ભારતીય નૌસેના ‘હાઈ એલર્ટ’ પર! ઓમાનની ખાડીમાં INS સુરત તૈનાત, મધ્ય-પૂર્વના જંગ વચ્ચે ભારતનો માસ્ટર પ્લાન

મિડલ ઈસ્ટમાં યુદ્ધની જ્વાળા વચ્ચે ભારતીય નૌસેના એલર્ટ: ઓમાનની ખાડીમાં INS સુરત તૈનાત

મધ્ય-પૂર્વ (મિડલ ઈસ્ટ) માં ચાલી રહેલા ભીષણ સંઘર્ષની અસર હવે આંતરરાષ્ટ્રીય હવાઈ અને દરિયાઈ વાહનવ્યવહાર પર સ્પષ્ટપણે જોવા મળી રહી છે. ઈઝરાયેલ, અમેરિકા અને ઈરાન વચ્ચે વધતા તણાવને કારણે અનેક ફ્લાઈટ્સ રદ કરવામાં આવી છે, જેના કારણે મોટી સંખ્યામાં ભારતીય નાગરિકો ત્યાં ફસાયા છે. ભારત સરકાર આ નાગરિકોને વિશેષ વિમાનો દ્વારા પરત લાવી રહી છે, પરંતુ સાથે જ દરિયાઈ માર્ગે પણ સુરક્ષા અને બચાવ કામગીરી માટે ભારતીય નૌસેનાને હાઈ એલર્ટ પર રાખવામાં આવી છે.

INS સુરત: ઓમાનની ખાડીમાં ભારતની મજબૂત હાજરી

સૂત્રોના જણાવ્યા અનુસાર, ભારતીય નૌસેનાનું અત્યાધુનિક ગાઈડેડ મિસાઈલ ડિસ્ટ્રોયર INS સુરત હાલમાં ઓમાનની ખાડીમાં તૈનાત કરવામાં આવ્યું છે. જો સ્થિતિ વધુ વણસે અને નાગરિકોને સમુદ્ર માર્ગે સુરક્ષિત બહાર કાઢવાની જરૂર પડે, તો આ યુદ્ધજહાજ ઓપરેશનમાં મહત્વની ભૂમિકા ભજવી શકે છે. આ યુદ્ધજહાજ દુશ્મનના રડારને થાપ આપીને ઓપરેશન કરવાની ક્ષમતા ધરાવે છે અને તે મધ્ય-પૂર્વના અશાંત વિસ્તારો પર નજર રાખી રહ્યું છે.

યુદ્ધજહાજની તાકાત અને વિશેષતાઓ

INS સુરત એ ભારતીય નૌસેનાના સૌથી શક્તિશાળી જહાજોમાંનું એક છે. તેની લંબાઈ 163 મીટર અને વજન આશરે 7400 ટન છે. તેની વિશેષતાઓ નીચે મુજબ છે:

અત્યાધુનિક યુદ્ધ માટે તૈયાર ભારત: 20,000 કરોડના સ્વદેશી ડ્રોનથી સજ્જ થશે સેના

કેરળમાં આજથી ચોમાસાનું સત્તાવાર આગમન, દેશના ૧૨ રાજ્યોમાં ભારે વરસાદની આશંકા

• ઝડપ: તે મહત્તમ 30 નોટિકલ માઈલ પ્રતિ કલાકની ઝડપે દોડી શકે છે.
• હથિયારો: આ જહાજ 32 મીડિયમ રેન્જની સપાટીથી હવામાં માર કરનારી મિસાઈલો અને 16 બ્રહ્મોસ એન્ટી-શિપ મિસાઈલોથી સજ્જ છે.
• ટેકનોલોજી: તેમાં ચાર શક્તિશાળી ગેસ ટર્બાઇન એન્જિન, અત્યાધુનિક સર્વેલન્સ રડાર, સબમરીન વિરોધી રોકેટ અને ટોર્પિડો લોન્ચર્સ છે.

ભારતીય વ્યાપાર માટે વ્યૂહાત્મક મહત્વ

ભારત માટે અદનની ખાડી અને ઓમાનની ખાડી અત્યંત મહત્વની છે, કારણ કે ભારતનો મોટો વ્યાપાર સ્વેઝ નહેર અને લાલ સમુદ્ર (રેડ સી) દ્વારા આ માર્ગેથી પસાર થાય છે. જો આ માર્ગ યુદ્ધને કારણે બંધ થાય, તો જહાજોએ આફ્રિકાના છેડા ‘કેપ ઓફ ગુડ હોપ’ ફરીને લાંબો રસ્તો કાપવો પડે, જે સમય અને ખર્ચ બંનેમાં વધારો કરે છે. આથી, ભારતીય નૌસેના માત્ર નાગરિકોની સુરક્ષા માટે જ નહીં, પણ વ્યાપારી હિતોના રક્ષણ માટે પણ સતર્ક છે.

‘મિશન ડેપ્લોયમેન્ટ’ હેઠળ સતત દેખરેખ

વર્ષ 2017 થી ભારતીય નૌસેનાએ ‘મિશન ડેપ્લોયમેન્ટ’ ની વ્યૂહરચના અપનાવી છે. આ અંતર્ગત હોર્મુઝની સ્ટ્રેટ, અદનની ખાડી, સેશેલ્સ, માલદીવ અને આંદામાન-નિકોબાર જેવા મહત્વના દરિયાઈ વિસ્તારોમાં ભારતીય યુદ્ધજહાજો 24 કલાક તૈનાત રહે છે. મધ્ય-પૂર્વમાં તણાવ વધતા, જરૂર પડ્યે અન્ય જહાજોને પણ ટૂંકા સમયમાં ઓમાનની ખાડી તરફ મોકલવાની નૌસેનાની પૂરી તૈયારી છે.

ભારત સરકાર અને સંરક્ષણ મંત્રાલય સ્થિતિ પર સતત નજર રાખી રહ્યા છે જેથી દરેક ભારતીય નાગરિકને સુરક્ષિત રીતે વતન પરત લાવી શકાય.