રણબીર કપૂર અને યશની ‘રામાયણ’ રિલીઝ પહેલાં જ ચર્ચામાં, સેન્સર બોર્ડે આપ્યું U સર્ટિફિકેટ; જાણો ફિલ્મની ખાસ વાતો
બોલિવૂડની સૌથી વધુ રાહ જોવાતી ફિલ્મોમાંની એક ‘રામાયણ’ હવે સિનેમાઘરોમાં દસ્તક આપવા તૈયાર છે. રણબીર કપૂર, યશ અને સાઈ પલ્લવી જેવા દમદાર કલાકારોને એકસાથે લાવતી આ ફિલ્મને લઈને દર્શકોમાં ભારે ઉત્સુકતા છે. ફિલ્મની ભવ્યતા, કલાકારોના લુક અને વાર્તાને કારણે તે લાંબા સમયથી ચર્ચામાં રહી છે. હવે રિલીઝ પહેલાં ફિલ્મને લગતી કેટલીક મહત્ત્વની વિગતો સામે આવી છે, જેના કારણે ચાહકોનો ઉત્સાહ વધુ વધી ગયો છે.
‘રામાયણ’ને મળ્યું U સર્ટિફિકેટ
ફિલ્મની સૌથી મહત્ત્વની માહિતી એ છે કે સેન્ટ્રલ બોર્ડ ઑફ ફિલ્મ સર્ટિફિકેશન (CBFC) દ્વારા ‘રામાયણ’ને ‘U’ સર્ટિફિકેટ આપવામાં આવ્યું છે. એટલે કે આ ફિલ્મ તમામ ઉંમરના દર્શકો જોઈ શકશે. ખાસ કરીને પરિવાર સાથે ફિલ્મ જોવાનું પસંદ કરતા લોકો માટે આ સમાચાર મહત્ત્વના છે.
સેન્સર બોર્ડની માહિતી મુજબ ફિલ્મનો રનટાઇમ 195 મિનિટ રાખવામાં આવ્યો છે. એટલે કે દર્શકોએ લગભગ 3 કલાક અને 15 મિનિટ સુધી રામાયણની ભવ્ય ગાથાનો અનુભવ કરવાનો રહેશે. આટલો લાંબો સમયગાળો દર્શાવે છે કે ફિલ્મમાં વાર્તાને વિગતવાર અને મોટા પાયે રજૂ કરવાનો પ્રયાસ કરવામાં આવ્યો છે.
રણબીર રામ તો યશ બનશે રાવણ
ફિલ્મમાં રણબીર કપૂર ભગવાન શ્રીરામની ભૂમિકામાં જોવા મળશે, જ્યારે સાઈ પલ્લવી માતા સીતાનું પાત્ર ભજવી રહી છે. દક્ષિણ ભારતીય સિનેમાના જાણીતા અભિનેતા યશ રાવણના શક્તિશાળી પાત્રમાં નજરે પડશે. આ ત્રણેય કલાકારોની પસંદગીએ ફિલ્મને લઈને દર્શકોમાં વિશેષ રસ ઊભો કર્યો છે.
આ ઉપરાંત સની દેઓલ ભગવાન હનુમાનની ભૂમિકામાં જોવા મળશે. રવિ દુબે લક્ષ્મણ, રકુલ પ્રીત સિંહ શૂર્પણખા અને અરુણ ગોવિલ રાજા દશરથના પાત્રમાં છે. અલગ-અલગ ફિલ્મ ઉદ્યોગોના જાણીતા કલાકારોને એકસાથે જોવાની તક પણ આ ફિલ્મનું મોટું આકર્ષણ બની શકે છે.
શું છે ફિલ્મની વાર્તા?
સેન્સર બોર્ડ દ્વારા આપવામાં આવેલી સત્તાવાર વાર્તાની વિગતો અનુસાર, રાવણ જ્યારે પોતાની શક્તિના જોરે ત્રણેય લોક પર કબજો જમાવવાનો પ્રયાસ કરે છે, ત્યારે ભગવાન વિષ્ણુ રાજકુમાર રામ તરીકે પૃથ્વી પર અવતાર લે છે. પિતાના વચનનું પાલન કરવા માટે રામ, સીતા અને ભાઈ લક્ષ્મણ સાથે વનવાસે જાય છે.
આ દરમિયાન રાવણ સીતાનું અપહરણ કરે છે અને ત્યારબાદ અધર્મ સામે ધર્મની લડાઈ શરૂ થાય છે. આ જ મહાકાવ્યની જાણીતી કથાને ફિલ્મમાં ભવ્ય દૃશ્યો અને આધુનિક સિનેમેટિક ટેક્નોલોજી સાથે રજૂ કરવામાં આવશે.
બે ભાગમાં રિલીઝ થશે ‘રામાયણ’
નિતેશ તિવારીના નિર્દેશનમાં બનેલી આ ફિલ્મનું નિર્માણ નમિત મલ્હોત્રા કરી રહ્યા છે. નિર્માતાઓએ આ મહાકાવ્યને બે ભાગમાં રજૂ કરવાની યોજના બનાવી છે. પ્રથમ ભાગ 5 નવેમ્બર, 2026ના રોજ સિનેમાઘરોમાં રિલીઝ થવાનો છે, જ્યારે બીજો ભાગ દિવાળી 2027 દરમિયાન દર્શકો સુધી પહોંચશે.
દર્શકોની અપેક્ષાઓ પર ખરી ઉતરશે?
રામાયણ માત્ર એક ધાર્મિક કથા નથી, પરંતુ ભારતીય સંસ્કૃતિ અને મૂલ્યો સાથે જોડાયેલી મહત્ત્વપૂર્ણ ગાથા છે. તેથી આ વાર્તાને મોટા પડદા પર રજૂ કરવી નિર્માતાઓ માટે એક મોટી જવાબદારી પણ છે. ભવ્ય કલાકારમંડળ, લાંબો રનટાઇમ અને બે ભાગમાં રજૂ થતી વાર્તાને કારણે ફિલ્મ પાસેથી દર્શકોની અપેક્ષાઓ ઘણી ઊંચી છે.
હવે જોવાનું એ રહેશે કે રણબીર કપૂર, યશ અને અન્ય કલાકારોની આ ફિલ્મ દર્શકોના દિલમાં કેટલી જગ્યા બનાવી શકે છે અને બોક્સ ઓફિસ પર કેવો પ્રભાવ પાડે છે.
