ઇતિહાસમાં પહેલી વાર રેકોર્ડબ્રેક સ્પીડઃ જુલાઈ મધ્ય સુધીમાં પીએફ ખાતાઓમાં પહોંચી ગયું ૮.૨૫% વ્યાજ
કર્મચારી ભવિષ્ય નિધિ સંગઠન (EPFO) ના કરોડો સભ્યો માટે ખૂબ જ આનંદના અને ઉત્સાહવર્ધક સમાચાર સામે આવ્યા છે. દેશભરના પીએફ ખાતાધારકોના રિટાયરમેન્ટ ફંડ પર સરકારે વ્યાજની મોટી રકમ જમા કરવાની પ્રક્રિયા પૂર્ણ કરી દીધી છે. ઇતિહાસમાં ક્યારેય ન બની હોય તેવી ઝડપે આ વખતે નાણાકીય વર્ષ ૨૦૨૫-૨૬ ના વ્યાજના પૈસા ખાતાઓમાં જમા કરવામાં આવ્યા છે.
જો તમે નોકરીયાત વર્ગમાંથી આવો છો અને તમારો પીએફ કપાય છે, તો તમારા માટે તમારું એકાઉન્ટ બેલેન્સ ચેક કરવાનો સમય આવી ગયો છે. કેન્દ્રીય શ્રમ અને રોજગાર મંત્રી મનસુખ માંડવિયાની આગેવાની હેઠળ, કર્મચારી ભવિષ્ય નિધિ સંગઠન (EPFO) એ પોતાના ઈતિહાસનું સૌથી મોટું અને સૌથી ઝડપી ઓપરેશન પાર પાડ્યું છે. નાણાકીય વર્ષ ૨૦૨૫-૨૬ માટે મંજૂર કરાયેલા ૮.૨૫ ટકાના વ્યાજ દરો મુજબ, સરકારે ગઈકાલે દેશના અંદાજે ૩૪ કરોડ પીએફ સભ્ય ખાતાઓમાં વ્યાજની રકમ સફળતાપૂર્વક જમા કરાવી દીધી છે. સામાન્ય રીતે જે વ્યાજ સપ્ટેમ્બરથી નવેમ્બર મહિના સુધી મોડું જમા થતું હતું, તે હવે જુલાઈના મધ્ય સુધીમાં જ ગ્રાહકોના ખાતામાં પહોંચી જતાં નોકરીયાત વર્ગમાં ભારે હર્ષની લાગણી ફેલાઈ છે.
નવી ટેકનોલોજી અને ઓટોમેશન ક્રાંતિ
અત્યાર સુધી પીએફ વ્યાજ જમા થવામાં મહિનાઓનો સમય લાગી જતો હતો કારણ કે પીએફ વિભાગ પાસે ૧૨૩ પ્રાદેશિક કચેરીઓ હતી અને તમામના ડેટાબેઝ અલગ-અલગ સચવાતા હતા. પરંતુ, આ વખતે ઇપીએફઓએ પોતાની જૂની પદ્ધતિઓને તિલાંજલિ આપીને સેન્ટ્રલાઇઝડ આઈટી સક્ષમ સેવાઓ (CITES) પ્લેટફોર્મ અપનાવ્યું છે. આ પ્લેટફોર્મ હેઠળ દેશના તમામ ૧૨૩ પ્રાદેશિક ડેટાબેઝને એક વિશાળ રાષ્ટ્રીય કેન્દ્રીયકૃત ડેટાબેઝમાં સફળતાપૂર્વક જોડી દેવામાં આવ્યા છે.
આ આધુનિક પ્લેટફોર્મ અંદાજે ૧,૭૦૦ કરોડ રેકોર્ડ અને ૧,૪૦૦ કરોડ નાણાકીય વ્યવહારોનું એકીકરણ કરે છે. આ સિસ્ટમ કાર્યરત થતાં જ, માત્ર ૧-૨ જુલાઈ દરમિયાન તમામ ગણતરી સ્વયંસંચાલિત રીતે પૂરી થઈ ગઈ હતી અને કોઈપણ ભૂલ વગર લગભગ ૧.૪૪ લાખ કરોડ રૂપિયાનું વ્યાજ સીધું ગ્રાહકોના ખાતા સુધી મોકલી દેવામાં આવ્યું છે.
