દિવાળી અને ધનતેરસે ઓટો માર્કેટમાં ધમાકો! જાણો ક્યા વાહનની ખરીદીમાં થયો 44% નો મોટો ઉછાળો?
ભારતીય ઓટોમોબાઇલ રિટેલ ક્ષેત્ર માટે આ વર્ષનો ઓક્ટોબર મહિનો અત્યંત સકારાત્મક અને પ્રોત્સાહક સાબિત થયો છે. વાહન વેચાણના આંકડા દર્શાવે છે કે સપ્ટેમ્બર મહિનાની સરખામણીએ ઓક્ટોબરમાં રિટેલ વેચાણમાં ૨૫.૦૫ ટકાનો જંગી મિહના દર મહિને (MoM) વધારો નોંધાયો છે. આ સાથે જ આ ઓક્ટોબર મહિનો દેશના ઓટોમોબાઇલ ઇતિહાસનો બીજા નંબરનો સૌથી સફળ ઓક્ટોબર મહિનો બની રહ્યો છે.
બજારમાં જોવા મળી રહેલી આ તેજીથી ડીલરોમાં પણ ભારે ઉત્સાહ જોવા મળી રહ્યો છે. પૌરાણિક અને ધાર્મિક મહત્વ ધરાવતા મોટો પર્વો જેવા કે ધનતેરસ અને દિવાળીના કારણે ઓટો ડીલરોના ૫૧.૬૫ ટકાથી વધુ વેપારીઓ આશાવાદી છે કે નવેમ્બર મહિનામાં વાહનોનું વેચાણ હજુ પણ નવો રેકોર્ડ સર્જશે.
FADA નો રિપોર્ટ: કુલ ૩૧.૭૨ લાખથી વધુ વાહનોનું વેચાણ
ફેડરેશન ઓફ ઓટોમોબાઇલ ડીલર્સ એસોસિએશન (FADA) દ્વારા જાહેર કરવામાં આવેલા સત્તાવાર આંકડા મુજબ, ઓક્ટોબર મહિનામાં દેશભરમાં કુલ ૩૧,૭૨,૪૬૬ વાહનોનું રિટેલ વેચાણ થયું હતું.
ફાડાના પ્રમુખ સાઈ ગિરિધરે આ આંકડાઓ અંગે વિગતવાર માહિતી આપતા જણાવ્યું હતું કે, તહેવારોની કેલેન્ડર તારીખોમાં થયેલા ફેરફારોને કારણે વર્ષ દર વર્ષ (YoY) સરખામણીમાં વેચાણનો આંકડો થોડો નીચો દેખાઈ શકે છે, પરંતુ જો સપ્ટેમ્બર મહિના સાથે સરખામણી કરવામાં આવે તો વેચાણમાં આવેલો મોટો ઉછાળો ગ્રાહકોની મજબૂત તહેવારી માંગને સ્પષ્ટપણે રજૂ કરે છે. તેમણે ખાસ નોંધ્યું હતું કે કોમર્શિયલ વ્હીકલ્સ (વ્યાપારી વાહનો), થ્રી-વ્હીલર્સ અને ટ્રેક્ટર સેગમેન્ટે આ ઓક્ટોબરમાં તેમનું અત્યાર સુધીનું સર્વશ્રેષ્ઠ વેચાણ હાંસલ કર્યું છે.
ટૂ-વ્હીલર અને કોમર્શિયલ વાહનોનું પ્રદર્શન
જો વાહનોના અલગ-અલગ સેગમેન્ટ પર નજર કરીએ તો, ટૂ-વ્હીલર સેગમેન્ટમાં સપ્ટેમ્બરની સરખામણીએ ૨૯.૬૭ ટકાનો નોંધપાત્ર સુધારો જોવા મળ્યો છે. જોકે, ઊંડાણપૂર્વક અભ્યાસ કરતા માલૂમ પડે છે કે શહેરી વિસ્તારો (૨૦.૭૭% ઘટાડો) ની સરખામણીએ ગ્રામીણ વિસ્તારોમાં ટૂ-વ્હીલરના વેચાણમાં ૩૩.૯૭ ટકાનો વધુ તીવ્ર ઘટાડો જોવા મળ્યો હતો, ખાસ કરીને ઉત્તર ભારતના બજારોમાં આ અસર વધુ રહી હતી.
ફાડા પ્રમુખ ગિરિધરે સ્પષ્ટતા કરી હતી કે ગ્રામીણ બજારોમાં આ માંગ સાવ પૂરી નથી થઈ ગઈ, પરંતુ તહેવારોના સમયપત્રકને કારણે ગ્રાહકોએ ખરીદી થોડી પાછળ ઠેલી છે.
બીજી તરફ, કોમર્શિયલ વાહનોના ક્ષેત્રે એક ઐતિહાસિક શિખર સર કર્યું છે. આ સફળતા પાછળ હેવી કોમર્શિયલ વ્હીકલ્સ (HCVs) ના વેચાણમાં થયેલો ૨૮.૯૫ ટકાનો મોટો ઉછાળો મુખ્ય કારણ રહ્યો છે, જે દેશમાં ઔદ્યોગિક અને માલસામાન હેરફેરની વધતી પ્રવૃત્તિ દર્શાવે છે.
પેસેન્જર વ્હીકલ્સ અને ઈલેક્ટ્રિક વાહનો (EV) નો દબદબો
પેસેન્જર વ્હીકલ (કાર અને એસયુવી) સેગમેન્ટ માટે પણ આ ઓક્ટોબર ખૂબ જ સફળ રહ્યો છે. ઓક્ટોબર મહિનામાં કુલ ૫,૦૭,૭૬૮ પેસેન્જર વાહનોનું રજિસ્ટ્રેશન થયું હતું, જે ઇતિહાસમાં ઓક્ટોબર મહિનાનું ત્રીજું સૌથી વધુ વેચાણ છે.
વાહન ઉત્પાદકો (OEMs) દ્વારા ડીલરોને રેકોર્ડ સ્તરે જથ્થાબંધ માલ (Wholesale Dispatches) મોકલવામાં આવ્યો હોવા છતાં, પેસેન્જર વાહનોની ડીલર ઇન્વેન્ટરી ૪૩ થી ૪૫ દિવસના સામાન્ય અને સ્થિર સ્તર પર જળવાઈ રહી છે, જે દર્શાવે છે કે શોરૂમમાંથી કારોનું વેચાણ ખૂબ ઝડપથી થઈ રહ્યું છે.
આ ઉપરાંત, દેશમાં ક્લીન મોબિલિટી એટલે કે ઇલેક્ટ્રિક વાહનો (EV) ને પણ અપ્રતિમ પ્રતિસાદ મળ્યો છે. ઓક્ટોબરમાં ઇલેક્ટ્રિક વાહનોનું રિટેલ વેચાણ લગભગ ૩.૫૫ લાખ યુનિટની અત્યાર સુધીની સર્વોચ્ચ સપાટીએ પહોંચી ગયું છે. ગત વર્ષની સરખામણીએ ઇલેક્ટ્રિક વાહનોના વેચાણમાં ૪૪.૮૮ ટકાનો જંગી વધારો થયો છે, જેના કારણે કુલ વાહન વેચાણમાં EV નું માર્કેટ પેનિટ્રેશન વધીને આશરે ૧૧.૫ ટકા સુધી પહોંચી ગયું છે. આ આંકડા દર્શાવે છે કે ભારતીય ગ્રાહકો હવે પર્યાવરણને અનુકૂળ વાહનો તરફ ઝડપથી વળી રહ્યા છે.
