જુનાગઢમાં સિંહ દર્શન માટે નકલી બુકિંગ, રાજસ્થાનનો આરોપી ધરપકડમાં
એશિયાટિક સિંહોની ધરતી ગીર પ્રવાસીઓ માટે વર્ષોથી આકર્ષણનું કેન્દ્ર રહી છે, પરંતુ હવે સફારી પરમિટ અને ફોરેસ્ટ ગેસ્ટ હાઉસ બુકિંગના નામે મોટું છેતરપિંડી કૌભાંડ બહાર આવ્યું છે. બોગસ વેબસાઇટ બનાવી પ્રવાસીઓ પાસેથી નાણાં પડાવવાની ફરિયાદો બાદ વન વિભાગ અને પોલીસે તપાસ હાથ ધરી છે. લોકો ને સત્તાવાર જેવી દેખાતી નકલી સાઇટ પર દોરવામાં આવી અને બુકિંગની આડમાં મોટો ફ્રોડ અંજામ અપાયો હોવાનું સામે આવ્યું છે.
નકલી વેબસાઇટથી સરળતાથી પ્રવાસીઓ ફસાયા
આ રેકેટમાં સામેલ શખ્સ વન વિભાગની સત્તાવાર વેબસાઇટના ક્લોન જેવી દેખાતી બોગસ સાઇટ તૈયાર કરી પ્રવાસીઓને લક્ષ્ય બનાવતો હતો. ગીર સફારી માટે પરમિટ અથવા રહેઠાણ બુક કરવા ઉત્સાહિત પ્રવાસીઓને સાચી અને નકલી વેબસાઇટ વચ્ચેનો ફર્ક સમજાતો નહોતો. પરિણામે અનેક લોકોએ ભરોસો રાખીને ચુકવણી કરી નાખી અને પછી ખબર પડી કે દસ્તાવેજો નકલી છે.
ફેક પરમિટ અને ખોટા બુકિંગ સ્લિપથી છેતરપિંડી
આરોપી પ્રવાસીઓ પાસેથી રૂપિયા મેળવી તેમની મોબાઈલ પર બુકિંગની કન્ફર્મેશન સ્લિપ અને સિંહ દર્શનની નકલી પરમિટ મોકલતો હતો. પોતાના પેજને વિશ્વસનીય બતાવવા માટે જગન્નાથ મંદિર ટ્રસ્ટ અને શ્રીરામ આશ્રમ જેવા નામોનો પણ ઉપયોગ કર્યો હતો. પ્રવાસીઓ જયારે ગીર પહોંચી બુકિંગ ચકાસાવતા, ત્યારે જ ઠગાઈનો ખુલાસો થતાં તેઓ મુશ્કેલીમાં મુકાયા.
રાજસ્થાનનો આરોપી ઝડપાયો
ફરિયાદોના આધારે પોલીસે ઝડપી કામગીરી કરી અને આ કૌભાંડનો કથિત માસ્ટરમાઈન્ડ રાશિદખાન અયુબખાનને પકડી પાડ્યો છે. પૂછપરછમાં ખુલ્યું કે એ અત્યાર સુધીમાં લગભગ 20 જેટલા પ્રવાસીઓને છેતરવા સફળ રહ્યો હતો. જુદા જુદા નામે બુકિંગના બહાને મોટી રકમ પડાવી અને ગેરકાયદેસર રીતે લાભ મેળવ્યો હોવાનું સામે આવ્યું છે.
અન્ય સાથીઓની શોધખોળ શરૂ
આ ઘટના બાદ પોલીસે આરોપીના ડિજિટલ ડેટા અને લેપટોપ-મોબાઈલની તપાસ શરૂ કરી છે. આ ફ્રોડ માત્ર ગુજરાતમાં મર્યાદિત રહ્યો કે અન્ય રાજ્યોમાં પણ ચાલ્યો હતો તે શોધવામાં પ્રયત્નો કરવામાં આવી રહ્યા છે. જો વધુ લોકો આમાં સંડોવાયેલા હોય તો મોટું કૌભાંડ બહાર આવવાની શક્યતા છે. વન વિભાગ હવે પરમિટ બુકિંગ સિસ્ટમ વધુ સુરક્ષિત બનાવવા તરફ ધ્યાન કેન્દ્રિત કરી રહ્યો છે.
