MI vs SRH Head to Head: મુંબઈ ઈન્ડિયન્સ અને સનરાઈઝર્સ હૈદરાબાદ વચ્ચે જંગ, કોનું પલ્લું છે ભારે?
IPL 2026 ની સીઝન હવે તેના નિર્ણાયક તબક્કા તરફ આગળ વધી રહી છે. મેચ નંબર 41 માં જ્યારે પાંચ વખતની ચેમ્પિયન મુંબઈ ઈન્ડિયન્સ (MI) અને 2016 ની વિજેતા સનરાઈઝર્સ હૈદરાબાદ (SRH) આમને-સામને ટકરાશે, ત્યારે ક્રિકેટ ચાહકોને એક હાઈ-વોલ્ટેજ ડ્રામા જોવા મળશે. આ મેચ મુંબઈના ઐતિહાસિક વાનખેડે સ્ટેડિયમમાં રમાવાની છે, જે હંમેશા બેટ્સમેનો માટે સ્વર્ગ સમાન રહ્યું છે.
મુંબઈ ઈન્ડિયન્સ: અસ્તિત્વ ટકાવી રાખવાની લડાઈ
હાર્દિક પંડ્યાના નેતૃત્વમાં મુંબઈ ઈન્ડિયન્સ માટે આ સીઝન કોઈ દુઃસ્વપ્નથી ઓછી નથી રહી. અત્યાર સુધી રમાયેલી 7 મેચોમાંથી ટીમ માત્ર 2 મેચ જીતી શકી છે અને પોઈન્ટ ટેબલમાં નવમા સ્થાને ફેંકાઈ ગઈ છે. છેલ્લી મેચમાં ચેન્નાઈ સુપર કિંગ્સ સામે મળેલી 103 રનની શરમજનક હાર બાદ ટીમનું મનોબળ ચોક્કસપણે તૂટ્યું હશે.
જોકે, મુંબઈ માટે રાહતની વાત એ છે કે તેઓ 6 દિવસના લાંબા બ્રેક પછી મેદાનમાં ઉતરી રહ્યા છે. વાનખેડેનું હોમ ગ્રાઉન્ડ અને રોહિત શર્મા, સૂર્યકુમાર યાદવ તથા જસપ્રીત બુમરાહ જેવા અનુભવી ખેલાડીઓની હાજરી ટીમને પુનરાગમન કરવાની તક આપી શકે છે. મુંબઈ માટે આ ‘કરો અથવા મરો’ જેવી સ્થિતિ છે.
સનરાઈઝર્સ હૈદરાબાદ: વિજય રથ પર સવાર
બીજી તરફ, પેટ કમિન્સની આગેવાની હેઠળની હૈદરાબાદની ટીમે આ સીઝનમાં શાનદાર વાપસી કરી છે. શરૂઆતની ચાર મેચોમાં ત્રણ હારનો સામનો કર્યા પછી, આ ટીમે સતત ચાર મેચો જીતીને બધાને ચોંકાવી દીધા છે. હાલમાં તેઓ 8 મેચમાં 5 જીત સાથે ટેબલમાં ત્રીજા સ્થાને મજબૂત રીતે બેઠા છે. ટ્રેવિસ હેડ અને અભિષેક શર્માની જોડી વિરોધી બોલરો માટે માથાનો દુખાવો બની રહી છે. રાજસ્થાન રોયલ્સ જેવી મજબૂત ટીમને હરાવ્યા બાદ હવે તેમનું લક્ષ્ય ટોપ-2 માં જગ્યા બનાવવાનું રહેશે.
હેડ-ટુ-હેડ રેકોર્ડ: આંકડા કોની તરફ છે?
જ્યારે પણ આ બે ટીમો આમને-સામને આવે છે, ત્યારે મુકાબલો રસાકસીભરો હોય છે. પરંતુ ઇતિહાસ પર નજર કરીએ તો મુંબઈનું પલ્લું થોડું ભારે દેખાય છે:
- કુલ મેચ: 25
- મુંબઈ ઈન્ડિયન્સની જીત: 15
- સનરાઈઝર્સ હૈદરાબાદની જીત: 10
બંને ટીમોના સંભવિત ખેલાડીઓ (Squads)
સનરાઈઝર્સ હૈદરાબાદ:
પેટ કમિન્સ (કેપ્ટન), અભિષેક શર્મા, ટ્રેવિસ હેડ, ઈશાન કિશન, હેનરિક ક્લાસેન, સલિલ અરોરા (વિકેટકીપર), અનિકેત વર્મા, નીતીશ કુમાર રેડ્ડી, શિવાંગ કુમાર, હર્ષ દુબે, સાકિબ હુસૈન, ઈશાન મલિંગા, દિલશાન મદુશંકા, સ્મરણ રામચંદ્રન, પ્રફુલ્લ હિંગે, લિયામ લિવિંગસ્ટોન, હર્ષલ પટેલ, જયદેવ ઉનડકટ, કામિન્ડુ મેન્ડિસ, જીશાન અંસારી, શિવમ માવી, ગેરાર્ડ કોએત્ઝી, ક્રેન્સ ફુલેટ્રા, ઓમકાર તરમાલે, અમિત કુમાર.
મુંબઈ ઈન્ડિયન્સ:
હાર્દિક પંડ્યા (કેપ્ટન), ક્વિન્ટન ડી કોક (વિકેટકીપર), દાનિશ માલેવાર, નમન ધીર, સૂર્યકુમાર યાદવ, તિલક વર્મા, શેરફેન રધરફોર્ડ, કેશવ મહારાજ, ક્રિશ ભગત, જસપ્રીત બુમરાહ, એએમ ગઝનફર, અશ્વિની કુમાર, રાજ બાવા, કોર્બિન બોશ, મયંક રાવત, રઘુ શર્મા, રોહિત શર્મા, દીપક ચાહર, ટ્રેન્ટ બોલ્ટ, શાર્દુલ ઠાકુર, વિલ જેક્સ, મયંક માર્કંડે, રાયન રિકેલટન, રોબિન મિંજ, મોહમ્મદ સલાહુદ્દીન ઈઝહાર.
