સૌરાષ્ટ્ર પટેલ સેવા સમાજ દ્વારા ૧૫૦ અઠવાડિયાની વિચાર યાત્રા પૂર્ણ, ‘100 Thoughts Book’નું રાજ્યપાલના હસ્તે વિમોચન
સૌરાષ્ટ્ર પટેલ સેવા સમાજ, સુરત દ્વારા છેલ્લા ત્રણ વર્ષથી સમાજમાં સકારાત્મકતા ફેલાવવા માટે ‘થર્સ ડે થોટ્સ: વિચારોનું વાવેતર’ કાર્યક્રમ ચલાવવામાં આવે છે. આ અભિયાન જ્યારે ૧૫૦મા અઠવાડિયે પહોંચ્યું ત્યારે તેની ઉજવણી ‘વિચાર મહોત્સવ’ તરીકે કરવામાં આવી હતી. આ ખાસ પ્રસંગે ગુજરાતના રાજ્યપાલ આચાર્ય દેવવ્રતજી વિશેષ ઉપસ્થિત રહ્યા હતા. કાર્યક્રમ દરમિયાન છેલ્લા ૧૫૦ અઠવાડિયાના શ્રેષ્ઠ વિચારોનું સંકલન ધરાવતી ‘100 Thoughts Book’નું વિમોચન પણ રાજ્યપાલના હસ્તે કરવામાં આવ્યું હતું, જે નવી પેઢી માટે માર્ગદર્શક બની રહેશે.
સકારાત્મક વિચારો રાષ્ટ્ર ઘડતરનો પાયો
રાજ્યપાલ આચાર્ય દેવવ્રતજીએ પોતાના સંબોધનમાં વિચારોના મહત્વ પર ભાર મૂકતા જણાવ્યું કે, વિચારોનું વાવેતર એ જ સાચું રાષ્ટ્ર ઘડતર છે. સ્નાનથી માત્ર શરીર સાફ થાય છે, પરંતુ મન અને બુદ્ધિની શુદ્ધિ તો માત્ર સત્ય અને જ્ઞાનથી જ શક્ય છે. તેમણે ઉમેર્યું કે જે વ્યક્તિના વિચારો ઉદાર અને કલ્યાણકારી હોય, તેનું વર્તન અને સ્વભાવ આપોઆપ આદર્શ બની જાય છે. ઇતિહાસ હંમેશા એવા લોકોની જ કદર કરે છે જેમણે પોતાના ઉત્તમ વિચારો દ્વારા સમાજને કંઈક નવું અને પ્રેરણાદાયી આપ્યું હોય.
નવી પેઢીમાં સંસ્કાર સિંચન અને ભારતીય પરંપરા
ઋષિ પરંપરા અને ૧૬ સંસ્કારોનું મહત્વ સમજાવતા રાજ્યપાલશ્રીએ નવી પેઢીના વૈચારિક ઘડતર અંગે ચિંતા વ્યક્ત કરી હતી. તેમણે વડીલોને અનુરોધ કર્યો કે આવા સામાજિક અને વૈચારિક કાર્યક્રમોમાં બાળકોને અચૂક સાથે લાવવા જોઈએ. અનુભવીઓના માર્ગદર્શન અને સંવાદ દ્વારા બાળકોને જે જીવન શિક્ષણ મળે છે, તે કોઈ શાળા આપી શકતી નથી. સંપત્તિ અને વૈભવ જો સંસ્કાર વગરના હશે તો તે પતનનું કારણ બનશે, તેથી નવી પેઢીમાં વૈચારિક શક્તિનું સિંચન કરવું એ જ સાચી રાષ્ટ્રસેવા છે.
સુરતના પાટીદાર અગ્રણીઓની સેવાકીય પ્રવૃત્તિઓની પ્રશંસા
રાજ્યપાલશ્રીએ સુરતના પાટીદાર સમાજના અગ્રણીઓને બિરદાવતા કહ્યું કે આ સમાજે ‘રાષ્ટ્ર પ્રથમ’ની ભાવનાને હંમેશા ચરિતાર્થ કરી છે. પોતાની મહેનતની કમાણીનો અંશ સમાજ સેવા અને પરોપકારમાં વાપરીને આ લોકો રાષ્ટ્રની સાચી સંપત્તિ સાબિત થયા છે. સૌરાષ્ટ્ર પટેલ સેવા સમાજના પ્રમુખ કાનજીભાઈ ભાલાળાએ જણાવ્યું કે ૧૬ માર્ચ, ૨૦૨૩થી શરૂ થયેલી આ વિચારયાત્રા આજે એક વટવૃક્ષ બની ગઈ છે. આ પ્રસંગે વિવિધ દાતાશ્રીઓનું સન્માન કરવામાં આવ્યું હતું અને અનેક અગ્રણી ઉદ્યોગપતિઓ તેમજ સામાજિક કાર્યકરો ઉપસ્થિત રહ્યા હતા.
