સંજુ સેમસન બન્યો નવો ‘સિક્સર કિંગ’: T20 વર્લ્ડ કપ 2026માં ભારતે રચ્યો ઇતિહાસ
T20 વર્લ્ડ કપ 2026નું શાનદાર સમાપન થયું છે અને ક્રિકેટ જગતને નવો ચેમ્પિયન મળી ગયો છે. ભારતીય ટીમ ત્રીજી વખત આ ટાઇટલ જીતવામાં સફળ રહી છે. આ ઐતિહાસિક જીત પાછળ જો કોઈ ખેલાડીનું નામ સૌથી વધુ ગુંજી રહ્યું હોય, તો તે છે વિસ્ફોટક બેટ્સમેન સંજુ સેમસન. પોતાની આક્રમક બેટિંગથી તેણે માત્ર ભારતને જીત જ નથી અપાવી, પરંતુ ‘પ્લેયર ઓફ ધ સીરીઝ’નો ખિતાબ પણ પોતાના નામે કર્યો છે.
ફાઈનલમાં સેમસનનું તોફાન
ન્યૂઝીલેન્ડ સામેની ફાઈનલ મેચમાં સંજુ સેમસને જે રીતે બેટિંગ કરી, તેનાથી કીવી બોલરો લાચાર દેખાતા હતા. તેણે માત્ર 46 બોલમાં 89 રનની ધમાકેદાર ઇનિંગ રમી હતી, જેમાં 5 ચોગ્ગા અને 8 ગગનચુંબી છગ્ગા સામેલ હતા. સતત ત્રીજી મેચમાં સંજુ સદીની ખૂબ નજીક પહોંચ્યો હતો, જે તેની શાનદાર ફોર્મની સાબિતી આપે છે.
રન બનાવવામાં રહ્યો આગળ
આખા ટૂર્નામેન્ટ દરમિયાન સંજુનું બેટ સતત રન વરસાવતું રહ્યું. તેણે 5 ઇનિંગ્સમાં 80.25ની સરેરાશ અને લગભગ 200ના સ્ટ્રાઈક રેટથી કુલ 321 રન બનાવ્યા. આ સાથે જ તે T20 વર્લ્ડ કપ 2026માં સૌથી વધુ રન બનાવનાર ત્રીજો બેટ્સમેન બન્યો છે.
T20 વર્લ્ડ કપ 2026માં સૌથી વધુ રન બનાવનાર ખેલાડીઓ:
| ખેલાડીનું નામ | કુલ રન |
| સાહિબજાદા ફરહાન | 383 |
| ટિમ સીફર્ટ | 326 |
| સંજુ સેમસન | 321 |
| ઈશાન કિશન | 317 |
| ફિન એલન | 298 |
સિક્સરનો નવો વર્લ્ડ રેકોર્ડ
સંજુ સેમસને આ વર્લ્ડ કપમાં છગ્ગાની એવી ઝડી લગાવી કે જૂના તમામ રેકોર્ડ ધ્વસ્ત થઈ ગયા. તેણે એક જ ટૂર્નામેન્ટમાં કુલ 24 છગ્ગા ફટકારીને નવો ઈતિહાસ રચ્યો છે. અગાઉ આ રેકોર્ડ વેસ્ટ ઈન્ડિઝના નિકોલસ પૂરના નામે હતો, જેણે 2024માં 17 છગ્ગા માર્યા હતા. આ વખતે વર્લ્ડ કપમાં બેટ્સમેનોનો દબદબો રહ્યો હતો, જેના કારણે પૂરન હવે છગ્ગા મારવાના લિસ્ટમાં પાંચમા ક્રમે ધકેલાઈ ગયો છે.
એક જ T20 વર્લ્ડ કપમાં સૌથી વધુ છગ્ગા મારનાર બેટ્સમેનો:
- સંજુ સેમસન: 24 (2026)
- ફિન એલન: 20 (2026)
- શિમરોન હેટમાયર: 19 (2026)
- ઈશાન કિશન: 18 (2026)
- સાહિબજાદા ફરહાન: 18 (2026)
ટીમ ઈન્ડિયાની જીતનો હીરો
ભારત માટે આ વર્લ્ડ કપ જીતવો ખૂબ જ મહત્વપૂર્ણ હતો અને સંજુ સેમસનની આક્રમકતાએ ટીમની રાહ આસાન કરી દીધી. ખાસ કરીને છેલ્લી ત્રણ મેચોમાં તેની બેટિંગે વિરોધી ટીમોના મનોબળ તોડી નાખ્યા હતા. તેની આ રમતને કારણે જ ભારત આજે ફરી એકવાર વિશ્વ વિજેતા બન્યું છે.
