નેપાળમાં ‘બાલેન યુગ’ની શરૂઆત: પીએમ મોદી સાથે મળીને કામ કરવા ઉત્સુક બાલેન્દ્ર શાહ, પૂર્વ પીએમ ઓલીની ધરપકડથી ખળભળાટ
દક્ષિણ એશિયાના રાજકારણમાં અત્યારે નેપાળ કેન્દ્રસ્થાને છે. નેપાળના નવનિયુક્ત વડાપ્રધાન બાલેન્દ્ર શાહ (બાલેન શાહ) એ સત્તા સંભાળતાની સાથે જ ભારત સાથેના સંબંધોને નવી ઊંચાઈએ લઈ જવાનો સંકલ્પ જાહેર કર્યો છે. ભારતના વડાપ્રધાન નરેન્દ્ર મોદીએ તેમને અભિનંદન પાઠવ્યા હતા, જેના જવાબમાં બાલેન શાહે ભારત સાથે ગાઢ સહયોગ અને બંને દેશોના લોકોના ભલા માટે સાથે મળીને કામ કરવાની ઉત્સુકતા દર્શાવી છે. જોકે, આ નવી સરકારની શરૂઆત માત્ર રાજદ્વારી સંબંધોથી જ નહીં, પરંતુ નેપાળના આંતરિક રાજકારણમાં લેવાયેલા લેવાયેલા કડક નિર્ણયોને કારણે પણ ચર્ચામાં છે.
પીએમ મોદી અને બાલેન શાહ વચ્ચે મજબૂત સંબંધોની આશા
નેપાળના વડાપ્રધાન કાર્યાલય દ્વારા જારી કરવામાં આવેલા નિવેદનમાં પીએમ મોદીનો આભાર માનવામાં આવ્યો છે. બાલેન શાહે સોશિયલ મીડિયા પ્લેટફોર્મ X પર લખ્યું હતું કે, “વડાપ્રધાન મોદીજી, તમારા સ્નેહ અને શુભેચ્છાઓ બદલ આભાર. હું તમારી સાથે મળીને આપણા બંને દેશોના સંબંધોને વધુ મજબૂત કરવા અને જનતાના કલ્યાણ માટે કામ કરવા માટે ખૂબ જ ઉત્સાહિત છું.”
Thank you, PM @narendramodi for your kind words and warm wishes. I am eager to work closely with you to advance the multifaceted relations between our two countries for the common prosperity of our people. https://t.co/0YWdh8Jj36
— PMO (@PM_nepal_) March 28, 2026
અગાઉ પીએમ મોદીએ ટ્વીટ કરીને વિશ્વાસ વ્યક્ત કર્યો હતો કે બાલેન શાહના નેતૃત્વમાં ભારત અને નેપાળ વચ્ચેની મિત્રતા અને પરસ્પર સહયોગના નવા આયામો સર થશે. નેપાળમાં બાલેન શાહની લોકપ્રિયતા ઘણી વધારે છે અને ભારત પણ તેમને એક સક્ષમ અને પ્રગતિશીલ નેતા તરીકે જોઈ રહ્યું છે. બંને દેશો વચ્ચે સાંસ્કૃતિક, આર્થિક અને ભૌગોલિક સમાનતાઓ હોવાને કારણે આ સહયોગ દક્ષિણ એશિયાની શાંતિ માટે અત્યંત મહત્વનો માનવામાં આવે છે.
શપથ ગ્રહણ અને સત્તાનું પરિવર્તન
શુક્રવારે નેપાળના રાષ્ટ્રપતિ રામચંદ્ર પૌડેલે બાલેન્દ્ર શાહને વડાપ્રધાન પદના શપથ લેવડાવ્યા હતા. બંધારણની કલમ 76(1) હેઠળ તેમની નિમણૂક કરવામાં આવી છે. આ શપથ ગ્રહણ સમારોહમાં ઉપરાષ્ટ્રપતિ રામ સહાય પ્રસાદ યાદવ, મુખ્ય ન્યાયાધીશ પ્રકાશ માન સિંહ રાઉત સહિત અનેક પૂર્વ વડાપ્રધાનો અને વરિષ્ઠ અધિકારીઓ હાજર રહ્યા હતા. બાલેન શાહની સત્તામાં એન્ટ્રીએ નેપાળના પરંપરાગત રાજકીય પક્ષોમાં મોટો ફેરફાર લાવી દીધો છે, કારણ કે તેઓ એક યુવા અને ‘એક્શન મોડ’માં રહેતા નેતા તરીકે ઓળખાય છે.
પૂર્વ પીએમ કેપી શર્મા ઓલીની ધરપકડ: નેપાળમાં હડકંપ
વડાપ્રધાન પદ સંભાળ્યાના ગણતરીના કલાકોમાં જ બાલેન શાહે ભ્રષ્ટાચાર અને બેદરકારી સામે કડક કાર્યવાહી શરૂ કરી દીધી છે. તેમના આદેશ પર નેપાળ પોલીસે પૂર્વ વડાપ્રધાન કેપી શર્મા ઓલી અને પૂર્વ ગૃહમંત્રી રમેશ લેખકની ધરપકડ કરી છે. આ કાર્યવાહીએ સમગ્ર દક્ષિણ એશિયામાં ચર્ચા જગાવી છે.
તપાસ પંચના અહેવાલ મુજબ, કેપી શર્મા ઓલી અને રમેશ લેખક પર આરોપ છે કે જ્યારે તેઓ ઉચ્ચ હોદ્દા પર હતા ત્યારે આંદોલન દરમિયાન તેમણે ગંભીર બેદરકારી દાખવી હતી. પંચે આ મામલે તમામ આરોપીઓ વિરુદ્ધ મહત્તમ 10 વર્ષની જેલની સજાની ભલામણ કરી છે. બાલેન શાહની આ કાર્યવાહીએ સ્પષ્ટ સંકેત આપ્યો છે કે તેમની સરકારમાં કોઈ પણ વ્યક્તિ કાયદાથી ઉપર નથી.
પોલીસતંત્રમાં પણ મોટી સફાઈની તૈયારી
માત્ર રાજકારણીઓ જ નહીં, પણ બાલેન શાહ સરકાર હવે તે પોલીસ અધિકારીઓ પર પણ તવાઈ બોલાવવાની તૈયારીમાં છે જેમણે ભૂતકાળમાં પોતાની સત્તાનો દુરુપયોગ કર્યો હતો. અહેવાલો મુજબ, આગામી દિવસોમાં નેપાળના અનેક મોટા પોલીસ અધિકારીઓની ધરપકડ થઈ શકે છે. બાલેન શાહના આ ‘ક્લીનઅપ ડ્રાઈવ’ને જનતાનું સમર્થન મળી રહ્યું છે, પરંતુ વિપક્ષી છાવણીમાં આના કારણે ભારે રોષ અને ડરનો માહોલ છે.
