244 રનની કારમી હાર બાદ ગૌતમ ગંભીરનો બેટ્સમેનો પર ગુસ્સો! કહ્યું- આંતરરાષ્ટ્રીય ક્રિકેટમાં કોઈ બોલ રમી ન શકાય તેવો હોતો નથી
ન્યૂઝીલેન્ડ સામેની ચોથી વન-ડેમાં ભારતીય ટીમની શરમજનક હાર બાદ મુખ્ય કોચ ગૌતમ ગંભીરનો ગુસ્સો સ્પષ્ટપણે જોવા મળ્યો હતો. ટીમ ઈન્ડિયા 334 રનના લક્ષ્યાંકનો પીછો કરતાં માત્ર 89 રનમાં ઓલઆઉટ થઈ ગઈ હતી અને 244 રનથી કારમી હારનો સામનો કરવો પડ્યો હતો. આ હાર બાદ કેપ્ટન શ્રેયસ અય્યરે પિચની સ્થિતિ અને ન્યૂઝીલેન્ડની શાનદાર બોલિંગને ભારતીય બેટ્સમેનોની નિષ્ફળતાનું કારણ ગણાવ્યું હતું. જોકે, કોચ ગંભીર આ દલીલ સાથે સહમત દેખાયા નહોતા. તેમણે સ્પષ્ટ શબ્દોમાં કહ્યું કે આંતરરાષ્ટ્રીય ક્રિકેટમાં કોઈ પણ બોલ એવો હોતો નથી જેને રમી જ ન શકાય. બેટ્સમેનોએ મુશ્કેલ પરિસ્થિતિઓમાં પણ પોતાની જવાબદારી સમજવી જોઈએ. ગંભીરના આ નિવેદન બાદ હવે ભારતીય બેટિંગ લાઇનઅપના પ્રદર્શન પર સવાલો ઊભા થયા છે.
13 નવેમ્બરે માઉન્ટ મૌંગાનુઈના બે ઓવલ મેદાન પર રમાયેલી આ મેચમાં ન્યૂઝીલેન્ડે પ્રથમ બેટિંગ કરીને 50 ઓવરમાં 333 રન બનાવ્યા હતા. જવાબમાં ભારતીય ટીમ માત્ર 26.4 ઓવરમાં 89 રન બનાવીને સમેટાઈ ગઈ હતી. મેટ હેનરીએ શરૂઆતની ઓવરમાં જ રોહિત શર્મા, વિરાટ કોહલી અને શ્રેયસ અય્યરને શૂન્ય પર આઉટ કરીને ભારતને મોટો ઝટકો આપ્યો હતો.
‘આંતરરાષ્ટ્રીય ક્રિકેટમાં કોઈ બોલ અનપ્લેયેબલ નથી’
મેચ બાદ પ્રેસ કોન્ફરન્સમાં ગૌતમ ગંભીરને ભારતીય બેટ્સમેનોના નિરાશાજનક પ્રદર્શન અંગે સવાલ કરવામાં આવ્યા હતા. આ દરમિયાન તેમણે બેટ્સમેનોનો બચાવ કરવાને બદલે તેમની જવાબદારી પર ભાર મૂક્યો હતો.ગંભીરે કહ્યું હતું કે આંતરરાષ્ટ્રીય ક્રિકેટમાં કોઈ બોલ એવો હોતો નથી જેને રમી ન શકાય. મેટ હેનરીએ ચોક્કસપણે શાનદાર બોલિંગ કરી હતી અને યોગ્ય જગ્યાએ બોલ નાખ્યા હતા, પરંતુ ભારતીય બેટ્સમેનો પાસે તેનો સામનો કરવાની ક્ષમતા હોવી જોઈએ.
તેમણે વધુમાં જણાવ્યું કે ભારતે શરૂઆતની 10 ઓવર સંભાળીને રમવાની જરૂર હતી. જ્યારે કોઈ ટીમ 90 રનની આસપાસ ઓલઆઉટ થઈ જાય છે, ત્યારે ચિંતા થવી સ્વાભાવિક છે. આ પ્રકારની પરિસ્થિતિઓ આગામી વન-ડે વર્લ્ડ કપની પરિસ્થિતિઓ જેવી હોઈ શકે છે. તેથી ભારતીય ખેલાડીઓએ અત્યારથી જ આવી પરિસ્થિતિઓમાં રમવા માટે માનસિક અને ટેકનિકલ રીતે તૈયાર થવું પડશે.
