શું તમે પણ ઇમોજી વગર વાત નથી કરી શકતા? તો જાણી લો કેવી રીતે બને છે આ નાનકડા ડિજિટલ આઈકોન્સ
આજના ડિજિટલ યુગમાં હસવાથી લઈને રડવા સુધી અને ગુસ્સાથી લઈને પ્રેમ સુધીની દરેક લાગણી વ્યક્ત કરવા માટે આપણી પાસે ઇમોજી ઉપલબ્ધ છે. ક્યારેક જે વાત આપણે લાંબા મેસેજમાં નથી સમજાવી શકતા, તે માત્ર એક નાનકડી ઇમોજી દ્વારા સેકન્ડોમાં કહી દઈએ છીએ. અત્યારે હાલમાં અંદાજે ૪,૦૦૦ થી વધુ ઇમોજી ચલણમાં છે અને દર વર્ષે તેમાં નવા સભ્યો ઉમેરાતા રહે છે.
પરંતુ, શું તમે ક્યારેય વિચાર્યું છે કે આ ઇમોજી કોણ બનાવે છે? તે કીબોર્ડ સુધી કેવી રીતે પહોંચે છે? અને શા માટે એપલ અને એન્ડ્રોઇડમાં એક જ ઇમોજી અલગ-અલગ દેખાય છે? ચાલો આજના સ્પેશિયલ એક્સપ્લેનરમાં ઇમોજીની આખી દુનિયા વિશે જાણીએ.
શું છે ઇમોજી અને ક્યારે થઈ તેની શરૂઆત?
ઇમોજી એ મૂળ જાપાનીઝ શબ્દ છે. તે ત્રણ અક્ષરોનો બનેલો છે: E (પિક્ચર), mo (લખવું) અને ji (કેરેક્ટર). જો વ્યાખ્યા મુજબ જોઈએ તો, ઇમોજી એ એક નાનુંPicktogram અથવા આઇકોન છે, જે ઇલેક્ટ્રોનિક સંવાદમાં ઈમોશન્સ, ઓબ્જેક્ટ્સ કે આઈડિયા વ્યક્ત કરવા માટે વપરાય છે.
-
ઇતિહાસ: ઇમોજીની શરૂઆત ૧૯૯૯માં જાપાનના ગ્રાફિક આર્ટિસ્ટ શિગેટાકા કુરીતા (Shigetaka Kurita) એ કરી હતી. તેમણે ૧૭૬ સિમ્બોલ્સનો પહેલો સેટ તૈયાર કર્યો હતો.
-
વિશ્વવ્યાપી ઓળખ: ૨૦૦૦ના દાયકા બાદ જ્યારે સ્માર્ટફોનનો યુગ આવ્યો, ત્યારે ઇમોજી જાપાનની સરહદો ઓળંગીને આખા વિશ્વમાં ફેલાઈ ગઈ. આજે સ્થિતિ એવી છે કે દુનિયાની આશરે ૯૨% ઓનલાઇન વસ્તી ઇમોજીનો ઉપયોગ કરે છે.
નવી ઇમોજી કેવી રીતે બને છે?
ઇમોજી ભલે જોવામાં એક રંગીન ચિત્ર જેવી લાગે, પરંતુ ટેકનિકલ રીતે તે યુનિકોડ (Unicode) કોડથી બનેલી હોય છે. તેના નિર્માણની પ્રક્રિયા ખૂબ જ લાંબી અને વ્યવસ્થિત હોય છે.
૧. કોઈ પણ વ્યક્તિ પ્રસ્તાવ મૂકી શકે છે
તમને જાણીને નવાઈ લાગશે કે નવી ઇમોજીનો આઈડિયા કોઈ પણ સામાન્ય વ્યક્તિ આપી શકે છે. જો તમને લાગે કે કીબોર્ડમાં કોઈ ચોક્કસ ઇમોજી ખૂટે છે, તો તમે તેનો પ્રસ્તાવ Unicode Consortium ને મોકલી શકો છો.
૨. પસંદગીના કડક માપદંડ
તમારો આઈડિયા ત્યારે જ સ્વીકારવામાં આવે છે જ્યારે તે નીચેના ક્રાઈટેરિયા પૂરા કરતો હોય:
-
સ્પષ્ટતા: શું આ ઇમોજી ખૂબ નાની સાઈઝમાં પણ ઓળખી શકાય તેવી છે?
-
ઉપયોગિતા: શું આ ઇમોજીનો ઉપયોગ મોટી સંખ્યામાં લોકો કરશે?
-
નવીનતા: શું તે અસ્તિત્વમાં રહેલી ઇમોજી કરતા અલગ છે?