વ્યાજની ગણતરીનું સરળ ગણિત
હાલમાં ઇપીએફઓ લગભગ ૩૫ કરોડ સભ્ય ખાતા અને ૩૨ લાખ કરોડ રૂપિયાના તોતિંગ ફંડનું સંચાલન કરે છે, જેમાંથી આશરે ૮ કરોડ સક્રિય યોગદાન આપતા ખાતાઓ છે. જો આપણે વ્યાજની રકમની ગણતરી કરીએ, તો જે સભ્યના પીએફ ખાતામાં અત્યારે ૧૦ લાખ રૂપિયા જમા છે, તેમને વાર્ષિક ૮.૨૫% લેખે આશરે ૮૨,૫૦૦ રૂપિયા માત્ર વ્યાજ તરીકે મળ્યા છે. તેવી જ રીતે, જે સભ્યોના પીએફ ખાતામાં ૫૦ લાખ રૂપિયાનું મોટું ભંડોળ છે, તેમને આ વ્યાજદર પ્રમાણે અંદાજે ૪.૧૨ લાખ રૂપિયાની મોટી રકમ વ્યાજ સ્વરૂપે મળી છે.
જો હજી સુધી તમારી ઓનલાઇન પાસબુકમાં આ વ્યાજ ઉમેરાયેલું દેખાતું ન હોય તો ચિંતા કરવાની બિલકુલ જરૂર નથી. ઇપીએફઓ દ્વારા સ્પષ્ટતા કરવામાં આવી છે કે સિસ્ટમમાં ડેટા લોડ થવાના કારણે પાસબુક અપડેટ થવામાં થોડો સમય લાગી શકે છે, પરંતુ તેનાથી તમારા વ્યાજના જમા થઈ ગયેલા નાણાંને કોઈ અસર થશે નહીં.
તમારું પીએફ બેલેન્સ ચેક કરવાની ૪ સૌથી આસાન રીતો
તમે તમારા ઘરમાં બેઠા જ અલગ-અલગ ચાર સરળ માધ્યમો દ્વારા તમારું નવું પીએફ બેલેન્સ ચેક કરી શકો છો:
૧. ઓનલાઈન પોર્ટલ દ્વારા: પીએફની સત્તાવાર પાસબુક વેબસાઈટ પર જાઓ. ત્યાં તમારા યુનિવર્સલ એકાઉન્ટ નંબર (UAN), પાસવર્ડ અને સ્ક્રીન પર દેખાતો કેપ્ચા કોડ એન્ટર કરીને લોગ ઇન કરો. નવું પેજ ખુલતા જ ડ્રોપ-ડાઉન મેનુમાંથી તમારા પીએફ આઈડી પર ક્લિક કરો અને તમારી સંપૂર્ણ પાસબુક જોઈ લો.
૨. એસએમએસ (SMS) સેવા દ્વારા: તમારા પીએફ સાથે રજિસ્ટર્ડ મોબાઈલ નંબર પરથી મેસેજ બોક્સમાં જઈને EPFOHO space UAN space ENG (અથવા તમારી પસંદગીની ભાષાના પ્રથમ ત્રણ અક્ષર) લખીને ૭૭૩૮૨૯૯૮૯૯ પર મોકલી દો. થોડી જ મિનિટોમાં વ્યાજ સાથેના બેલેન્સનો વિગતવાર મેસેજ તમારા ફોન પર આવી જશે.
૩. ઉમંગ (UMANG) એપ દ્વારા: તમારા સ્માર્ટફોનમાં ઉમંગ એપ ઓપન કરો અને ‘All Services’ વિભાગમાં જઈને EPFO સિલેક્ટ કરો. ત્યાં ‘View Passbook’ ના વિકલ્પ પર જઈને UAN અને રજિસ્ટર્ડ મોબાઈલ પર આવેલો ઓટીપી (OTP) દાખલ કરીને પાસબુક ઓપન કરો.
૪. મિસ્ડ કોલ એલર્ટ દ્વારા: જો તમારી પાસે સાદો મોબાઈલ ફોન છે, તો ચિંતા કરવાની જરૂર નથી. તમારા રજિસ્ટર્ડ મોબાઈલ નંબર પરથી માત્ર ૯૯૬૬૦૪૪૪૨૫ પર કોલ કરો. બે રિંગ વાગ્યા પછી કોલ આપમેળે ડિસ્કનેક્ટ થઈ જશે અને એસએમએસ દ્વારા તમારા પીએફ ખાતાની લેટેસ્ટ વિગત મળી જશે.
