આજનું હવામાન: પૂર્વોત્તર અને દક્ષિણ ભારતના ૮ રાજ્યોમાં વરસાદની આગાહી, અરુણાચલ પ્રદેશમાં રેડ એલર્ટ
દેશભરમાં હવામાનની પેટર્નમાં મોટો ફેરફાર જોવા મળી રહ્યો છે. ઉત્તર અને મધ્ય ભારતમાંથી ચોમાસું ધીમે ધીમે પાછું ખેંચાઈ રહ્યું છે, ત્યારે પૂર્વોત્તર અને દક્ષિણ ભારતના રાજ્યોમાં હજુ પણ મેઘરાજા ધમાકેદાર ઇનિંગ રમી રહ્યા છે. ભારતીય હવામાન વિભાગ (IMD) દ્વારા જાહેર કરવામાં આવેલા તાજેતરમાં બુલેટિન અનુસાર, આજે દેશના ૮ રાજ્યોમાં વરસાદની શક્યતા વ્યક્ત કરવામાં આવી છે. આ પૈકી પૂર્વોત્તર રાજ્ય અરુણાચલ પ્રદેશમાં ભારેથી અતિભારે વરસાદને પગલે રેડ એલર્ટ જાહેર કરવામાં આવ્યું છે.
દિલ્હી-એનસીઆરમાં ચોમાસાની વિદાય, ગરમીમાં વધારો
રાજધાની દિલ્હી અને આસપાસના એનસીઆર વિસ્તારમાંથી ચોમાસું સંપૂર્ણપણે પાછું ખેંચાઈ ગયું છે. ચોમાસું વિદાય લેતાં જ દિલ્હી-એનસીઆરમાં દિવસ દરમિયાન તાપમાનનો પારો ઊંચકાયો છે અને ગરમીનો અનુભવ થઈ રહ્યો છે. હવામાન વિભાગના જણાવ્યા અનુસાર, આગામી થોડા દિવસો સુધી દિલ્હી-એનસીઆરમાં વરસાદની કોઈ ખાસ શક્યતા નથી. આકાશ મોટાભાગે સ્વચ્છ અને સૂકું રહેશે. મહત્તમ તાપમાન ૩૪ થી ૩૫ ડિગ્રી સેલ્સિયસ અને લઘુત્તમ તાપમાન ૨૩ થી ૨૪ ડિગ્રી સેલ્સિયસની આસપાસ રહેવાની સંભાવના છે.
ઉત્તર પ્રદેશ અને બિહારમાં હવામાન શુષ્ક રહેશે
ઉત્તર પ્રદેશમાં પણ છેલ્લા કેટલાક દિવસોથી ચાલતી વરસાદી પ્રવૃત્તિઓમાં નોંધપાત્ર ઘટાડો થયો છે. મોટાભાગના જિલ્લાઓમાં ચોમાસાની વિદાય સાથે જ આકાશ સ્વચ્છ થવા લાગ્યું છે. આજે સમગ્ર રાજ્યમાં હવામાન શુષ્ક રહેવાની આગાહી કરવામાં આવી છે અને કોઈ પણ જિલ્લા માટે વરસાદની ખાસ ચેતવણી આપવામાં આવી નથી.
બીજી તરફ, બિહારમાં પણ હવામાન મોટાભાગે સુકાઈ રહ્યું છે. જોકે, કેટલાક સીમાવર્તી જિલ્લાઓમાં સ્થાનિક ભેજના કારણે હળવા ઝાપટાં પડી શકે છે. હવામાન નિષ્ણાતોના મતે ૫ ઓક્ટોબર પછી બિહારના કેટલાક ચોક્કસ વિસ્તારોમાં ફરી એકવાર વરસાદી પ્રવૃત્તિઓમાં થોડો વધારો જોવા મળી શકે છે.
પૂર્વોત્તર રાજ્યોમાં ભારે વરસાદનું સંકટ
ઉત્તર ભારતથી વિપરીત પૂર્વોત્તર ભારતમાં હવામાનનો મિઝાઝ અલગ જ છે. અરુણાચલ પ્રદેશ, આસામ, મેઘાલય, નાગાલેન્ડ, મણિપુર, મિઝોરમ અને ત્રિપુરા જેવા રાજ્યોમાં આજે ગાજવીજ સાથે વરસાદની આગાહી છે. ખાસ કરીને અરુણાચલ પ્રદેશમાં અતિભારે વરસાદની ચેતવણી આપતાં તંત્રને સતર્ક કરવામાં આવ્યું છે. આસામ અને મેઘાલયમાં પણ વિજળીના કડાકા-ભડાકા સાથે મધ્યમથી ભારે વરસાદ પડી શકે છે.
દક્ષિણ ભારતમાં વાવાઝોડા સાથે વરસાદની શક્યતા
દક્ષિણ ભારતના રાજ્યોમાં પણ દરિયાઈ પવનોના કારણે વરસાદી માહોલ જળવાઈ રહ્યો છે. કેરળ, લક્ષદ્વીપ અને દરિયાકાંઠાના કર્ણાટકમાં આજે તેજ પવન સાથે મધ્યમથી ભારે વરસાદની ચેતવણી આપવામાં આવી છે. આ ટાપુઓ અને દરિયાકાંઠાના વિસ્તારોમાં માછીમારોને પણ સાવચેત રહેવાની સૂચના આપવામાં આવી છે. આ ઉપરાંત આંદામાન અને નિકોબાર ટાપુઓ પર પણ હળવા થી મધ્યમ ઝાપટાં પડે તેવી સંભાવના છે.