-
તર્ક: તમારે પુરાવા આપવા પડે છે કે આ ઇમોજી કેમ જરૂરી છે અને તે કયા મલ્ટીપલ કોન્સેપ્ટને સપોર્ટ કરે છે.
કોણ આપે છે મંજૂરી? (The Unicode Consortium)
ઇમોજીને મંજૂરી આપવાનું કામ કેલિફોર્નિયા સ્થિત એક નોન-પ્રોફિટ ઓર્ગેનાઈઝેશન ‘યુનિકોડ કન્સોર્ટિયમ’ કરે છે.
રસપ્રદ હકીકત: આ સંસ્થામાં માત્ર ટેકનિશિયન જ નહીં, પરંતુ ભાષાશાસ્ત્રીઓ, ટાઇપોગ્રાફી નિષ્ણાતો અને ગૂગલ, એપલ, માઇક્રોસોફ્ટ જેવી કંપનીઓના પ્રતિનિધિઓ પણ સામેલ હોય છે. તેમનું મુખ્ય મિશન દુનિયાની દરેક ભાષાના લખાણને દરેક કોમ્પ્યુટર પર એકસમાન રીતે કામ કરતું બનાવવાનું છે.
એપલ અને ગૂગલમાં ઇમોજી અલગ કેમ દેખાય છે?
એપલ અને ગૂગલમાં ઇમોજી અલગ કેમ દેખાય છે?જ્યારે યુનિકોડ કન્સોર્ટિયમ કોઈ ઇમોજીને મંજૂરી આપે છે, ત્યારે તેઓ માત્ર એક ‘કોડ પોઈન્ટ’ અસાઈન કરે છે, કોઈ ચોક્કસ ચિત્ર નહીં.
ત્યારબાદ દરેક ટેક વ્રેન્ડર (એપલ, ગૂગલ, સેમસંગ, ફેસબુક વગેરે) તે કોડના આધારે પોતાની ડિઝાઇન ટીમ પાસે ઇમોજી તૈયાર કરાવે છે. દરેક કંપની પોતાની બ્રાન્ડની સ્ટાઈલ મુજબ રંગ અને શેડિંગમાં ફેરફાર કરે છે. આ જ કારણ છે કે આઇફોન યુઝર્સને જે ઇમોજી ‘ગ્લોસી’ લાગે છે, તે જ એન્ડ્રોઇડમાં થોડી અલગ દેખાઈ શકે છે.
ઇમોજી સાથે જોડાયેલા વિવાદો
ઓનલાઇન જગતમાં ઇમોજી પણ વિવાદોથી બચી શકી નથી. વર્ષ ૨૦૧૭માં ‘બર્ગર ઇમોજી’ ને લઈને મોટો હોબાળો થયો હતો.
-
યુઝર્સે જોયું કે ગૂગલની ઇમોજીમાં ચીઝ (Cheese) બર્ગરના નીચેના ભાગમાં હતું, જ્યારે એપલમાં તે ઉપર હતું.
-
સોશિયલ મીડિયા પર આ વાત એટલી ચર્ચામાં રહી કે છેવટે ગૂગલના CEO સુંદર પિચાઈએ રમુજી અંદાજમાં ટ્વીટ કરીને તેને સુધારવાની ખાતરી આપવી પડી હતી.
ઇમોજીનું ભવિષ્ય
ઇમોજી માત્ર સમય પસાર કરવાનું સાધન નથી, પણ તે વૈશ્વિક સંવાદની એક નવી ભાષા બની ગઈ છે. એડોબના નિષ્ણાતો માને છે કે ઇમોજી ભાષાના અવરોધો દૂર કરે છે અને ડિજિટલ વાતચીતમાં માનવીય લાગણીઓ ઉમેરે છે.
ભવિષ્યમાં ઇમોજી વધુ સર્વસમાવેશક (Inclusive) બનશે, જેમાં વિવિધ સંસ્કૃતિઓ, વ્યવસાયો અને શારીરિક સ્થિતિઓનું પ્રતિનિધિત્વ વધશે.
નિષ્કર્ષ
ઇમોજીના એક નાનકડા આઈકન પાછળ મહિનાઓની રિસર્ચ, કાયદાકીય મંજૂરીઓ અને ટેકનિકલ કોડિંગ છુપાયેલું હોય છે. આગલી વખતે જ્યારે તમે કોઈને ‘હસતી ઇમોજી’ મોકલો, ત્યારે યાદ કરજો કે તે જાપાનના એક આર્ટિસ્ટના આઈડિયાથી શરૂ થઈને કેલિફોર્નિયાની ઓફિસ સુધીની લાંબી સફર ખેડીને તમારી આંગળીના ટેરવે પહોંચી છે!
