ભારત-પાકિસ્તાન હોકી મુકાબલા માટે તૈયાર થઈ જાઓ, ભારતીય ધરતી પર થશે હાઈવોલ્ટેજ ટક્કર
ભારત અને પાકિસ્તાન જ્યારે પણ રમતના મેદાનમાં આમને-સામને આવે છે, ત્યારે મુકાબલાની રોમાંચકતા અનેકગણી વધી જાય છે. બંને દેશોની ટીમો વચ્ચેની ઐતિહાસિક હરીફાઈને કારણે આવા મુકાબલા પર માત્ર એશિયા જ નહીં, પરંતુ વિશ્વભરના રમતપ્રેમીઓની નજર રહે છે. હવે ભારત અને પાકિસ્તાન ફરી એક વખત સામસામે આવવાના છે. જોકે આ વખતે મુકાબલો ક્રિકેટના મેદાનમાં નહીં, પરંતુ હોકીના મેદાનમાં જોવા મળશે. ખાસ વાત એ છે કે આ હાઈવોલ્ટેજ મેચ ભારતીય ધરતી પર રમાવાની છે.
‘પુરુષ એશિયન ચેમ્પિયન્સ ટ્રોફી 2026’નું આયોજન પંજાબમાં કરવામાં આવશે. ટુર્નામેન્ટ 27 ઓક્ટોબરથી શરૂ થઈને 5 નવેમ્બર સુધી ચાલશે. પંજાબના મુખ્યમંત્રી ભગવંત માને ટુર્નામેન્ટના કાર્યક્રમની જાહેરાત કરી છે. ભારત અને પાકિસ્તાન વચ્ચેની અત્યંત પ્રતિક્ષિત મેચ 1 નવેમ્બરે રમાશે. બંને ટીમો વચ્ચેની હોકીની પરંપરાગત હરીફાઈને જોતા આ મેચ ટુર્નામેન્ટના સૌથી ચર્ચિત મુકાબલાઓમાંની એક બનવાની છે.
પંજાબમાં છ ટીમો વચ્ચે થશે ટક્કર
હોકી ઈન્ડિયા દ્વારા જાહેર કરવામાં આવેલી માહિતી અનુસાર, ટુર્નામેન્ટમાં યજમાન અને ડિફેન્ડિંગ ચેમ્પિયન ભારત ઉપરાંત પાકિસ્તાન, દક્ષિણ કોરિયા, મલેશિયા, ચીન અને જાપાન ભાગ લેશે. આ ઉપરાંત ઓમાન અને બાંગ્લાદેશને રિઝર્વ ટીમો તરીકે રાખવામાં આવ્યા છે.આ ટુર્નામેન્ટનું આયોજન પંજાબના બે શહેરોમાં કરવામાં આવશે. ગ્રુપ સ્ટેજની મેચો જલંધરના ‘ઓલિમ્પિયન સુરજીત સિંહ હોકી સ્ટેડિયમ’માં રમાશે. જલંધરમાં 2 નવેમ્બર સુધી ગ્રુપ સ્ટેજની મેચો યોજાશે અને અહીં જ ટુર્નામેન્ટનો ઉદ્ઘાટન સમારોહ પણ રાખવામાં આવ્યો છે.
ગ્રુપ સ્ટેજ બાદ ટુર્નામેન્ટ નોકઆઉટ તબક્કામાં પ્રવેશ કરશે. સેમી-ફાઈનલની બંને મેચ 4 નવેમ્બરે મોહાલીના ‘ઓલિમ્પિયન બલબીર સિંહ સિનિયર ઈન્ટરનેશનલ હોકી સ્ટેડિયમ’માં રમાશે. ત્યારબાદ 5 નવેમ્બરે આ જ મેદાન પર ટુર્નામેન્ટની ફાઈનલ યોજાશે. આ રીતે પંજાબના બે મહત્વપૂર્ણ શહેરો એશિયાની ટોચની હોકી ટીમોના મુકાબલાના સાક્ષી બનશે.
