IPL 2026: ચિન્નાસ્વામી સ્ટેડિયમમાં 11 સીટો હંમેશા ખાલી રહેશે, RCBએ આ કારણોસર લીધો મોટો નિર્ણય
IPL 2026ની શરૂઆત પહેલા રોયલ ચેલેન્જર્સ બેંગ્લુરુ (RCB) ફ્રેન્ચાઇઝીએ એક ભાવુક અને મહત્વપૂર્ણ નિર્ણય લીધો છે. બેંગ્લુરુના એમ. ચિન્નાસ્વામી સ્ટેડિયમમાં હવેથી દરેક મેચ દરમિયાન 11 સીટો કાયમ માટે ખાલી રાખવામાં આવશે. આ નિર્ણય કોઈ તકનીકી કારણોસર નહીં, પરંતુ માનવતા અને શ્રદ્ધાંજલિના ભાગરૂપે લેવામાં આવ્યો છે.
ગયા વર્ષની દુખદ ઘટનાની યાદમાં શ્રદ્ધાંજલિ
IPLની 19મી સીઝન પહેલા લેવાયેલો આ નિર્ણય પાછળ એક દર્દનાક ભૂતકાળ જોડાયેલો છે. ગત વર્ષે 4 જૂન 2025ના રોજ જ્યારે RCBએ તેનું પ્રથમ IPL ટાઇટલ જીત્યું હતું, ત્યારે બેંગ્લુરુમાં ભારે ઉજવણીનો માહોલ હતો. આ જશ્ન દરમિયાન સ્ટેડિયમ પાસે મચેલી નાસભાગમાં 11 નિર્દોષ લોકોએ જીવ ગુમાવ્યા હતા. આ મૃતકોના માનમાં અને તેમને કાયમી યાદ રાખવા માટે ફ્રેન્ચાઇઝીએ આ અનોખું પગલું ભર્યું છે.
કાયમ માટે ખાલી રહેશે આ 11 સીટો
RCB અને કર્ણાટક સ્ટેટ ક્રિકેટ એસોસિએશન (KSCA) ના સંયુક્ત નિર્ણય મુજબ, સ્ટેડિયમના એક પ્રમુખ સ્ટેન્ડની 11 સીટોને સામાન્ય પ્રેક્ષકો માટે હટાવી દેવામાં આવી છે. IPL હોય કે ઇન્ટરનેશનલ મેચ, આ સીટો પર હવે ક્યારેય કોઈ બેસશે નહીં. આ સીટો તે 11 આત્માઓનું પ્રતીક બની રહેશે જેમને ક્રિકેટ પ્રત્યેના પ્રેમને કારણે પોતાનો જીવ ગુમાવવો પડ્યો હતો. સોશિયલ મીડિયા પર ફેન્સ RCBના આ જેસ્ચરની ખૂબ પ્રશંસા કરી રહ્યા છે.
સ્ટેડિયમના ગેટ પાસે સ્મારકનું નિર્માણ
માત્ર સીટો ખાલી રાખવા પૂરતું જ નહીં, પણ ફ્રેન્ચાઇઝીએ પીડિતોના સન્માનમાં સ્ટેડિયમના એન્ટ્રી ગેટ પાસે એક ભવ્ય સ્મારક બનાવવાનું પણ નક્કી કર્યું છે. 28 માર્ચ 2026ના રોજ IPLની ઓપનિંગ મેચ પહેલા આ સ્મારકનું અનાવરણ કરવામાં આવશે. આ ઉપરાંત, મેચના દિવસે સ્ટેડિયમની મોટી સ્ક્રીન પર તમામ 11 પીડિતોના નામ પ્રદર્શિત કરવામાં આવશે અને તેમની યાદમાં એક મિનિટનું મૌન પાળવામાં આવશે.
ખેલાડીઓ 11 નંબરની જર્સીમાં આપશે માન
આ સીઝન દરમિયાન RCBના ખેલાડીઓ પ્રેક્ટિસ સેશન વખતે ખાસ 11 નંબરની જર્સી પહેરીને મેદાનમાં ઉતરશે. ફ્રેન્ચાઇઝીના CEO રાજેશ મેનને આ અંગે વધુ માહિતી આપતા જણાવ્યું હતું કે, કર્ણાટક સરકાર અને સ્થાનિક પોલીસના સહયોગથી હવે સ્ટેડિયમની સુરક્ષા માટે કડક SOP (સ્ટાન્ડર્ડ ઓપરેટિંગ પ્રોસિજર) લાગુ કરવામાં આવી છે, જેથી ભવિષ્યમાં આવી કોઈ ઘટના ન બને.
પ્રથમ મેચમાં RCB અને SRH વચ્ચે ટક્કર
IPL 2026ની ભવ્ય શરૂઆત 28 માર્ચના રોજ બેંગ્લુરુના ચિન્નાસ્વામી સ્ટેડિયમમાં થશે. સીઝનની ઓપનિંગ મેચમાં રોયલ ચેલેન્જર્સ બેંગ્લુરુ અને સનરાઈઝર્સ હૈદરાબાદ સામસામે ટકરાશે. આ વખતે RCBની કમાન રજત પાટીદારના હાથમાં હશે, જ્યારે સનરાઈઝર્સ હૈદરાબાદની ટીમ ઈશાન કિશનના નેતૃત્વમાં મેદાનમાં ઉતરશે, કારણ કે નિયમિત કેપ્ટન પેટ કમિન્સ શરૂઆતની કેટલીક મેચોમાં ગેરહાજર રહેવાના છે.