ગંભીરના આ નિવેદનને શ્રેયસ અય્યરના નિવેદનથી અલગ માનવામાં આવી રહ્યું છે. અય્યરે કહ્યું હતું કે બીજી ઇનિંગ્સમાં બોલની હિલચાલમાં ફેરફાર થયો હતો અને બેટ્સમેનો સારી બોલિંગનો ભોગ બન્યા હતા. બીજી તરફ ગંભીરનું માનવું છે કે આંતરરાષ્ટ્રીય સ્તરના બેટ્સમેનોએ આવી પરિસ્થિતિઓનો સામનો કરવાની રીત શોધવી જોઈએ.
અગાઉની મેચમાં પણ સાત વિકેટ ગુમાવી હતી, ગંભીરની ચિંતા વધી
ગૌતમ ગંભીરને માત્ર ચોથી વન-ડેમાં થયેલી હારની જ ચિંતા નહોતી. તેમણે અગાઉની બીજી વન-ડેનું ઉદાહરણ આપીને પણ ભારતીય બેટિંગની નબળાઈ તરફ ધ્યાન દોર્યું હતું.બીજી વન-ડેમાં ભારતે ડકવર્થ-લુઈસ (DLS) નિયમ હેઠળ જીત મેળવી હતી, પરંતુ તે મેચમાં પણ ટીમે માત્ર 111 રન સુધીમાં સાત વિકેટ ગુમાવી દીધી હતી. ગંભીરના મતે, સતત આ રીતે વિકેટો પડવી ટીમ માટે ચિંતાનો વિષય છે.
તેમણે કહ્યું હતું કે આવી પરિસ્થિતિઓમાં માનસિક મજબૂતી અને કૌશલ્ય બંને જરૂરી છે. શરૂઆતની મુશ્કેલીઓ સામે બેટ્સમેનોએ ધીરજ રાખવી જોઈએ. જો શરૂઆતની 10 ઓવરમાં વિકેટ ગુમાવ્યા વિના 35થી 40 રન બને તો પણ તે ટીમ માટે સારો પાયો બની શકે છે. ભારતીય ટીમ પાસે અનુભવી ખેલાડીઓ છે અને તેમને આશા છે કે અંતિમ મેચમાં ખેલાડીઓ પરિસ્થિતિ પ્રમાણે પોતાની રમતને ઢાળશે.
What a performance in Tauranga 👌
Matt Henry with a career-best of 6/27 leads the BLACKCAPS to a 244 run win.
📸 @PhotosportNZ https://t.co/rkQq4rEDMs
— BLACKCAPS (@BLACKCAPS) November 13, 2026
ગંભીરે વોબલ સીમ બોલિંગ અંગે પણ વાત કરી હતી. તેમણે કહ્યું કે તેઓ ટેકનિકલ બાબતોમાં વધારે ઊંડા ઉતરવા માંગતા નથી. તેમના મતે, બોલમાં વધારે હિલચાલ નહોતી, પરંતુ બોલની યોગ્ય લાઇન અને લેન્થ ભારતીય બેટ્સમેનો માટે મુશ્કેલીનું કારણ બની હતી. બેટ્સમેનો ક્રીઝ પર જ અટવાઈ ગયા હતા.
બોલરોનો કર્યો બચાવ, ફિલ્ડિંગની ભૂલોને ગણાવી હારનું કારણ
ભારતીય ટીમના મુખ્ય કોચે બેટિંગની નિષ્ફળતા પર નારાજગી વ્યક્ત કરી હતી, પરંતુ બોલિંગ યુનિટનો બચાવ કર્યો હતો. ન્યૂઝીલેન્ડે 333 રન બનાવ્યા હોવા છતાં ગંભીરે ભારતીય બોલરોની ખાસ ટીકા કરી નહોતી. જોકે, ફિલ્ડિંગમાં થયેલી ભૂલોને તેમણે હારનું એક મહત્વનું કારણ ગણાવ્યું હતું.ખાસ કરીને ન્યૂઝીલેન્ડના બેટ્સમેન વિલ યંગના છૂટેલા કેચનો ઉલ્લેખ કરતાં ગંભીરે કહ્યું હતું કે જો યંગની વિકેટ મળી ગઈ હોત તો મેચનું પરિણામ કદાચ અલગ હોઈ શક્યું હોત. તેમણે ભારતીય બોલર આકિબ નબીનો પણ ઉલ્લેખ કર્યો હતો અને કહ્યું હતું કે તે કમનસીબ રહ્યો હતો. કેચ છોડવાની કિંમત ટીમે ચૂકવવી પડી હતી.
