વરસાદ અને ભૂસ્ખલનને કારણે મુખ્ય રસ્તાઓ બંધ, લોકોને સાવચેત રહેવાની અપીલ
જમ્મુ-કાશ્મીરના ડોડા જિલ્લામાં ભારે વરસાદ અને વાદળ ફાટવાની ઘટનાએ ગંભીર તારાજી સર્જી છે. મંગળવારે ડોડાના ભાલેશા વિસ્તારમાં વાદળ ફાટવાને કારણે સામાન્ય જનજીવન ખોરવાઈ ગયું છે. આ ઘટનામાં 3 થી 4 લોકોના મોત થયા હોવાના અહેવાલ છે, જ્યારે અનેક ઘરો પાણીમાં ધોવાઈ ગયા છે. આ સાથે, સતત વરસાદને કારણે સમગ્ર પ્રદેશમાં ભૂસ્ખલન અને પથ્થરો પડવાની ઘટનાઓ પણ વધી રહી છે.
આ ભારે વરસાદની સૌથી વધુ અસર જમ્મુ-શ્રીનગર રાષ્ટ્રીય ધોરીમાર્ગ (NH-44) પર જોવા મળી છે, જ્યાં ભૂસ્ખલનને કારણે વાહનવ્યવહાર સંપૂર્ણપણે ખોરવાઈ ગયો છે. ઘણી જગ્યાએ રસ્તાઓ પર કાટમાળ અને પથ્થરો પડવાથી ટ્રાફિક જામ થઈ ગયો છે અને રસ્તાઓ બંધ થયા છે.
રસ્તાઓ બંધ અને ટ્રાફિક ડાયવર્ટ
રામબન અને રિયાસી જિલ્લામાં પણ વરસાદનો કહેર જોવા મળ્યો છે. રિયાસી જિલ્લાના સિલા ગામ નજીક થયેલા ભૂસ્ખલનને કારણે કટરા-શિવખોરી રાષ્ટ્રીય ધોરીમાર્ગ પણ બંધ થઈ ગયો છે. વહીવટીતંત્રે તાત્કાલિક કાર્યવાહી કરીને ટ્રાફિકને વૈકલ્પિક માર્ગો પર ડાયવર્ટ કર્યો છે.
સ્થાનિક વહીવટીતંત્રે લોકોને આ વિસ્તારોમાં બિનજરૂરી મુસાફરી ટાળવા અને હવામાન સામાન્ય ન થાય ત્યાં સુધી ઘરની બહાર ન નીકળવાની સલાહ આપી છે. ડીએસપી રિયાસી વિશાલ જામવાલના જણાવ્યા અનુસાર, વરસાદથી બાલવા રોડ પણ પ્રભાવિત થયો છે.
આ ઉપરાંત, ચિનાબ નદીનું જળસ્તર સતત વધી રહ્યું છે
જેના કારણે નીચાણવાળા વિસ્તારોમાં પૂરનું જોખમ વધી ગયું છે. આવા સંવેદનશીલ વિસ્તારોમાં SDRF (સ્ટેટ ડિઝાસ્ટર રિસ્પોન્સ ફોર્સ) ની ટીમો તૈનાત કરવામાં આવી છે. વહીવટીતંત્રે નદી કિનારે રહેતા લોકોને ખાસ સાવધાની રાખવા અને સુરક્ષિત સ્થળોએ ખસી જવા માટે જણાવ્યું છે. આ પરિસ્થિતિમાં સ્થાનિક તંત્ર દ્વારા રાહત અને બચાવ કામગીરી પુરજોશમાં ચાલી રહી છે.
