ICC T20 વર્લ્ડ કપ 2026: ઇંગ્લેન્ડે ટીમની જાહેરાત કરી, IPL પ્રતિબંધ છતાં હેરી બ્રુકને સોંપાઈ કેપ્ટનશીપ
ICC T20 વર્લ્ડ કપ 2026 માટે ટીમોની જાહેરાતનો દોર ઝડપ પકડતો જઈ રહ્યો છે. ટીમ ઇન્ડિયા બાદ હવે ઇંગ્લેન્ડ અને વેલ્સ ક્રિકેટ બોર્ડ (ECB) એ પણ પોતાની મજબૂત ટીમ જાહેર કરી છે. આ જાહેરાતનું સૌથી મોટું આકર્ષણ એ છે કે હેરી બ્રુકને ઇંગ્લેન્ડ ટીમનો કેપ્ટન બનાવવામાં આવ્યો છે, જ્યારે તે હાલમાં ઇન્ડિયન પ્રીમિયર લીગ (IPL) માંથી બે વર્ષના પ્રતિબંધનો સામનો કરી રહ્યો છે.
ICC T20 વર્લ્ડ કપ 2026 આગામી વર્ષે ફેબ્રુઆરી મહિનામાં ભારત અને શ્રીલંકાની સંયુક્ત યજમાની હેઠળ યોજાવાનો છે. આ ટુર્નામેન્ટને ધ્યાનમાં રાખીને ઇંગ્લેન્ડે અનુભવી તેમજ યુવા ખેલાડીઓનો સંતુલિત સમાવેશ કર્યો છે, જેથી ટીમ દરેક પરિસ્થિતિમાં મજબૂત દેખાય.
શ્રીલંકા સામે T20 શ્રેણી પણ રમશે ઇંગ્લેન્ડ
વર્લ્ડ કપ પહેલા ઇંગ્લેન્ડ ટીમ શ્રીલંકા સામે T20 શ્રેણી પણ રમશે. રસપ્રદ વાત એ છે કે વર્લ્ડ કપ અને શ્રીલંકા શ્રેણી માટે લગભગ એકસરખી ટીમ પસંદ કરવામાં આવી છે, જેથી ખેલાડીઓને આંતરરાષ્ટ્રીય પરિસ્થિતિઓમાં રિધમ મળ્યો રહે.
જોફ્રા આર્ચર ફક્ત વર્લ્ડ કપ માટે ઉપલબ્ધ
ઇંગ્લેન્ડ માટે મોટી ખુશખબર એ છે કે સ્ટાર ફાસ્ટ બોલર જોફ્રા આર્ચર સંપૂર્ણ રીતે ફિટ થઈને પરત ફર્યો છે અને તેને ICC T20 વર્લ્ડ કપ માટે ટીમમાં સામેલ કરવામાં આવ્યો છે. જોકે, વર્કલોડ મેનેજમેન્ટને ધ્યાનમાં રાખીને તે શ્રીલંકા સામેની T20 શ્રેણીમાં રમશે નહીં.બીજી તરફ, બ્રાયડન કાર્સને ફક્ત શ્રીલંકા સામેની શ્રેણી માટે તક આપવામાં આવી છે અને તે વર્લ્ડ કપ ટીમનો ભાગ નથી.
અનુભવી અને યુવા ખેલાડીઓનો સારો મેળ
ઇંગ્લેન્ડની ટીમમાં અનુભવ અને યુવાનીનું સરસ સંયોજન જોવા મળે છે.ભૂતપૂર્વ કેપ્ટન જોસ બટલર પોતાની વિસ્ફોટક બેટિંગથી ટીમને મજબૂત બનાવશે, જ્યારે ફિલ સોલ્ટ ઓપનિંગમાં ઝડપી શરૂઆત અપાવવાની ક્ષમતા ધરાવે છે.ઓલરાઉન્ડર સેમ કુરન અને વિલ જેક્સ બેટ અને બોલ બંનેથી મહત્વપૂર્ણ ભૂમિકા ભજવશે.સ્પિન વિભાગની જવાબદારી અનુભવી આદિલ રશીદ સંભાળશે, જે ભારતીય પિચ પર અત્યંત અસરકારક સાબિત થઈ શકે છે.
ગ્રુપ Cમાં ઇંગ્લેન્ડ, પ્રથમ મેચ નેપાળ સામે
ઇંગ્લેન્ડને ગ્રુપ C માં સ્થાન આપવામાં આવ્યું છે, જ્યાં તેની સાથે વેસ્ટ ઈન્ડિઝ, બાંગ્લાદેશ, નેપાળ અને ઇટાલી જેવી ટીમો સામેલ છે.ઇંગ્લેન્ડ પોતાનું વર્લ્ડ કપ અભિયાન 8 ફેબ્રુઆરીએ મુંબઈના ઐતિહાસિક વાનખેડે સ્ટેડિયમ ખાતે નેપાળ સામે શરૂ કરશે.ગ્રુપમાં ઇંગ્લેન્ડ માટે સૌથી કઠિન મુકાબલો વેસ્ટ ઈન્ડિઝ સામે માનવામાં આવે છે, જ્યારે બાંગ્લાદેશ પણ આશ્ચર્યજનક પ્રદર્શન કરી શકે છે. નેપાળ અને ઇટાલી સામે ઇંગ્લેન્ડ સ્પષ્ટ ફેવરિટ તરીકે મેદાનમાં ઉતરશે.
IPL પ્રતિબંધ છતાં હેરી બ્રુક પર વિશ્વાસ
હેરી બ્રુકને ગયા વર્ષે IPL હરાજીમાં પસંદ કરવામાં આવ્યો હતો, પરંતુ વ્યક્તિગત કારણોસર ટુર્નામેન્ટમાંથી ખસી જતા BCCI એ તેને બે વર્ષ માટે IPLમાંથી પ્રતિબંધિત કર્યો હતો. પરિણામે, તે આ વર્ષે પણ IPLમાં રમતા જોવા મળશે નહીં.
તેમ છતાં ECB એ તેના નેતૃત્વ ગુણો પર સંપૂર્ણ વિશ્વાસ દર્શાવ્યો છે અને તેને T20 વર્લ્ડ કપ જેવા મોટા મંચ પર કેપ્ટનશીપ સોંપી છે. હવે જોવાનું એ રહેશે કે હેરી બ્રુકની આગેવાની હેઠળ ઇંગ્લેન્ડ ટીમ ICC ટુર્નામેન્ટમાં કેટલું પ્રભાવશાળી પ્રદર્શન કરે છે.
ICC T20 વર્લ્ડ કપ 2026 માટે ઇંગ્લેન્ડની ટીમ
- હેરી બ્રુક (કેપ્ટન)
- રેહાન અહેમદ
- જોફ્રા આર્ચર
- ટોમ બેન્ટન
- જેકબ બેથેલ
- જોસ બટલર
- બ્રાયડન કાર્સ
- સેમ કુરન
- લિયામ ડોસન
- બેન ડકેટ
- વિલ જેક્સ
- જેમિ ઓવરટન
- આદિલ રશીદ
- ફિલ સોલ્ટ
- જોશ ટંગ
- લ્યુક વુડ
