નિયમિત સારવાર અને પોષણથી ટીબીને હરાવવાનો સંદેશ, રાજકોટમાં પ્રેરણાદાયી કાર્યક્રમ યોજાયો
રાજકોટ જિલ્લા ક્ષય કેન્દ્ર દ્વારા ‘યેસ વી કેન એન્ડ ટી.બી.’ (હા, આપણે ક્ષયનો અંત લાવી શકીએ છીએ) ના મજબૂત સંકલ્પ સાથે વિશ્વ ક્ષય દિવસની ભવ્ય ઉજવણી કરવામાં આવી હતી. મુખ્ય જિલ્લા આરોગ્ય અધિકારી આર. આર. ફુલમાળીના અધ્યક્ષસ્થાને આયોજિત આ કાર્યક્રમમાં રોટરી ક્લબ ઓફ રાજકોટ ગ્રેટરના સહયોગથી ટી.બી.ના ૧૨ જેટલા જરૂરિયાતમંદ દર્દીઓને વિશેષ પોષણ આહાર કીટનું વિતરણ કરવામાં આવ્યું હતું. આ પહેલનો મુખ્ય ઉદ્દેશ્ય દર્દીઓને માત્ર દવા જ નહીં, પરંતુ રોગ સામે લડવા માટે જરૂરી સંતુલિત આહાર અને પોષણ મળી રહે તે સુનિશ્ચિત કરવાનો છે.
ક્ષય મુક્ત ગુજરાત માટે નિયમિત સારવાર અને વહેલા નિદાન પર ભાર
આ પ્રસંગે મુખ્ય જિલ્લા આરોગ્ય અધિકારીએ દર્દીઓને પ્રોત્સાહિત કરતા જણાવ્યું હતું કે ટી.બી. એ હવે અસાધ્ય રોગ નથી, પરંતુ સંપૂર્ણપણે મટી શકે તેવી બીમારી છે. તેમણે ખાસ ભાર મૂક્યો હતો કે દર્દીઓએ અધવચ્ચેથી સારવાર ક્યારેય છોડવી જોઈએ નહીં, કારણ કે સાતત્યપૂર્ણ દવા લેવી એ જ આ રોગ સામેનું સૌથી મોટું શસ્ત્ર છે. આરોગ્ય વિભાગ ‘ટી.બી.મુક્ત ભારત’ ના લક્ષ્યને પ્રાપ્ત કરવા માટે કટિબદ્ધ છે. અધિકારીશ્રીએ આ રોગનો ચેપ અન્ય લોકોમાં ન ફેલાય તે માટે રાખવાની સાવચેતીઓ અને સરકારની વિવિધ કલ્યાણકારી યોજનાઓ વિશે પણ ઊંડાણપૂર્વક માર્ગદર્શન આપ્યું હતું.
ટી.બી. ચેમ્પિયન રોશનીબેન ખાનની પ્રેરણાદાયી સંઘર્ષગાથા
કાર્યક્રમમાં ટી.બી. ચેમ્પિયન રોશનીબેન ખાને પોતાનો અનુભવ રજૂ કરતા જણાવ્યું હતું કે વર્ષ ૨૦૨૫માં જ્યારે તેમને આ રોગ થયો ત્યારે શરૂઆતમાં નિદાનમાં મુશ્કેલી પડી હતી, પરંતુ રાજકોટ જિલ્લા ક્ષય કેન્દ્રના સહયોગથી તેમને સાચી સારવાર મળી હતી. જામનગર અને રાજકોટ ખાતે નિયમિત તપાસ અને સમયસર દવાઓના સેવનથી તેઓ આજે સંપૂર્ણ સ્વસ્થ છે. તેમના પરિવારના સભ્યો પણ આ રોગની ઝપેટમાં આવ્યા હતા, પરંતુ સરકારની મફત સારવાર પદ્ધતિને કારણે આજે આખો પરિવાર ક્ષયમુક્ત થઈને ખુશહાલ જીવન જીવી રહ્યો છે.
આરોગ્ય અધિકારીઓ અને સામાજિક અગ્રણીઓની ગરિમામય ઉપસ્થિતિ
આ સમગ્ર કાર્યક્રમનું સફળ સંચાલન મેડિકલ ઓફિસર ડૉ. સુરેશ લક્કડ દ્વારા કરવામાં આવ્યું હતું. આ અવસરે જિલ્લા ક્ષય અધિકારી ડૉ. ઘનશ્યામ મહેતા, મેડિકલ ઓફિસર ડૉ. બાદલ વાછાણી તેમજ રોટરી ક્લબના પ્રેસિડન્ટ જયદીપભાઇ મહેતા અને સેક્રેટરી અનુપભાઈ જોશી સહિતના મહાનુભાવો ઉપસ્થિત રહ્યા હતા. સામાજિક સંસ્થાઓ અને સરકારી તંત્રના આ સંયુક્ત પ્રયાસોથી રાજકોટ જિલ્લામાં ક્ષય નિર્મૂલન પ્રક્રિયાને વધુ વેગ મળશે. અંતે, ઉપસ્થિત સૌએ સમાજને ટી.બી. પ્રત્યે જાગૃત કરવા અને દર્દીઓને માનસિક સહયોગ આપવા માટે પ્રતિજ્ઞા લીધી હતી.