1 નવેમ્બરે ભારત-પાકિસ્તાનની હાઈવોલ્ટેજ મેચ
ટુર્નામેન્ટમાં સૌથી વધુ ચર્ચા ભારત અને પાકિસ્તાન વચ્ચેની 1 નવેમ્બરની મેચને લઈને થઈ રહી છે. બંને દેશોની હોકી ટીમો વચ્ચે લાંબા સમયથી કટ્ટર હરીફાઈ જોવા મળે છે. પરિણામે જ્યારે પણ બંને ટીમો એકબીજા સામે મેદાનમાં ઉતરે છે, ત્યારે મેચનું મહત્વ માત્ર પોઈન્ટ્સ સુધી મર્યાદિત રહેતું નથી.ભારત અને પાકિસ્તાનની ટીમો તાજેતરમાં ‘ACC મહિલા એશિયા કપ 2026’માં પણ સામસામે આવી હતી. હવે બંને દેશોની પુરુષ હોકી ટીમો વચ્ચેની ટક્કર માટે ચાહકોમાં ઉત્સુકતા જોવા મળી રહી છે. ભારતીય ધરતી પર યોજાનારી આ મેચને કારણે બંને ટીમો ઉપરાંત આયોજકો માટે પણ આ મુકાબલો ખાસ બની રહેશે.
જોકે, પાકિસ્તાની ટીમનો ભારત પ્રવાસ હજુ સંપૂર્ણ રીતે નિશ્ચિત થયો નથી. પાકિસ્તાન હોકી ફેડરેશન (PHF)ના પ્રમુખ મોહિઉદ્દીન અહેમદ વાનીએ 14 સપ્ટેમ્બરે જણાવ્યું હતું કે પાકિસ્તાની ટીમનો ભારત પ્રવાસ સરકારની મંજૂરી પર નિર્ભર રહેશે. તેમણે સ્પષ્ટ કર્યું હતું કે ફેડરેશન આ મામલે સરકારના નિર્દેશો અનુસાર આગળની કાર્યવાહી કરશે.અર્થાત્, 1 નવેમ્બરની નિર્ધારિત મેચ હોવા છતાં પાકિસ્તાની ટીમના ભારત પ્રવાસ અંગે અંતિમ નિર્ણય તેની સરકારની મંજૂરી બાદ જ સ્પષ્ટ થશે.
Hon’ble Chief Minister of Punjab, Shri Bhagwant Mann, made an official announcement in Mohali on Monday about the dates of AHF Men’s Asian Champions Trophy 2026, which will be hosted in Mohali & Jalandhar from October 27 to November 5. Also present on the occasion were Hockey India’s Secretary General Shri Bhola Nath Singh, Director General Cdr RK Srivastava, Executive Board Member Shri RP Singh and Hockey Punjab President Shri Nitin Kohli.
The tournament’s Opening Ceremony & league-stage matches will be held in Jalandhar, while the semis and the final will be hosted in Mohali.
#HockeyIndia #IndiaKaGame @BhagwantMann
— Hockey India (@TheHockeyIndia) September 14, 2026
ભારત પાસે સતત ત્રીજી વખત ચેમ્પિયન બનવાની તક
એશિયન ચેમ્પિયન્સ ટ્રોફીનું આયોજન પુરુષ હોકીમાં 2011થી થઈ રહ્યું છે. અત્યાર સુધી ભારત આ ટુર્નામેન્ટમાં સૌથી સફળ ટીમ રહી છે. ભારતે પાંચ વખત એશિયન ચેમ્પિયન્સ ટ્રોફીનો ખિતાબ જીત્યો છે. ભારતીય ટીમે છેલ્લી બે આવૃત્તિઓમાં પણ ચેમ્પિયન બનીને પોતાનું વર્ચસ્વ જાળવી રાખ્યું છે.હવે 2026ની આવૃત્તિમાં ભારત પાસે સતત ત્રીજી વખત ટાઇટલ જીતવાની તક છે. બીજી તરફ પાકિસ્તાને પણ આ ટુર્નામેન્ટમાં ત્રણ વખત ચેમ્પિયન બનવાનું ગૌરવ મેળવ્યું છે. તેથી બંને ટીમો વચ્ચેની મેચ માત્ર પરંપરાગત હરીફાઈને કારણે જ નહીં, પરંતુ ટુર્નામેન્ટના સંદર્ભમાં પણ મહત્વપૂર્ણ બની શકે છે.
