રક્તપિત સંપૂર્ણપણે સાજો થઈ શકે છે તે સમજાવવા ગાંધીનગર સિવિલ હોસ્પિટલમાં નિષ્ણાતો દ્વારા માર્ગદર્શક કાર્યક્રમ
ગાંધીનગર સિવિલ હોસ્પિટલના ચર્મરોગ (Dermatology) વિભાગ દ્વારા ૩૦ જાન્યુઆરી ૨૦૨૬ના રોજ ‘વિશ્વ રક્તપિત દિવસ’ (World Leprosy Day) ની વિશેષ ઉજવણી કરવામાં આવી હતી. આ દિવસની ઉજવણીનો મુખ્ય હેતુ સમાજમાં રક્તપિત્ત પ્રત્યે ફેલાયેલી ભ્રમણાઓ દૂર કરવી અને દર્દીઓને સન્માનજનક જીવન જીવવા માટે પ્રેરિત કરવાનો છે.
વહેલી ઓળખ (Early Diagnosis) શા માટે જરૂરી?
કાર્યક્રમ દરમિયાન મેડિકલ ફેકલ્ટી દ્વારા સમજાવવામાં આવ્યું હતું કે રક્તપિત્ત એ માત્ર એક શારીરિક બીમારી છે, કોઈ શાપ કે કલંક નથી.
-
અપંગતા નિવારણ: જો શરૂઆતના તબક્કામાં જ રોગના લક્ષણો ઓળખી લેવામાં આવે, તો ચેતાતંતુઓને થતું નુકસાન અટકાવી શકાય છે અને પરિણામે હાથ-પગની અપંગતાથી બચી શકાય છે.
-
મલ્ટીડ્રગ થેરાપી (MDT): રક્તપિત્ત માટે અત્યંત અસરકારક MDT સારવાર ઉપલબ્ધ છે, જે તમામ સરકારી હોસ્પિટલોમાં નિઃશુલ્ક આપવામાં આવે છે.
-
ચેપનું પ્રમાણ: નિયમિત સારવાર શરૂ કર્યાના ટૂંકા સમયમાં જ દર્દી દ્વારા બીજાને ચેપ લાગવાનું જોખમ નાબૂદ થઈ જાય છે.
તબીબો અને વિદ્યાર્થીઓની ભૂમિકા
સુપરીન્ટેન્ડન્ટ ડૉ. મીતા પરીખના માર્ગદર્શન હેઠળ આયોજિત આ સત્રમાં ડૉ. બેલા પઢીયાર, ડૉ. મેહુલ મક્દાની અને ડૉ. શ્વેતા પરમારે માર્ગદર્શન પૂરું પાડ્યું હતું.
૧. માર્ગદર્શન (Counseling): માત્ર દવા જ નહીં, પરંતુ દર્દીનું મનોબળ વધારવા માટે યોગ્ય કાઉન્સેલિંગ અનિવાર્ય છે.
૨. સામાજિક જાગૃતિ: આરોગ્ય કર્મચારીઓ અને મેડિકલ વિદ્યાર્થીઓ સમાજમાં જઈને રક્તપિત્ત વિશેની ખોટી માન્યતાઓ દૂર કરે તેવો અનુરોધ કરવામાં આવ્યો હતો.
૩. તાલીમ: ઇન્ટર્ન્સ અને વિદ્યાર્થીઓને રક્તપિત્તના ચિહ્નો જેવા કે શરીર પર આછા કે લાલ ચામઠા (જેમાં સ્પર્શની સંવેદના ન હોય) વિશે ઊંડાણપૂર્વક સમજાવવામાં આવ્યું હતું.
સામાજિક કલંકને દૂર કરીએ
“રક્તપિત્ત મુક્ત ભારત” ના સ્વપ્નને સાકાર કરવા માટે દર્દીઓ પ્રત્યે સહાનુભૂતિ અને ભેદભાવ રહિત વ્યવહાર અત્યંત જરૂરી છે. જો આપને અથવા આપની આસપાસ કોઈના શરીર પર સંવેદના વગરના ડાઘ જોવા મળે, તો તરત જ નજીકના પ્રાથમિક આરોગ્ય કેન્દ્ર અથવા સિવિલ હોસ્પિટલનો સંપર્ક કરવો જોઈએ.
