દીકરા અને દીકરી વચ્ચે કોઈ ભેદભાવ ન રાખો, બંનેને સમાન શિક્ષણ આપો: રાજ્યપાલ આચાર્ય દેવવ્રત
રાજકોટ જિલ્લાના બે દિવસીય પ્રવાસે પધારેલા રાજ્યપાલ આચાર્ય દેવવ્રતજીએ તેમના પ્રવાસના પ્રથમ દિવસે ગઢકા ગામની તાલુકા શાળાના પટાંગણમાં આયોજિત ભવ્ય રાત્રિસભામાં ગ્રામજનો સાથે ખુલ્લા મને અને આત્મીય સંવાદ સાધ્યો હતો. આ સભામાં તેમણે શિક્ષણ, વ્યસનમુક્ત સમાજ, સામાજિક સમરસતા, સ્વચ્છતા, વૃક્ષારોપણ અને પ્રાકૃતિક ખેતી જેવા મહત્વના મુદ્દાઓ પર ઊંડાણપૂર્વક માર્ગદર્શન પૂરું પાડ્યું હતું.
દીકરા-દીકરીના સમાન શિક્ષણ અને સંસ્કારો પર વિશેષ ભાર
શિક્ષણના મહત્વ વિશે વાત કરતા રાજ્યપાલએ તેમના ૩૫ વર્ષના ગુરુકુળના શૈક્ષણિક અનુભવને યાદ કરતા જણાવ્યું હતું કે, દીકરા અને દીકરી વચ્ચે કોઈ પણ પ્રકારનો ભેદભાવ રાખ્યા વિના બંનેને સમાન અને ઉચ્ચ શિક્ષણ આપવું એ દરેક વાલીની પ્રાથમિક ફરજ છે. નાની ઉંમરે બાળકોને અભ્યાસ છોડાવીને ખેતી કે મજૂરી કામમાં રોકવાને બદલે તેમને શિક્ષિત બનાવીને દેશના સક્ષમ નાગરિક બનાવવા જોઈએ.
આ સાથે સંસ્કારોનું મહત્વ સમજાવતા તેમણે કહ્યું કે, માત્ર સંપત્તિ કે મિલકત કમાઈ આપવા કરતાં બાળકોને સારા સંસ્કાર આપવા વધુ જરૂરી છે. વર્તમાન સમયમાં મોબાઈલ, ટીવી અને ખરાબ સંગત બાળકોને ગેરમાર્ગે દોરી શકે છે, માટે સંસ્કારો વગરનું બાળક વ્યસનોમાં પડીને આખી સંપત્તિ બરબાદ કરી દે છે. આ તકે પશુપાલકોને પશુઓની શ્રેષ્ઠ ઓલાદ જાળવવા માટે ગુજરાત સરકારની ‘સેક્સ સોર્ટડ સિમેન’ સહાયનો મહત્તમ લાભ લેવા પણ અનુરોધ કર્યો હતો.
પ્રાકૃતિક ખેતી અને સ્વાસ્થ્ય: સમયની સૌથી મોટી માંગ
પ્રાકૃતિક ખેતી અપનાવવા પર ભાર મૂકતા રાજ્યપાલએ જણાવ્યું હતું કે, વડાપ્રધાનએ પ્રાકૃતિક ખેતીને રાષ્ટ્રીય મિશન બનાવી દીધું છે. આજના સમયમાં અનેક ગંભીર બીમારીઓનું મુખ્ય કારણ ઝેરયુક્ત (રસાયણયુક્ત) ઉત્પાદનો છે. ગુજરાત સરકારના ખેતીવાડી અને ‘આત્મા’ જેવા વિવિધ વિભાગો પ્રાકૃતિક ખેતીનો વ્યાપ વધારવા માટે સતત કાર્યરત છે.
સાંસદ પરશોત્તમભાઈ રૂપાલાએ પણ સભાને સંબોધતા જણાવ્યું હતું કે, જમીનની ઘટતી જતી ફળદ્રુપતા અને રાસાયણિક ખાતરોના વપરાશને કારણે કેન્સર જેવા ગંભીર રોગો વધી રહ્યા છે, જેનો એકમાત્ર અકેલો ઉપાય પ્રાકૃતિક ખેતી છે. રાજ્યપાલ પોતે કુરુક્ષેત્ર ગુરુકુળમાં પ્રત્યક્ષ પ્રાકૃતિક ખેતી કરીને લોકો માટે ઉત્તમ ઉદાહરણ પૂરું પાડી રહ્યા છે.
ગઢકા ગામનો વિકાસ અને વહીવટી કામગીરીની ઝાંખી
આ રાત્રિસભા દરમિયાન ગઢકા ગામના સર્વાંગી વિકાસ માટે જિલ્લા પંચાયત પ્રમુખ સંજયભાઈ પીપળીયા દ્વારા રૂ. પાંચ લાખની ગ્રાન્ટ ફાળવવાની જાહેરાત કરવામાં આવી હતી.
જિલ્લા કલેક્ટર ડો. ઓમપ્રકાશે સ્વાગત પ્રવચનમાં જણાવ્યું હતું કે, ગામના ૨૦૦થી વધુ વડીલો અને ૬૦૦થી વધુ બાળકોએ વૃક્ષારોપણ કરી વૃક્ષોના જતનનો સંકલ્પ લીધો છે. તેમજ ગઢકા ખાતે યોજાયેલા ‘સેવા સેતુ’ કેમ્પમાં ૨,૦૧૦ થી વધુ લાભાર્થીઓએ સરકારી યોજનાઓનો સીધો લાભ લીધો છે. કાર્યક્રમ દરમિયાન રાજ્યપાલના હસ્તે પીએમજેવાય (PMJAY) અને ગંગાસ્વરૂપા યોજનાના લાભાર્થીઓને સહાયનું વિતરણ પણ કરવામાં આવ્યું હતું.
