવું એક પડકાર છે. આ પડકારને પહોંચી વળવા માટે મહિલા અને બાળ વિકાસ વિભાગ દ્વારા સંચાલિત ‘ઘોડિયાઘર’ સુવિધા આશીર્વાદરૂપ સાબિત થઈ રહી છે.
ગાંધીનગરનું ઘોડિયાઘર: નોકરિયાત માતાઓ માટે આશીર્વાદ સમાન કેન્દ્ર
ગાંધીનગરના સેક્ટર-6 ની પ્રાથમિક શાળામાં કાર્યરત ઘોડિયાઘર જાન્યુઆરી 2025 થી સેંકડો નોકરિયાત માતાઓ માટે ભરોસાપાત્ર સ્થાન બન્યું છે. આ કેન્દ્ર માત્ર બાળકોને રાખવાની જગ્યા નથી, પરંતુ ‘માની હૂંફ’ આપતું એક સંસ્કાર કેન્દ્ર છે. અહીં સંચાલિકા હેમાંગીબેન મહેતા અને તેમની ટીમ બાળકોને પોતાના સંતાનની જેમ મમતાથી સાચવે છે. આ વ્યવસ્થાને કારણે માતાઓ ઓફિસમાં કોઈપણ ચિંતા વગર પૂરા આત્મવિશ્વાસથી પોતાનું કામ કરી શકે છે. સ્ત્રી જ સ્ત્રીના વિકાસનો પાયો બની શકે છે, તે આ ઘોડિયાઘરના મોડેલ પરથી સ્પષ્ટ દેખાય છે.
બાળકોના સર્વાંગી વિકાસ માટે પૌષ્ટિક આહાર અને શિક્ષણની વ્યવસ્થા
આ ઘોડિયાઘરમાં 6 મહિનાથી 5 વર્ષ સુધીના બાળકો માટે શ્રેષ્ઠ સુવિધાઓ ઉપલબ્ધ છે. બાળકોને બે સમયનો પૌષ્ટિક નાસ્તો અને એક સમયનું પૂરતું ભોજન આપવામાં આવે છે. માત્ર શારીરિક સાચવણી જ નહીં, પણ રમત-ગમતની સાથે પ્રાર્થના, બાળગીતો અને પાયાના અક્ષરજ્ઞાન દ્વારા બાળકોના વ્યક્તિત્વનું ઘડતર પણ કરવામાં આવે છે. અહીંના સ્ટાફને સમયાંતરે ખાસ તાલીમ આપવામાં આવે છે, જેથી બાળકોને માતાની ગેરહાજરીમાં પણ પ્રેમ અને હૂંફની કમી ન વર્તાય.
વહીવટી મથકો પર ઘોડિયાઘરની સુવિધાથી સ્ત્રી સશક્તિકરણને વેગ
ગાંધીનગરમાં માત્ર સેક્ટર-6 જ નહીં, પરંતુ નવા સચિવાલય, જૂના સચિવાલય, કલેક્ટર કચેરી અને ઉદ્યોગ ભવન જેવા મહત્વના કાર્યસ્થળો પર પણ આવી વ્યવસ્થા કરવામાં આવી છે. આ સુવિધા સાબિત કરે છે કે જો સરકાર અને સમાજ યોગ્ય સાથ-સહકાર આપે, તો માતૃત્વ ક્યારેય કારકિર્દીની આડે આવતું નથી. આ આંતરરાષ્ટ્રીય મહિલા દિવસે, આપણે એવી તમામ માતાઓને સલામી આપીએ છીએ જેઓ ઓફિસની ફાઈલો અને બાળકની જવાબદારી બંને કુશળતાપૂર્વક સંભાળીને રાષ્ટ્રના અર્થતંત્રમાં યોગદાન આપી રહી છે.
