‘જો હું હોત તો રમત ભાવનાને પ્રાધાન્ય આપત’ – રનઆઉટ વિવાદ પર સલમાન અલી આઘાનો વળતો પ્રહાર
Salman Agha Run Out: બાંગ્લાદેશ અને પાકિસ્તાન વચ્ચે 13 માર્ચના રોજ ઢાકાના શેર-એ-બાંગ્લા સ્ટેડિયમમાં રમાયેલી બીજી વનડે મેચ વિવાદોને કારણે સમાચારોમાં રહી છે. આ મેચમાં પાકિસ્તાની બેટ્સમેન સલમાન અલી આઘાને જે રીતે આઉટ કરવામાં આવ્યો, તેનાથી ખેલ જગતમાં ‘સ્પિરિટ ઓફ ક્રિકેટ’ (રમતની ભાવના) પર સવાલો ઉભા થયા છે.
શું હતો સમગ્ર વિવાદ?
આ ઘટના પાકિસ્તાની ઇનિંગ્સની 39મી ઓવરમાં બની હતી. મોહમ્મદ રિઝવાને મેહદી હસન મિરાજના બોલ પર સીધો શોટ રમ્યો હતો. મિરાજે પગ વડે બોલને રોકવાનો પ્રયાસ કર્યો, જે દરમિયાન તેની અને નોન-સ્ટ્રાઈકર એન્ડ પર ઉભેલા સલમાન આઘા વચ્ચે ટક્કર થઈ હતી. સલમાન ક્રીઝની બહાર હતો, પણ તેને લાગ્યું કે બોલ ‘ડેડ’ થઈ ગયો છે.
સલમાન આઘાએ ખેલદિલી બતાવતા નીચે નમીને બોલ ઉઠાવ્યો જેથી તે બોલર મિરાજને પરત આપી શકે. પરંતુ મિરાજે આ તકનો લાભ ઉઠાવી સલમાનના હાથમાંથી બોલ છૂટતા જ તેને ઝડપી લીધો અને સ્ટમ્પ પર ફેંકીને રનઆઉટની અપીલ કરી. થર્ડ અમ્પાયરે નિયમ મુજબ સલમાનને આઉટ જાહેર કર્યો, જેનાથી મેદાન પર ભારે અફરાતફરી મચી ગઈ હતી.
સલમાન આઘાએ મેહદી હસન મિરાજ પર શું કહ્યું?
મેચ બાદ ‘ક્રિકબઝ’ સાથે વાત કરતા સલમાન આઘાએ પોતાની નારાજગી વ્યક્ત કરી હતી. તેણે જણાવ્યું કે:
“મને ખાતરી છે કે દરેક વ્યક્તિએ આ ઘટના જોઈ હશે. તે સમયે જે કંઈ પણ થયું તે ‘હીટ ઓફ ધ મોમેન્ટ’ હતું. જો તમે મને પૂછો કે હું તે જગ્યાએ હોત તો શું કરત, તો મારો નિર્ણય ચોક્કસપણે અલગ હોત. જોકે તેણે જે કર્યું તે નિયમ મુજબ હતું, પણ હું હંમેશા રમતની ગરિમા જાળવવામાં માનું છું.”
રમતની ભાવના વિરુદ્ધ નિયમોનો જંગ
સલમાન આઘાએ વધુમાં ઉમેર્યું કે ભલે આઈસીસીના નિયમો (Laws of Cricket) મુજબ તે આઉટ હતો, પરંતુ ક્રિકેટમાં નૈતિકતા અને રમત ભાવના પણ મહત્વની છે. તેણે કહ્યું, “કાયદા પ્રમાણે તે સાચો હોઈ શકે છે, પરંતુ મારા મતે રમતની ભાવના સર્વોપરી હોવી જોઈએ. મેં બોલ તેને પરત આપવા માટે જ ઉઠાવ્યો હતો, રન લેવા માટે નહીં. જો હું હોત તો રમત ભાવનાને પહેલા પસંદ કરત.”
