જૂનાગઢ જિલ્લા મહિલા અને બાળ વિકાસ વિભાગ દ્વારા મહિલા સરપંચો માટે કાર્યકમ
જૂનાગઢ જિલ્લા મહિલા અને બાળ અધિકારીની કચેરી દ્વારા મેંદરડા સામુહિક આરોગ્ય કેન્દ્ર ખાતે એક વિશેષ કાર્યક્રમનું આયોજન કરવામાં આવ્યું હતું. જિલ્લા પંચાયત પ્રમુખ હરેશભાઈ ઠુંમરના અધ્યક્ષસ્થાને યોજાયેલા આ કાર્યક્રમમાં ‘બેટી બચાવો બેટી પઢાવો’ યોજના અંતર્ગત મહિલા સરપંચો સાથે સીધો સંવાદ કરવામાં આવ્યો હતો. જેમાં દીકરી જન્મને વધાવવો, કન્યા કેળવણી અને બાલિકા પંચાયત જેવા વિષયો પર ભાર મૂકવામાં આવ્યો હતો.
શિક્ષણ અને સ્વાસ્થ્ય પર વિશેષ ધ્યાન
કાર્યક્રમ દરમિયાન દીકરીઓનો ડ્રોપ-આઉટ રેશિયો ઘટાડવા અને ગામની સુરક્ષામાં મહિલાઓની ભાગીદારી વધારવા અંગે ચર્ચા થઈ હતી. જિલ્લા પંચાયત પ્રમુખે મહિલાઓના સ્વાસ્થ્ય અને બાળકોની જાળવણી અંગે પ્રેરક ઉદબોધન કર્યું હતું. ડૉ. સુહાગભાઈ ભાલોડીયા અને ડૉ. પૂજાબેને ઉપસ્થિત મહિલાઓને આરોગ્યલક્ષી મહત્વની જાણકારી પૂરી પાડી હતી.
યોજનાકીય લાભોનું વિતરણ
મહિલાઓને આત્મનિર્ભર બનાવવા અને દીકરીઓના ભવિષ્યને સુરક્ષિત કરવા માટે વિવિધ સહાયનું વિતરણ કરવામાં આવ્યું હતું:
-
વ્હાલી દીકરી યોજના: લાભાર્થીઓને યોજનાના મંજૂરી હુકમો એનાયત કરાયા.
-
મહિલા સ્વાવલંબન: આર્થિક પગભર થવા માટે સબસિડી પત્રકોનું વિતરણ.
-
કીટ વિતરણ: નવજાત દીકરીઓ માટે ‘દીકરી વધામણા કીટ’ અને વિદ્યાર્થીનીઓ માટે ‘શૈક્ષણિક કીટ’ આપવામાં આવી.
મહાનુભાવોની ઉપસ્થિતિ
આ કાર્યક્રમમાં દહેજ પ્રતિબંધક અધિકારી બી.ડી. ભાડ, તાલુકા પંચાયત કારોબારી ચેરમેન મનિષાબેન પાનસુરીયા, મેંદરડા સરપંચ જયાબેન ખાવડુ સહિત મેંદરડા તાલુકાના મહિલા સરપંચો અને સભ્યો મોટી સંખ્યામાં ઉપસ્થિત રહ્યા હતા. કાર્યક્રમ દ્વારા છેવાડાના ગામો સુધી મહિલા કલ્યાણની યોજનાઓ પહોંચાડવાનો સંકલ્પ લેવામાં આવ્યો હતો.
