“બેટી બચાવો બેટી પઢાવો” યોજના અંતર્ગત મોટી પાળીયાણી શાળામાં કિશોરીઓને કાનૂની સુરક્ષા અંગે માહિતગાર કરવામાં આવ્યા
ભાવનગર જિલ્લા મહિલા અને બાળ અધિકારીની કચેરી દ્વારા પાલીતાણા તાલુકાની શ્રી ઉત્તર બુનિયાદી શાળા, મોટી પાળીયાણી ખાતે ‘બેટી બચાવો બેટી પઢાવો’ (BBBP) યોજના હેઠળ એક વિશેષ જાગૃતિ કાર્યક્રમનું આયોજન કરવામાં આવ્યું હતું. આ કાર્યક્રમમાં ધોરણ ૯ અને ૧૧ની વિદ્યાર્થીનીઓને મહિલા અને બાળ સુરક્ષાને લગતા વિવિધ કાયદાઓ અને સરકારી યોજનાઓથી માહિતગાર કરવામાં આવી હતી.
POCSO એક્ટ અને બાળ સુરક્ષા
કાર્યક્રમ દરમિયાન બાળ સુરક્ષા એકમના કાઉન્સેલર લીનાબેન ડાભીએ વિદ્યાર્થીનીઓને પોક્સો (POCSO) એક્ટની ગંભીરતા સમજાવી હતી:
-
ગુડ ટચ – બેડ ટચ: બાળકોને પોતાની સુરક્ષા માટે શારીરિક સ્પર્શના તફાવતને ઓળખતા શીખવવામાં આવ્યું.
-
કાયદાકીય જોગવાઈ: કાયદા હેઠળ થતી દંડની જોગવાઈઓ અને શોષણ સામે ક્યાં અને કેવી રીતે ફરિયાદ કરી શકાય તે અંગે માર્ગદર્શન અપાયું.
-
ચાઈલ્ડ હેલ્પલાઈન: કોઈ પણ આપત્તિના સમયે ૧૦૯૮ નંબર પર સંપર્ક કરવા જણાવાયું.
મહિલાલક્ષી યોજનાઓ અને હેલ્પલાઈન
સખી વન સ્ટોપ સેન્ટર (OSC) ના કેન્દ્ર સંચાલક શુભાબેન મકવાણાએ હિંસાથી પીડિત મહિલાઓ માટે ઉપલબ્ધ સેવાઓની માહિતી આપી:
-
OSC સેવાઓ: એક જ સ્થળે તબીબી સહાય, પોલીસ સહાય, કાયદાકીય મદદ અને કાઉન્સેલિંગ જેવી પાંચ પ્રકારની સેવાઓ વિશે વાત કરી.
-
ઇમરજન્સી નંબર્સ: ૧૮૧ (અભયમ મહિલા હેલ્પલાઈન) અને ૧૧૨ નંબરનો ઉપયોગ કરવા અંગે દીકરીઓ સાથે સંવાદ કર્યો.
પોષણ અને આર્થિક સશક્તિકરણ
DHEW યોજનાના જેન્ડર સ્પેશ્યાલીસ્ટ હિતેશભાઈ અને મિશન કો-ઓર્ડિનેટર સંજયભાઈ દ્વારા વિવિધ કલ્યાણકારી યોજનાઓની વિગતો આપવામાં આવી:
-
વ્હાલી દીકરી યોજના: દીકરીઓના શિક્ષણ અને ભવિષ્ય માટે મળતી આર્થિક સહાયની માહિતી.
-
પૂર્ણા યોજના: કિશોરીઓના સ્વાસ્થ્ય અને પોષણ સ્તરમાં સુધારો લાવવાના પ્રયાસો.
-
બાલિકા પંચાયત: દીકરીઓમાં નેતૃત્વના ગુણો વિકસાવવા અને સામાજિક નિર્ણયોમાં તેમની ભાગીદારી વધારવા અંગે માર્ગદર્શન.
શાળાના આચાર્ય ભગવાનભાઈ મેરે કાર્યક્રમના મહત્વ પર પ્રકાશ પાડ્યો હતો. આ પ્રસંગે શાળાનો શિક્ષકગણ અને મોટી સંખ્યામાં વિદ્યાર્થીનીઓ ઉપસ્થિત રહી હતી, જેમણે મહિલા સશક્તિકરણના આ અભિયાનમાં ઉત્સાહપૂર્વક ભાગ લીધો હતો.
