શેર બજારના નામે લૂંટ ચલાવતી ગેંગ પર ઈડીનો મોટો સકંજો
શેર બજારમાં મોટો નફો અપાવવાની લાલચ આપી સામાન્ય રોકાણકારોને છેતરનાર ગેંગ સામે એન્ફોર્સમેન્ટ ડાયરેક્ટોરેટે કડક કાર્યવાહી હાથ ધરી છે. પ્રીવેન્શન ઓફ મની લોન્ડરિંગ એક્ટ હેઠળ હિમાશું ભરતકુમાર ભાવસાર સામે તપાસ કરવામાં આવી, જેમાં તપાસ દરમ્યાન રૂ. 2.4 કરોડની ચાંદી, રૂ. 1.7 કરોડનું સોનું, રૂ. 38.8 લાખ રોકડ, વિદેશી ચલણ તેમજ મહત્વના મિલકત સંબંધિત દસ્તાવેજો જપ્ત કરવામાં આવ્યા છે.
અમદાવાદ સ્થિત ઈડીની ટીમે હિમાશું ઉર્ફે પીન્ટુ ભાવસાર અને તેના સાગરીતો સામે PMLA, 2002 હેઠળ ચાલી રહેલી મની લોન્ડરિંગ તપાસના ભાગરૂપે આ દરોડાની કાર્યવાહી કરી હતી. પ્રાથમિક તપાસમાં જપ્ત કરાયેલી સંપત્તિ ગુનાહિત પ્રવૃત્તિમાંથી મેળવાયેલ હોવાનું સામે આવ્યું છે.
ખેરાલુ પોલીસ ફરિયાદથી ખુલ્યો મોટો કૌભાંડ
આ સમગ્ર કેસની શરૂઆત મહેસાણાના ખેરાલુ પોલીસ સ્ટેશનમાં નોંધાયેલી ફરિયાદ પરથી થઈ હતી. આરોપીએ શેર બજારમાં મોટો નફો અપાવવાની ખાતરી આપી રોકાણકારો પાસેથી નાણાં એકત્રિત કર્યા હતા. જોકે, આ રકમ ક્યારેય સાચા રોકાણમાં વપરાઈ નહોતી. રોકાણકારોને ન તો વાયદા મુજબ નફો મળ્યો અને ન જ મૂળ રકમ પરત અપાઈ.
અનેક રાજ્યોમાં નોંધાયેલા છેતરપિંડીના કેસ
તપાસમાં ખુલ્યું છે કે આ ગેંગ સામે દેશના વિવિધ રાજ્યોમાં અનેક ફરિયાદો નોંધાયેલી છે. અત્યાર સુધીમાં ઓછામાં ઓછા છ અલગ અલગ એફઆઈઆર નોંધાઈ હોવાની માહિતી મળી છે. આ તમામ કેસોમાં કુલ છેતરપિંડીની રકમ દસ કરોડ રૂપિયાથી વધુ હોવાનું સામે આવ્યું છે. આ આંકડાઓથી સમગ્ર નેટવર્ક કેટલું વિશાળ હતું તે સ્પષ્ટ થાય છે.
ઓફિસો અને કોલ નેટવર્કથી રોકાણકારોને ફસાવ્યા
ઈડીની તપાસમાં જાણવા મળ્યું છે કે આરોપીએ મહેસાણા, વિસનગર અને વડનગરમાં ઓફિસો શરૂ કરી હતી. ત્યાં સ્ટાફ રાખી રોકાણકારોને સતત ફોન કોલ દ્વારા વધુ રિટર્નના વાયદા કરવામાં આવતા હતા. નિયમિત સંપર્ક અને ખોટા દાવાઓ દ્વારા લોકોમાં વિશ્વાસ ઊભો કરી મોટી રકમ ઉઘરાવવામાં આવતી હતી. આ રીતે ગોઠવાયેલ વ્યવસ્થિત નેટવર્ક ચાલતું હતું.
સેબી સર્ટિફિકેટનો દુરુપયોગ પણ સામે આવ્યો
તપાસ દરમ્યાન એ પણ બહાર આવ્યું છે કે આરોપીએ સેબી દ્વારા મળેલ ઇન્વેસ્ટમેન્ટ એડવાઇઝર સર્ટિફિકેટનો ગેરઉપયોગ કર્યો હતો. વિવિધ ખાનગી કંપનીઓના નામે બિનઅધિકૃત સલાહ સેવાઓ આપવામાં આવી રહી હતી. આ સંસ્થાઓ અને તેમના સંચાલકો સામે નિયમોના ભંગ બદલ સેબીએ કાર્યવાહી કરી હોવાનું જાણવા મળ્યું છે. ઈડીનું માનવું છે કે આ સમગ્ર વ્યવસ્થા ગેરકાયદે નફો કમાવવા માટે રચાઈ હતી.
