લાલ કિલ્લા કરતાં પણ મોટો ધમાકો કરવાની હતી આતંકવાદીઓની યોજના, મુઝમ્મિલના કબૂલનામામાં થયો સમગ્ર પ્લાનનો ખુલાસો
લાલ કિલ્લા બ્લાસ્ટ કેસની તપાસમાં બહાર આવ્યું છે કે જૈશ-એ-મોહમ્મદ સાથે જોડાયેલો ડૉ. ઉમર મોહમ્મદ દેશમાં મોટો આતંકી હુમલો કરવાની સાજિશ રચી રહ્યો હતો. મુઝમ્મિલના કબૂલનામામાં ખુલાસો થયો છે કે ઉમર TATP જેવા વિસ્ફોટકોનું પરીક્ષણ પોતે જ કરતો હતો અને 5 લોકોનું આખું મોડ્યુલ મોટો ધમાકો કરવાની તૈયારીમાં હતું.
સુરક્ષા એજન્સીઓની તપાસમાં લાલ કિલ્લા બ્લાસ્ટ કેસમાં એક ચોંકાવનારો ખુલાસો થયો છે. એજન્સીઓના કેસ ડાયરીમાં નોંધાયેલ રિપોર્ટ મુજબ, વિસ્ફોટક બનાવવામાં એસિટોન (જે નેઇલ પોલિશ રીમુવર છે) અને પીસેલી ખાંડનો ઉપયોગ કરવામાં આવ્યો હતો. ફરીદાબાદમાંથી મળી આવેલ વિસ્ફોટક અને આ બ્લાસ્ટનો માસ્ટરમાઇન્ડ બીજું કોઈ નહીં પરંતુ મૃત્યુ પામેલો ડૉ. ઉમર મોહમ્મદ હતો. તપાસમાં જાણવા મળ્યું કે ડૉ. ઉમર મોહમ્મદ જૈશ-એ-મોહમ્મદનો તાલીમબદ્ધ આતંકવાદી હતો અને તેણે દેશમાં અત્યાર સુધીના સૌથી મોટા આતંકી હુમલાની સાજિશ રચી હતી.
‘ડૉ. ઉમરને 9થી વધુ ભાષાઓનું જ્ઞાન હતું’
પકડાયેલા આતંકવાદી મુઝમ્મિલના કબૂલનામા મુજબ, ડૉ. ઉમર પોતાને ‘આમિર’ કહેતો હતો, જેનો અર્થ ‘રાજકુમાર’ અથવા ‘શાસક’ થાય છે. મુઝમ્મિલે જણાવ્યું કે ઉમર 9થી વધુ ભાષાઓનું જ્ઞાન ધરાવતો હતો. તે હંમેશાં ધર્મની વાતો કરતો હતો અને પોતાને એક લીડર માનતો હતો.
મુઝમ્મિલે આગળ જણાવ્યું કે “ડૉ. ઉમર હંમેશાં ધર્મની વાતો કરતો હતો. તેનામાં નેતૃત્વની કુશળતા હતી અને તે અમને બધાને નિયંત્રિત રાખતો હતો. તેની વાતોમાં તથ્યો અને સંશોધન હોવાથી અમે તેને કાપી શકતા નહોતા. તેણે મને, ડૉ. અદીલ, ડૉ. શાહીન અને મુફ્તી ઇરફાનને હંમેશાં કહ્યું કે દેશનું વાતાવરણ ખરાબ છે, ધ્રુવીકરણ થયું છે, સામૂહિક હત્યા (જેનોસાઇડ) થઈ શકે છે, તેથી આપણે તૈયાર રહેવું જોઈએ.”
જુલાઈ 2023માં મેવાતના નૂહમાં થયેલી હિંસા અને માર્ચ 2023ના નાસિર-જુનૈદ ભિવાની હત્યાકાંડથી ડૉ. ઉમરને આ ભયાનક ષડયંત્ર માટે પ્રેરણા મળી હતી. મુઝમ્મિલે કબૂલ્યું કે કલમ 370 હટાવ્યા પછી જમ્મુ-કાશ્મીરમાં સુરક્ષા દળો પ્રત્યે તેના મનમાં ખૂબ નફરત હતી.
‘વિસ્ફોટક બનાવવા માટે ટેસ્ટિંગ પોતે કરતો હતો’
મુઝમ્મિલે જણાવ્યું કે ઉમર તેમની સાથે નૂહ-મેવાતમાંથી યુરિયા લઈને આવતો હતો અને અલ ફલાહ યુનિવર્સિટીના તેના રૂમ નંબર 4 માં વિસ્ફોટક બનાવવાની ટેસ્ટિંગ પોતે જ કરતો હતો. ષડયંત્રમાં મુઝમ્મિલ, ઉમર, અદીલ, શાહીન અને મુફ્તી ઇરફાન સહિત 5 લોકો સામેલ હતા. મુઝમ્મિલે કહ્યું, “અમે 5 લોકો મળીને એક મોટી સાજિશ તૈયાર કરી રહ્યા હતા. આ બધાનો હેડ ઉમર હતો.” ઉમરે માત્ર 6 મહિનામાં ચાઇનીઝ ભાષા શીખી લીધી હતી અને તેમનું ગુપ્ત ગ્રુપ પણ ચાઇનીઝ ભાષામાં હતું.
‘અફઘાનિસ્તાન કે સીરિયા જવું હતું’
મુઝમ્મિલે અંગત જીવન વિશે ખુલાસો કરતાં કહ્યું, “હું ડૉ. શાહીન સાથે પ્રેમ કરતો હતો અને તેની સેલરી મારાથી વધુ હતી. શાહીન પણ આતંકી મોડ્યુલ માટે તેના બેંક ખાતામાંથી લગભગ 25 લાખ રૂપિયા આપી ચૂકી હતી. હું અને ઉમર અફઘાનિસ્તાન અથવા સીરિયા શિફ્ટ થવા માંગતા હતા. તે પહેલાં હું, ઉમર અને અમારો એક સાથી તુર્કી ગયા હતા જ્યાં અમે તાલીમ લીધી અને કેટલાક હેન્ડલર્સને મળ્યા.”
2023માં મેં, ઉમર અને અદીલે લાલ રંગની ઇકો સ્પોર્ટ્સ કારથી નૂહ અને મેવાતમાંથી ખાતર (ફર્ટિલાઇઝર) ખરીદવાનું શરૂ કર્યું હતું અને તેને અલ ફલાહના રૂમમાં સંગ્રહિત કરતા હતા. 2025 માં તેમણે વિસ્ફોટક સંપૂર્ણપણે તૈયાર કરી લીધો હતો.
‘મુફ્તી ઇરફાન પકડાતા પ્લાન નિષ્ફળ ગયો’
મુઝમ્મિલે કહ્યું, “વિસ્ફોટકની એક મોટી ખેપ અમે જમ્મુ-કાશ્મીર લઈ જવાના હતા, પરંતુ મુફ્તી ઇરફાનના પકડાવાને કારણે પ્લાન નિષ્ફળ ગયો. મુફ્તીના મોબાઇલ ફોનમાં અમારું ગ્રુપ મળી ગયું, જેના પછી ફરીદાબાદથી મારી ધરપકડ થઈ.” ઉમરના ફ્લેટમાં વિસ્ફોટકના તાપમાનને નિયંત્રિત કરવા માટે ડીપફ્રીઝર પણ રાખવામાં આવ્યું હતું.
