પુલવામાના વીર શહીદોને નમન: પીએમ મોદીએ કહ્યું- ‘શહીદોનું બલિદાન દરેક ભારતીય માટે પ્રેરણાનો સ્ત્રોત’.
આજે ૧૪ ફેબ્રુઆરી, ૨૦૨૬ના રોજ સમગ્ર ભારત વર્ષ ૨૦૧૯માં જમ્મુ-કાશ્મીરના પુલવામામાં થયેલા ભીષણ આતંકવાદી હુમલામાં શહીદ થયેલા ૪૦ CRPF જવાનોને ભાવભીની શ્રદ્ધાંજલિ અર્પી રહ્યું છે. પ્રધાનમંત્રી નરેન્દ્ર મોદીએ આ અવસરે શહીદોની વીરતા અને દેશભક્તિને યાદ કરતા કહ્યું કે તેમનું સમર્પણ હંમેશા રાષ્ટ્રના સામૂહિક મનમાં અંકિત રહેશે.
પીએમ મોદીની ભાવુક શ્રદ્ધાંજલિ
શનિવારની સવારે પ્રધાનમંત્રી નરેન્દ્ર મોદીએ સોશિયલ મીડિયા પ્લેટફોર્મ ‘X’ પર શહીદોને યાદ કર્યા હતા. તેમણે પોતાની પોસ્ટમાં લખ્યું:
“૨૦૧૯માં આજના દિવસે પુલવામામાં પોતાના જીવનું બલિદાન આપનારા બહાદુર નાયકોને આપણે યાદ કરીએ છીએ. તેમની ભક્તિ, સંકલ્પ અને રાષ્ટ્ર પ્રત્યેની સેવા હંમેશા આપણા મનમાં રહેશે. દરેક ભારતીય તેમની હિંમતમાંથી શક્તિ મેળવે છે. આપણા બહાદુર સૈનિકોને સેંકડો સલામ.”
પીએમ મોદીએ વધુમાં ઉમેર્યું હતું કે આ સૈનિકોએ ભારતની સીમાઓની રક્ષા માટે જે બલિદાન આપ્યું છે, તે દેશની આવનારી પેઢીઓ માટે પ્રેરણાનું ઝરણું બની રહેશે.
Remembering the brave heroes who laid down their lives in Pulwama on this day in 2019. Their devotion, resolve and service to the nation remain forever etched in our collective consciousness. Every Indian draws strength from their enduring courage.
— Narendra Modi (@narendramodi) February 14, 2026
ઉપરાષ્ટ્રપતિનું નિવેદન
ઉપરાષ્ટ્રપતિ સી.પી. રાધાકૃષ્ણને પણ શહીદ જવાનોને નમ્ર શ્રદ્ધાંજલિ અર્પી હતી. તેમણે જણાવ્યું હતું કે ભારતીય ઇતિહાસમાં આ સૈનિકોનું બલિદાન સુવર્ણ અક્ષરે લખાયેલું રહેશે. તેમણે ભાર મૂક્યો હતો કે આ બલિદાન આપણને વધુ મજબૂત અને સુરક્ષિત ભારત બનાવવા માટે સતત પ્રોત્સાહન પૂરું પાડતું રહેશે.
૧૪ ફેબ્રુઆરી, ૨૦૧૯: તે કાળી બપોરની યાદ
આજથી સાત વર્ષ પહેલા, ૧૪ ફેબ્રુઆરી ૨૦૧૯ના રોજ બપોરના આશરે ૩:૧૫ વાગ્યે જમ્મુ-શ્રીનગર રાષ્ટ્રીય ધોરીમાર્ગ પર CRPFનો કાફલો જઈ રહ્યો હતો. ત્યારે લેથપોરા (પુલવામા) પાસે આતંકવાદીઓએ વિસ્ફોટકોથી ભરેલી કાર દ્વારા CRPFની બસને નિશાન બનાવી હતી. આ અંધાધૂંધ હુમલામાં ૪૦ જવાનો શહીદ થયા હતા અને અનેક ઘાયલ થયા હતા. આ ઘટનાએ માત્ર ભારત જ નહીં, પરંતુ સમગ્ર વિશ્વને હચમચાવી દીધું હતું.
આ હુમલા બાદ ભારત અને પાકિસ્તાન વચ્ચેના સંબંધોમાં ભારે તણાવ સર્જાયો હતો અને ત્યારબાદ ભારતે ‘બાલાકોટ એરસ્ટ્રાઈક’ દ્વારા આતંકવાદી અડ્ડાઓનો ખાત્મો બોલાવીને પાકિસ્તાનને જડબાતોડ જવાબ આપ્યો હતો.
રાષ્ટ્રમાં શોક અને સંકલ્પનું વાતાવરણ
આજે દેશના વિવિધ ભાગોમાં, ખાસ કરીને CRPF કેમ્પ અને શાળાઓમાં મૌન પાળીને શહીદોને યાદ કરવામાં આવ્યા હતા. સોશિયલ મીડિયા પર સવારથી જ #PulwamaAttack અને #BlackDay ટ્રેન્ડ થઈ રહ્યા છે. લોકો શહીદોના ફોટા અને તેમની શૌર્યગાથાઓ શેર કરીને તેમને નમન કરી રહ્યા છે. જમ્મુ-કાશ્મીરમાં પણ લેથપોરા શહીદ સ્મારક પર શ્રદ્ધાંજલિ સભાઓનું આયોજન કરવામાં આવ્યું છે.
પુલવામા હુમલો એ ભારતની સુરક્ષા વ્યવસ્થા માટે એક મોટો પાઠ હતો, જેણે સરહદ પારના આતંકવાદ સામે ભારતની રણનીતિને હંમેશા માટે બદલી નાખી છે. આજે જ્યારે આપણે આપણા ઘરના ઉંબરે સુરક્ષિત બેઠા છીએ, ત્યારે તે બલિદાનોને યાદ કરવા એ આપણી નૈતિક ફરજ છે. ભારત તેના નાયકોને ક્યારેય ભૂલશે નહીં.
