વ્હાઇટ હાઉસ પાસે બે ગાર્ડ્સને ગોળી મારવામાં આવી, 500 સૈનિકોને એકઠા કરવાનો ટ્રમ્પનો આદેશ; કહ્યું- ‘શંકાસ્પદ અફઘાની…’
વોશિંગ્ટનમાં રાષ્ટ્રપતિ ડોનાલ્ડ ટ્રમ્પના સત્તાવાર નિવાસસ્થાન અને કાર્યાલય વ્હાઇટ હાઉસ નજીક તૈનાત નેશનલ ગાર્ડના બે સભ્યોને બુધવારે ગોળી મારી દેવામાં આવી છે. ટ્રમ્પે કહ્યું છે કે આ ઘટના દેશ માટે પીડા અને શોકથી ભરેલી છે.
અમેરિકાની રાજધાની વોશિંગ્ટનમાં વ્હાઇટ હાઉસ પાસે બે નેશનલ ગાર્ડ્સને નજીકથી ગોળી મારવામાં આવી છે. આ ઘટના બાદ સમગ્ર અમેરિકામાં હોબાળો મચી ગયો છે. પોલીસને શંકા છે કે આ હુમલો લક્ષિત હત્યા ની ઘટના હોઈ શકે છે. આ ઘટના બાદ રાષ્ટ્રપતિ ડોનાલ્ડ ટ્રમ્પે જનતાને સંબોધિત કર્યા છે અને હુમલો કરનારને લઈને કડક ચેતવણી આપી છે. તેમણે કહ્યું કે હુમલો કરનારને ભારે કિંમત ચૂકવવી પડશે. રાષ્ટ્રપતિ ટ્રમ્પે એમ પણ કહ્યું છે કે નેશનલ ગાર્ડ્સને ગોળી મારનાર શંકાસ્પદની ઓળખ અફઘાની નાગરિક તરીકે કરવામાં આવી છે.
શંકાસ્પદ એક અફઘાની હતો- ટ્રમ્પ
અમેરિકી રાષ્ટ્રપતિ ડોનાલ્ડ ટ્રમ્પે બે નેશનલ ગાર્ડ્સને ગોળી મારવાની ઘટનાને આતંકવાદી કૃત્ય ગણાવ્યું છે અને કહ્યું છે કે આ મામલે ઝડપી અને નિશ્ચિત કાર્યવાહી કરવામાં આવશે. તેમણે કહ્યું કે હોમલેન્ડ સિક્યુરિટી દ્વારા આપવામાં આવેલી માહિતી અનુસાર શંકાસ્પદ એક અફઘાની હતો. ટ્રમ્પે કહ્યું: “આ જઘન્ય હુમલો દુષ્ટતાનું કૃત્ય, ધૃણાનું કૃત્ય અને આતંકનું કૃત્ય હતું. આ આપણા સમગ્ર દેશ સામેનો ગુનો હતો, આ માનવતા સામેનો ગુનો હતો. આજે રાત્રે તમામ અમેરિકનોના દિલ વેસ્ટ વર્જિનિયન નેશનલ ગાર્ડના તે બે સભ્યો અને તેમના પરિવાર સાથે છે.”
‘અફઘાનિસ્તાનથી આવેલા દરેક વિદેશીની ફરી તપાસ થાય’
ટ્રમ્પે કહ્યું: “સુરક્ષા વિભાગને વિશ્વાસ છે કે કસ્ટડીમાં લેવાયેલો શંકાસ્પદ એક વિદેશી છે જે અફઘાનિસ્તાનથી આપણા દેશમાં દાખલ થયો હતો, જે પૃથ્વી પરનું એક નરક છે. આપણે હવે બાયડેન શાસન હેઠળ અફઘાનિસ્તાનથી આપણા દેશમાં પ્રવેશ કરનારા દરેક વિદેશીની ફરી તપાસ કરવી જોઈએ. જો તેઓ આપણા દેશને પ્રેમ ન કરી શકે, તો આપણે તેમને નથી જોઈતા. અમેરિકા ક્યારેય આતંક સામે ઝૂકશે નહીં. બાયડેન વહીવટીતંત્રે વિશ્વભરમાંથી 20 મિલિયન અજાણ્યા વિદેશીઓને આવવા દીધા.”
500 સૈનિકોને એકઠા કરવાનો આદેશ
ડોનાલ્ડ ટ્રમ્પે કહ્યું છે કે “મેં અમારી સુરક્ષામાં મદદ કરવા માટે વધારાના 500 સૈનિકોને એકઠા કરવાનો નિર્દેશ આપ્યો છે. અમે અમેરિકાને ફરીથી સંપૂર્ણપણે સુરક્ષિત બનાવીશું અને અમે આ જંગલી હુમલાના ગુનેગારને ઝડપી અને નિશ્ચિત ન્યાયના કઠેડામાં લાવીશું.” અમેરિકાના રક્ષા મંત્રી પીટ હેગસેથે પણ કહ્યું છે કે રાષ્ટ્રપતિ ડોનાલ્ડ ટ્રમ્પે તેમને વધારાના સૈનિકો મોકલવા માટે કહ્યું છે.
નેશનલ ગાર્ડ્સને ગોળી મારનાર શંકાસ્પદની ઓળખ અફઘાની નાગરિક રહેમાનુલ્લા લાકનવાલ તરીકે કરવામાં આવી છે, જે 2021 માં યુનાઇટેડ સ્ટેટ્સમાં આવ્યો હતો. માનવામાં આવી રહ્યું છે કે તેણે એકલા હાથે આ ઘટનાને અંજામ આપ્યો હતો.
