વહીવટથી સોશિયલ મીડિયા સુધી ગુજરાતી ભાષાના ઉપયોગ પર મંત્રીનો ભારc
ભાષા નિયામકની કચેરી-ગાંધીનગર અને સુરત જિલ્લા શિક્ષણાધિકારીની કચેરીના સંયુક્ત ઉપક્રમે નાનપુરાની જીવનભારતી શાળામાં ‘રાજભાષા પ્રદર્શન અને પરિસંવાદ’ યોજાયો હતો. કાર્યક્રમમાં અધ્યક્ષ સ્થાનેથી બોલતા રાજ્ય મંત્રી ડૉ. જયરામભાઈ ગામીતે જણાવ્યું કે ગુજરાતી હોવાની ઓળખ આપણને દુનિયાના દરેક ખૂણે વિશેષ માન અપાવે છે. તેમણે દરેક ગુજરાતીને લઘુતાગ્રંથિ છોડી ગૌરવભેર માતૃભાષાનો ઉપયોગ કરવા અને આવનારી પેઢીને પોતાની સંસ્કૃતિ સાથે જોડવા ઘરમાં બાળકો સાથે ગુજરાતીમાં જ વાત કરવા અપીલ કરી હતી.
સરકારી વહીવટમાં માતૃભાષાને પ્રાધાન્ય
મંત્રીશ્રીએ સ્પષ્ટ કર્યું કે મુખ્યમંત્રી ભૂપેન્દ્ર પટેલના નેતૃત્વમાં રાજ્ય સરકારના તમામ વિભાગો, કચેરીઓ અને શાળાઓમાં પરિપત્રો તથા વહીવટી પત્રવ્યવહાર ગુજરાતીમાં જ થાય તે સુનિશ્ચિત કરવામાં આવ્યું છે. સોશિયલ મીડિયા અને ડિજિટલ પ્લેટફોર્મ પર પણ ગુજરાતી ભાષાનો વ્યાપ વધારવાની જરૂરિયાત પર તેમણે ભાર મૂક્યો હતો. વધુમાં, આદિવાસી બોલીઓના શબ્દકોશ તૈયાર કરવા માટે સરકારે હકારાત્મક પ્રતિસાદ આપી જરૂરી મદદ કરવાની ખાતરી આપી હતી.
ભાષા સંવર્ધન માટે ટેકનોલોજીનો ઉપયોગ
ભાષા નિયામક કિનલબેન ખરાડીએ કચેરીની કાર્યપદ્ધતિ સમજાવતા જણાવ્યું કે ગુજરાતી ભાષાને સમૃદ્ધ કરવા માટે ઓનલાઈન શબ્દકોશ અને શુદ્ધ જોડણી માટેના અદ્યતન સોફ્ટવેર વિકસાવવામાં આવી રહ્યા છે. કાર્યક્રમમાં સાહિત્યકાર બકુલ ટેલર, કાનજીભાઈ ભાલાળા અને ડૉ. નરેશ શુક્લ જેવા દિગ્ગજોએ પણ ભાષાના મહત્વ વિશે માર્ગદર્શન આપ્યું હતું.
