રેગિંગ સામે ઊઠેલી ફરિયાદ બાદ કોલેજ વહીવટીતંત્રની ઝડપી કાર્યવાહી
ગાંધીનગર સ્થિત જીએમઇઆરએસ મેડિકલ કોલેજમાં રેગિંગની ગંભીર ઘટના સામે આવતા શૈક્ષણિક પરિસરમાં ભારે ચર્ચા શરૂ થઈ છે. પ્રથમ વર્ષના વિદ્યાર્થીઓ પર માનસિક દબાણ તથા મજાકના નામે થયેલા વર્તનને કારણે કોલેજ વહીવટીતંત્રએ તરત પગલા લેતા 14 સિનિયર વિદ્યાર્થીઓને હોસ્ટેલમાંથી તાત્કાલિક સસ્પેન્ડ કર્યા છે. આ ઘટનાએ વિદ્યાર્થીઓ અને તેમના વાલીઓમાં ગભરાટનું માહોલ સર્જી દીધો છે.
સાંસદ દિનેશ મકવાણાની પ્રતિક્રિયા, શૈક્ષણિક શિષ્ટાચારનું પાલન જરૂરી
આ મુદ્દે સાંસદ દિનેશ મકવાણાએ નિવેદન આપતાં જણાવ્યું કે વિદ્યાર્થીઓએ પોતાની મર્યાદામાં રહી શૈક્ષણિક વાતાવરણ જાળવવું જોઈએ. તેમણે સ્પષ્ટ કર્યું કે અભ્યાસ કરતાં વધુ મહત્વ હેરાનગતિ કે રેગિંગને આપવું ખોટું છે અને આવી ઘટનાઓથી સમાજમાં નકારાત્મક સંદેશ જાય છે. મકવાણાએ વિદ્યાર્થીઓને ભણતર પર ધ્યાન કેન્દ્રિત કરવાની સલાહ આપી છે.
કેવી રીતે સામે આવ્યો રેગિંગનો મુદ્દો?
મેડિકલ કોલેજની બોયઝ હોસ્ટેલમાં બીજા અને ત્રીજા વર્ષના વિદ્યાર્થીઓએ પ્રથમ વર્ષના વિદ્યાર્થીઓને બોલાવી અનિચ્છનીય રીતે ‘ઇન્ટ્રો’ આપવા માટે દબાણ કર્યું હોવાનું સામે આવ્યું. પીડિત વિદ્યાર્થીઓ અનુસાર, મજાકના નામે માનસિક ત્રાસ આપવામાં આવ્યો હતો. આ હિંમતભર્યા વિદ્યાર્થીઓએ તરત જ કોલેજ સત્તાધિશોને લેખિતમાં રજૂઆત કરી, જેના આધારે તપાસ શરૂ થઈ અને 14 સિનિયર વિદ્યાર્થીઓ સામે કડક પગલા લેવાયા. ઘટનાને લઈને વાલીઓમાં પણ ચિંતા વધતી જોવા મળી રહી છે.
