PSL 2026: ટુર્નામેન્ટ શરૂ થાય તે પહેલા જ આ સ્ટાર ખેલાડીએ નામ ખેંચ્યું પરત, મધ્ય પૂર્વનો તણાવ બન્યો મુખ્ય કારણ
પાકિસ્તાન સુપર લીગ (PSL) ની આગામી સીઝન શરૂ થવાને હવે ગણતરીના દિવસો બાકી છે, ત્યારે ક્રિકેટ ચાહકો અને ફ્રેન્ચાઈઝી માટે એક માઠા સમાચાર સામે આવ્યા છે. વેસ્ટ ઈન્ડિઝના સ્ટાર સ્પિનર ગુડાકેશ મોતીએ સુરક્ષા અને વ્યક્તિગત કારણોસર આ વર્ષની લીગમાં ન રમવાનો નિર્ણય લીધો છે.
મધ્ય પૂર્વમાં તણાવ અને મુસાફરીનો ડર
પાકિસ્તાનમાં રમાનારી આ ટી20 લીગનો પ્રારંભ 26 માર્ચથી થવા જઈ રહ્યો છે. લાહોર કલંદર્સની ટીમનો મહત્વનો હિસ્સો ગણાતા ગુડાકેશ મોતીએ ટુર્નામેન્ટમાંથી બહાર થવાનો નિર્ણય લીધો છે. અહેવાલો અનુસાર, આ નિર્ણય પાછળનું મુખ્ય કારણ મધ્ય પૂર્વ (Middle East) માં ચાલી રહેલો ભૌગોલિક-રાજકીય તણાવ છે.
તાજેતરમાં પૂરા થયેલા ટી20 વર્લ્ડ કપ 2026 બાદ ઘરે પરત ફરતી વખતે મોતીને ફ્લાઈટ શેડ્યૂલ અને સુરક્ષાના કારણોસર ભારે હાલાકી ભોગવવી પડી હતી. આ અનુભવ બાદ તે ફરીથી આવી સ્થિતિમાં ફસાવવા માંગતા નથી, જેના કારણે તેમણે પાકિસ્તાન ન જવાનો નિર્ણય લીધો છે.
લાહોર કલંદર્સમાં મોતીની જગ્યાએ શ્રીલંકન ખેલાડીની એન્ટ્રી
લાહોર કલંદર્સે પ્લેયર ઓક્શનમાં ગુડાકેશ મોતીને 1.10 કરોડ પાકિસ્તાની રૂપિયામાં પોતાની ટીમમાં સામેલ કર્યો હતો. હવે મોતીના સ્થાને ટીમે શ્રીલંકાના યુવા અને પ્રતિભાશાળી સ્પિનર દુનિથ વેલ્લાગેને ટીમમાં સ્થાન આપ્યું છે. વેલ્લાગેનું તાજેતરનું પ્રદર્શન શાનદાર રહ્યું છે, જે લાહોરની ટીમ માટે ફાયદાકારક સાબિત થઈ શકે છે.
આ ખેલાડીએ PSL છોડી IPL પસંદ કરી
માત્ર ગુડાકેશ મોતી જ નહીં, પરંતુ ઝિમ્બાબ્વેના સ્ટાર ફાસ્ટ બોલર બ્લેસિંગ મુઝરબાનીએ પણ PSL 2026 માંથી પોતાનું નામ પાછું ખેંચી લીધું છે. જોકે, તેમનું કારણ અલગ છે. મુઝરબાની પહેલા ઇસ્લામાબાદ યુનાઇટેડ તરફથી રમવાના હતા, પરંતુ હવે તેઓ IPL 2026 માં કોલકાતા નાઈટ રાઈડર્સ (KKR) તરફથી રમતા જોવા મળશે.
મુઝરબાનીએ તાજેતરના વર્લ્ડ કપમાં શાનદાર બોલિંગ કરી હતી. અત્યાર સુધીની તેમની કારકિર્દી પર નજર કરીએ તો:
- કુલ મેચ: 89 ટી20 ઇન્ટરનેશનલ
- વિકેટ: 106
- સરેરાશ: 21.34
