“મને જાનથી મારી નાખવાનું કાવતરું”: મમતા બેનર્જીનો હેલિકોપ્ટર સામે ડ્રોન ઉડવા મામલે સનસનાટીભર્યો આક્ષેપ
પશ્ચિમ બંગાળ વિધાનસભા ચૂંટણીના પ્રથમ તબક્કાના મતદાન પહેલા રાજ્યનું રાજકારણ ગરમાયું છે. તૃણમૂલ કોંગ્રેસના સુપ્રીમો અને મુખ્યમંત્રી મમતા બેનર્જીએ એક જાહેર સભામાં પોતાની જીવનું જોખમ હોવાનો અને તેમને મારી નાખવાનું કાવતરું ઘડાયું હોવાનો ગંભીર આરોપ લગાવ્યો છે. માલદામાં બનેલી ડ્રોન ઉડવાની ઘટનાને લઈને તેમણે સીધો ભાજપ પર નિશાન સાધ્યું છે.
હેલિકોપ્ટર ક્રેશ કરાવવાની હતી સાજિશ?
સોમવારે બર્ધમાનમાં એક ચૂંટણી સભાને સંબોધતા મમતા બેનર્જીએ દાવો કર્યો હતો કે, ગત અઠવાડિયે જ્યારે તેઓ માલદામાં એક મીટિંગ પતાવીને હેલિકોપ્ટરમાં સવાર થવા જઈ રહ્યા હતા, ત્યારે તેમની એકદમ નજીક એક ડ્રોન ઉડતું જોવા મળ્યું હતું.
મમતાએ કહ્યું, “જ્યારે હું માલદાથી આવી રહી હતી, ત્યારે મારા હેલિકોપ્ટરની બરાબર સામે એક ડ્રોન ઉડી રહ્યું હતું. જો તે હેલિકોપ્ટર સાથે અથડાઈ ગયું હોત, તો હેલિકોપ્ટર ક્રેશ થઈ ગયું હોત. આ ડ્રોન કોણ ઉડાવી રહ્યું હતું? આ મામલે બિહારના ત્રણ લોકોની ધરપકડ કરવામાં આવી છે. શું તમારો ટાર્ગેટ મારો જીવ લેવાનો છે? ભલે મારો જીવ લઈ લો, મને કોઈ પરવા નથી. પરંતુ જ્યાં સુધી હું જીવતી છું, ત્યાં સુધી તમારા અન્યાય સામે અવાજ ઉઠાવતી રહીશ.”
ચૂંટણી પંચ અને વિપક્ષી ગઠબંધન પર સાઠગાંઠનો આરોપ
આશ્ચર્યજનક રીતે, મમતા બેનર્જીએ માત્ર ભાજપ જ નહીં, પરંતુ ‘INDIA’ ગઠબંધનના પોતાના સાથી પક્ષો – કોંગ્રેસ અને ડીએમકે (DMK) પર પણ પ્રહારો કર્યા છે. તેમણે આશંકા વ્યક્ત કરી હતી કે ચૂંટણી પંચ, કોંગ્રેસ અને સ્ટાલિન (તામિલનાડુના મુખ્યમંત્રી) વચ્ચે કોઈ અંદરખાને સમજૂતી થઈ છે.
મમતાએ સવાલ ઉઠાવ્યો હતો કે, પશ્ચિમ બંગાળના આઈએએસ (IAS) અને આઈપીએસ (IPS) અધિકારીઓની મોટા પાયે બદલી કરીને તેમને તામિલનાડુ કેમ મોકલવામાં આવી રહ્યા છે? તેમણે આક્ષેપ કર્યો કે આ બધું મમતા સરકારને નબળી પાડવા અને ચૂંટણી પ્રક્રિયામાં દખલ કરવા માટે કરવામાં આવી રહ્યું છે.
અધિકારીઓની બદલી મુદ્દે ચૂંટણી પંચ પર પ્રહાર
બંગાળના ટોચના અધિકારીઓની બદલીને લઈને મમતા બેનર્જી રૌદ્ર સ્વરૂપમાં જોવા મળ્યા હતા. તેમણે કોલકાતાના પોલીસ કમિશનર સુપ્રતિમ સરકારની બદલીનો મુદ્દો ખાસ ઉઠાવ્યો હતો.
તેમણે ભાવુક થઈને કહ્યું, “તમે સુપ્રતિમ સરકાર જેવા અધિકારીને તામિલનાડુ મોકલી દીધા, જેમના બે બાળકો બીમાર (સ્પાસ્ટિક) છે! શું તમને શરમ નથી આવતી? શું તમે બંગાળમાં આંબા-જામફળ તોડી રહ્યા છો? તમે બંગાળના તમામ કુશળ અધિકારીઓને બહાર ફેંકી દીધા છે.”
મમતાએ આંકડાકીય વિગતો આપતા દાવો કર્યો કે:
- કુલ 510 અધિકારીઓને ઓબ્ઝર્વર તરીકે હટાવવામાં આવ્યા છે.
- તેમાંથી લગભગ 500 અધિકારીઓ એકલા પશ્ચિમ બંગાળના છે.
- બાકીના ચાર રાજ્યો અને કેન્દ્રશાસિત પ્રદેશોમાંથી માત્ર 10 અધિકારીઓની જ બદલી કરવામાં આવી છે.
“મારું મોઢું બંધ નહીં થાય”
મમતા બેનર્જીએ સ્પષ્ટ કર્યું હતું કે આવી ધમકીઓ કે વહીવટી અવરોધોથી તેઓ ડરવાના નથી. તેમણે ભાજપને પડકાર ફેંકતા કહ્યું કે, ભાજપ કેન્દ્રીય એજન્સીઓ અને ચૂંટણી પંચનો ઉપયોગ કરીને બંગાળની જનતાનો અવાજ દબાવી શકશે નહીં. તેમણે આક્ષેપ કર્યો કે કેન્દ્ર સરકાર બંગાળમાં લોકશાહીની હત્યા કરવાનો પ્રયાસ કરી રહી છે.
