પોસ્ટ ઓફિસની નવી સુવિધા: આધાર બાયોમેટ્રિકથી હવે PPF અને RD ખાતા ઓનલાઈન ખોલી શકાશે
હવે પોસ્ટ ઓફિસમાં ખાતા ખોલવા માટે ન પે-ઇન સ્લિપની જરૂર પડશે, ન ઉપાડ વાઉચરની. ઇન્ડિયા પોસ્ટે ગ્રાહકો માટે નવી ડિજિટલ સુવિધા શરૂ કરી છે, જેમાં તેઓ આધાર આધારિત બાયોમેટ્રિક e-KYC દ્વારા હવે PPF (Public Provident Fund) અને RD (Recurring Deposit) ખાતા પણ ખોલી શકે છે અને જાતે મેનેજ પણ કરી શકે છે.
ભારતીય ટપાલ વિભાગ (India Post) તેના લાખો ગ્રાહકો માટે બેંકિંગ અનુભવને વધુ સરળ અને સુરક્ષિત બનાવવા જઈ રહ્યો છે. અત્યાર સુધી જે કામ માટે તમારે પોસ્ટ ઓફિસના ચક્કર કાપવા પડતા હતા અને અનેક ફોર્મ ભરવા પડતા હતા, તે હવે માત્ર એક અંગૂઠાના નિશાન (Biometric) થી પૂર્ણ થઈ જશે. ઈન્ડિયા પોસ્ટે તેની ડિજિટલ સેવાઓનો વ્યાપ વધારીને હવે પબ્લિક પ્રોવિડન્ટ ફંડ (PPF) અને રિકરિંગ ડિપોઝિટ (RD) જેવી મહત્વની યોજનાઓને પણ ઓનલાઈન e-KYC સાથે સાંકળી લીધી છે.
અગાઉ ફક્ત પસંદગીની યોજનાઓ માટે ઉપલબ્ધ:
આ પહેલાં આ ડિજિટલ સુવિધા ફક્ત MIS (Monthly Income Scheme), TD (Term Deposit), KVP (Kisan Vikas Patra) અને NSC (National Savings Certificate) માટે જ ઉપલબ્ધ હતી. હવે આ ફોર્મેટનો વિસ્તાર PPF અને RD જેવી લોકપ્રિય યોજનાઓ સુધી કરાયો છે.
શું સવલતો મળશે?
CBS (Core Banking Solution) જોડાયેલી પોસ્ટ ઓફિસોમાં ગ્રાહકો હવે આ કામગીરીઓ કરી શકશે:
- આધાર બાયોમેટ્રિક e-KYC દ્વારા PPF અને RD ખાતા ખોલી શકાશે
- ખાતામાં જમા/ઉપાડ (withdrawal) કરવો
- લોન લેવી અને ચુકવણી કરવી
- નમિનીમાં ફેરફાર કરવો
- ખાતું બંધ કરવું અથવા ટ્રાન્સફર કરવું
PPF ખાતામાંથી ઉપાડ હવે e-KYC દ્વારા મર્યાદાવિહોણું શક્ય બન્યું છે.
ગ્રાહકની માહિતી સુરક્ષિત રાખવા માટે પગલાં
પોસ્ટ ઓફિસે ગ્રાહકોની ઓળખ સુરક્ષિત રાખવા માટે મહત્વપૂર્ણ પગલાં પણ લીધાં છે:
- તમામ આધાર નંબર xxx-xxx- ફોર્મેટમાં છુપાવાશે
- કોઈ દસ્તાવેજમાં જો આધાર નંબર છુપાયેલ ન હોય, તો પોસ્ટમાસ્ટર તેને કાળી શાહીથી છુપાવશે
- તમામ CBS અને CPC ખાતા ખાતરી કરશે કે આધાર સાથે જોડાયેલ દસ્તાવેજો છે
પોસ્ટ ઓફિસ હવે માત્ર ટપાલ મોકલવાનું સાધન નથી રહી, પણ એક આધુનિક બેંક તરીકે ઉભરી રહી છે. ટેકનોલોજીના આ પ્રસારથી ગ્રામીણ અને શહેરી બંને વિસ્તારોના લોકો ડિજિટલ બેંકિંગનો લાભ લઈ શકશે. જો તમે પણ PPF કે RD માં રોકાણ કરવા માંગતા હોવ, તો હવે તમારે પેન અને ફોર્મની નહીં, માત્ર તમારા આધાર કાર્ડની જરૂર પડશે.
