રેલવેનો નવો નિયમ: હવે ભૂલથી પણ નહીં છૂટે તમારું સ્ટેશન; નિરાંતે માણી શકશો મુસાફરી
જો તમે ભારતીય રેલવેમાં અવારનવાર મુસાફરી કરો છો, તો રેલવેનો આ નવો નિયમ તમને ચોક્કસ ગમશે. મુસાફરોને વધુ સારી સુવિધા આપવા અને તેમની મુસાફરીને તણાવમુક્ત બનાવવા માટે રેલવેએ એક મહત્વપૂર્ણ ટેકનોલોજી રજૂ કરી છે.
ટ્રેનમાં મુસાફરી દરમિયાન ગાઢ ઊંઘમાં હોવાને કારણે સ્ટેશન ચૂકી જવું એ ઘણા મુસાફરો માટે મોટી સમસ્યા હોય છે. ખાસ કરીને રાત્રિના સમયે અથવા લાંબી મુસાફરીમાં આ ડર સતત સતાવતો હોય છે. મુસાફરોની આ ચિંતા દૂર કરવા માટે IRCTC એ ‘ડેસ્ટિનેશન એલર્ટ સર્વિસ’ (Destination Alert Service) અને વેક-અપ એલાર્મ (Wake-up Alarm) સુવિધા શરૂ કરી છે.
આ ટેકનોલોજીનો સૌથી મોટો ફાયદો
આ સર્વિસની સૌથી ખાસ વાત તેની સચોટ ટાઈમિંગ છે. તમારી ટ્રેન તમારા ડેસ્ટિનેશન સ્ટેશન પર પહોંચવાના બરાબર 20 મિનિટ પહેલા તમારા મોબાઈલ પર એલાર્મ વાગવાનું શરૂ થઈ જશે. આ ફીચર ખાસ કરીને એવા લોકો માટે વરદાન સમાન છે જેઓ રાત્રે એકલા મુસાફરી કરે છે અથવા જેમને ગાઢ ઊંઘને કારણે સ્ટેશન છૂટી જવાનો ભય રહે છે.
આ સર્વિસ કેવી રીતે કામ કરે છે?
આ સુવિધા ઇન્ટરનેટ પર આધારિત નથી, પરંતુ તે IVR (Interactive Voice Response) ટેકનોલોજીનો ઉપયોગ કરે છે. આનો અર્થ એ છે કે જો તમારા ફોનમાં ઇન્ટરનેટ ડેટા પેક ન હોય, તો પણ આ એલાર્મ સિસ્ટમ કામ કરશે.
એલાર્મ સેટ કરવાની સ્ટેપ-બાય-સ્ટેપ રીત:
- તમારા મોબાઈલના ડાયલ પેડ પરથી 139 નંબર પર કોલ કરો.તમારી પસંદગીની ભાષા (ગુજરાતી, હિન્દી કે અંગ્રેજી) પસંદ કરો.
- મેનુમાંથી 7 નંબરનો વિકલ્પ પસંદ કરો (જે ‘ડેસ્ટિનેશન એલર્ટ’ માટે છે).
- તમારો 10 અંકનો PNR નંબર દાખલ કરો.
- ત્યારબાદ 1 દબાવીને એલાર્મની પુષ્ટિ કરો.
સફળતાપૂર્વક રજિસ્ટ્રેશન થયા પછી તમારા પર એક કન્ફર્મેશન SMS આવશે. બસ, હવે તમે બેફિકર થઈને ઊંઘી શકો છો, કારણ કે સ્ટેશન આવતા પહેલા તમારો ફોન તમને જગાડી દેશે.
સર્વિસના ફાયદા અને ચાર્જ
- ચિંતામુક્ત મુસાફરી: તમારે વારંવાર બારીની બહાર જોવાની કે ગુગલ મેપ્સ ચેક કરવાની જરૂર નહીં પડે.
- બેટરીની બચત: આ સુવિધા માટે ઇન્ટરનેટ ચાલુ રાખવાની જરૂર ન હોવાથી ફોનની બેટરી બચે છે.
- મામૂલી શુલ્ક: આ સુવિધા માટે રેલવે એક નાનો ચાર્જ (આશરે 3 થી 10 રૂપિયાની વચ્ચે) લે છે, જે તમારા મોબાઈલ બેલેન્સમાંથી કપાય છે.
રેલવેની આ નાનકડી પણ અત્યંત ઉપયોગી સુવિધાથી લાખો મુસાફરોની મુસાફરી હવે વધુ સુખદ અને સુરક્ષિત બનશે.
